¹ Li o Jehosafati kajisi buvubi abulemu; wakapanga chizuminano a Ahabbu akubweza umwi wempuli yakwe kuti akwate mwana musimbi . ² Nikwakayinda myaaka, wakazokunukila kuli Ahabbu ku Samaliya. Ahabbu wakamujayila imbelele zyiingi ang'ombe abantu mbakalaabo. Alimwi Ahabbu wakamukombelezya kuku lwanisya Lamoti - Giliyadi anguwe. ³ Ahabbu, mwaami wa Izilayili, wakati kuli Jehosafati mwaami wa Juda, ''Ngatulayinkamwi na ku Lamoti - Giliyadi ?'' Jehosafati wakamusandula, ''Imebo ndili mbuli nduwe, abantu bangu balimbuli bantu bako. Tuyoba anduwe munkondo.'' ⁴ Jehosafati wakambila mwaami wa Izilayeli kuti, ''Weenche sanguna kuyanduula ijwi lya Jehova kunsandulo yako.'' ⁵ Mpawo mwaami wa Izilayeli wakabunganya basinsimi aamwi, myaanda iine yabalumi, akwaamba kuti kuli mbabo, ''Ngatulayinka na ku Lamoti - Giliyadi kukuyolwana, nakuti nditayinki?'' Bakamusandula kuti, ''Kiilwanisye, nkaambo Leza uyoyipa mujaanza lya mwaami.'' ⁶ Pesi Jehosafati wakati, ''Sa takuchikwe uumbi musinsimi ngutunga tulayandula inchenjezyo?'' ⁷ Mwaami wa Izilayeli wakaamba kuti Johoshafati, ''Kuchili uumwi mwalumi wa Leza ngutunga tulayandula inchenjezyo, Mikkaya mwana wa Imula, pesi ndimusulide nkambo taakwe nasinsima kabotu atala andime, pesi lyoonse usinsima bubi.'' Pesi Jehosafati wakati, ''Mwaami teelede kwamba obo.'' ⁸ Mpawo mwaami wa Izilayili wakiita mubelesi akumwambila kuti, ''Fwambana kuyomweeta Mikkaya mwana wa Imula.'' ⁹ Lino Ahabbu mwaami wa Izilayili a Jehosafati mwaami wa Juda bakali kkede umwi awumwi achuno chabwami, kabasamide zizwaato zyabo, abusena buli antanganana kumanjililo amulyango wa Samaliya, abasinsimi boonse bakali kusinsima kunembo lyakwe. ¹⁰ Zedekkiya mwana mulombe wa Kkenana wakalichitila meja alubulo akwamba kuti, ''Jehova waamba oobu: Aazezi uyotonta ba Alamu kusikila bamenwe.'' ¹¹ Boonse basinsimi bakasinsima bwelene, bakati, ''Ukawulwisye Lamoti Giliyadi akuyowuzunda, nkambo Jehova wawupa mujanza lya Mwaami.'' ¹² Lino mutumwa wakiinka kuyoyita Mikkaya wakuti kuli nguwe, ''Langa, majwi abasinsimi ngomulomo kaali abubotu kumwaami. Leka majwi aako azuminane aabo, akwamba makani mabotu.'' ¹³ Mikkaya wakasandula, ''Kuti mbuli Jehova mbwali muumi, kachili nchicho Leza nchawamba nchicho nchendiyowamba.'' ¹⁴ Eelyo nakasika kumwaami, mwaami wakati kulinguwe, ''Mikkaya, nga tulayinkana kuyolwana naa pe ?'' Mikkaya wakamusandula kuti, ''Ukamulwanisye akuba muzundi, kuyoba luzundo lupati.'' ¹⁵ Eelyo mwaami wakati kuli nguwe, ''Ziindi zili zingana nzinjelede kwamba kuti ukonke kuti uwambe manwa pesi kasimpe muzina lya Jehova ?'' ¹⁶ Mpawo Mikkaya wakati, ''Ndabona boonse ba Izilayili balimwayikide atala azilundu mbuli imbelele zitakwe mwembeli, alimwi Jehova wakati, 'Aba tabakwe pe mwembeli. Leka muntu woonse abweede kun'anda yakwe muluumuno.'' ¹⁷ Mpawo mwaami wa Izilayili wakati kuli Jehosafati, ''Saa tendakakwambila kuti takwe noyoosinsima zili kabotu atala andime, pesi bubi luzutu ?'' ¹⁸ Eelyo Mikkaya wakati, ''Nkambo kaako moonse mulelede kumvwa ijwi lya Jehova: Ndakabona Jehova kakkede achuno chabwami, amakamu woonse aakujulu akalimvwi kululyo lwakwe akulumwensi lwakwe. ¹⁹ Jehova wakamba kuti, 'Ngwani utakakongelezye Ahabbu, mwaami waba Izilayili, kuti akayinke kuyonyonyoona ku Lamoti Giliyadi?' Umwi wakaamba eechi awumbi eechiya. ²⁰ Eelyo muuya wakaselukila kunembo akwimikila kunembo lya Jehova akwamba kuti, ''Ndiyomongelezya.''Jehova wakati kuli nguwe, ''Biyeni ?'' ²¹ Imuya wakasandula, 'Ndiyoyinka akuyooba muuya wabubeji mumilomo wabasinsimi bakwe boonse. Jehova wakasandula kuti, 'Uyomongelezya, alimwi uyozwidilila. Koya lino akuyochita oobo.' ²² Lino langa, Jehova wabika muuya wabubeji mumilomo yabaaba basinsimi bako, alimwi Jehova wazumizya lunyonyooko nkaambo kako.'' ²³ Mpawo Zedekkiya mwana mulombe wa Kkenana, wakaza, wamuuma Mikkaya kuseya akwamba kuti, ''Munzilaanzi muuya wa Jehova ngawabweza kuti uzwe kuli ndime kuti uwambule kuli nduwe ?'' ²⁴ Mikkaya wakaamba kuti, ''Bona, uyooziba kuti mubuzuba oobo, eelyo noyoochijana mumaanda amukati kuyoyuba.'' ²⁵ Mwaami wa Izilayili wakamba kuti kuli bamwi balanda, inywe nobantu mujate Mikkaya akumutola kuli Aamoni, mwendelezi wamunzi, akuli Joyasi, mwana wangu mulombe. ²⁶ Inywe nobantu muyowamba kuti kulinguwe, 'Mwaami wati: Mumubikke mwaalumi oyu muntolongo mpawo mumusanizye akasima kanini amaanzi mache biyo, kusikila ndibwede kabotu.'' ²⁷ Eelyo Mikkaya wakamba kuti, ''Naa wabweda kabotu, eelyo Jehova teensi wambuula andime.'' Mpawo wakayungizya akuti, muswilile eechi, moonse nobantu.'' ²⁸ Mpawo Ahabbu, mwaami wa Izilayili, a Jehosafati, mwaami waba Juda, bakatanta kukuyolwisya Lamoti Giliyadi. ²⁹ Mwaami wa Izilayili wakaamba kuti kuli Jehosafati, ''Ndiyolyenenia akunjila mukulwana pesi usame zisamo zyabwami. Mpawaw mwaami wa Izilayili wakalyenenia akunjila mukulwana. ³⁰ Lino mwaami wa Alamu wakalayilila bapati bankalaki zyakwe, akwamba kuti, ''Mutakalwisyi basilumamba banini naa bapati. Anukuti, mukalwisye mwaami luzutu wa Izilayili.'' ³¹ Nikwakasika muchindi eecho bapati bankalaki nibakabona Jehosafati bakamba kuti, ''Uulya ngomwaami waba Izilayili.'' Bakazyungulukila musule kuyomulwisya, pesi Jehosafati wakalila, alimwi Jehova wakamugwasya. Leza wakabajosya kuzwa kuli nguwe. ³² Nikwakaba muchiindi eecho eelyo bapati bankalaki nibakabona kuti tensi ngowakali mwaami waba Izilayili, bakabweeda musule kuzwa kukumwandilila. ³³ Pesi umwi mwalumi wakafusa buuta bwakwe chakutaziba mpawo bwamuyasa mwaami wa Izilayili akati aswananina zikwabilizyo zyakwe. Mpawo Ahabbu wakaambila mweenzyi wankalaki kuti, ''Nzemukila musule akutola kunze kwankondo, nkambo ndayaswa bubi.'' ³⁴ Inkondo yakakomenesya buzuba oobo alimwi mwaami wa Izilayili wakanyampulwa munkalaki yakwe kalangide aba Alamu kusikila goko. Kusikila chiindi izuba nilyakamba kubbila, wakafwa.