¹ Aag ayaj ngo majneaj majaw a Jonás quiaj tajcüy xeyay. ² Tamb mandeacanaag TEAT DIOS tapiüng, "Ah, TEAT" ¿Ngome ag ayaja tanapiüng wüx saliün tiül xeiíüta? Quiaj tarangás atquiaj tecuiürrás sandüy Tarsis cos lanajaw xeyay ajneaj imeaats, nadamüy mimonajneaj, nequiíy ijcüy, indiüm xeyay nipilan at ingowüüch imeaats leaw ngo majneaj lamepiüng apmerang. ³ Wüx ayaj, nganüy TEAT, satün icueaj mequiiüb xic mamb, najneaj najaw nandeow lango mind sapac. ⁴ TEAT DIOS tasaj nej, "¿Najneaj temerang quiaj mejcüy xeyay?" ⁵ Ndoj miün Jonás taw tiül cambaj tamb chetem amb nonüt ocueaj a cambaj. Quiaj tamb marang noic nden at tamb chetem teoleaj nej, majaw cuane apmarang nej a cambaj chetet tiül nden. ⁶ Nej TEAT DIOS tayac noic owil soex neyac nden tüüch matang wüx ombás Jonás atquiaj mamong ajcüy omeaats. Jonás tajneaj omeaats wüx a soex quiaj. ⁷ Raw miün tiüt nganüy Teat Dios lamayac nop ndiüc. Aag a ndiüc quiaj tamb mambiy a soex quiaj tawaag. ⁸ Tajlüy wüx taw atil nüt amb alinoic nüt, Teat Dios tüüch miün imiün nonüt majüy noic neorrar iünd. At miün, mineorrar atil nüt marrey wüx omal a Jonás nej pojniow teombás. Ndoj Jonás tandiüm mandeow. Tandeacanaag omeaats nej, "Najneajay jondot nadeow nomiün lango mind sapac." ⁹ Ndoj Teat Dios tasaj a Jonás: "¿Najneaj mejcüy wüx ombas a soex quiaj?" Jonás tasaj nej: "Najneajay najcüy xeyay, sandeow wüx sajcüy." ¹⁰ Teat Dios tasaj nej, "Ique nicuajind ngo meyaag wüx a nine soex quiaj, ngome terang najiüt wüx ngomeaach matang. Wüx noic ongwiiüts at amb alinoic ongwiiüts tandeow. ¹¹ Jo nganüy xique, ¿Ngo ndom nandiüm xeyay a Nínive, noic nadamüy cambaj, niung almajlüyiw among acoic miow nimiow nipilan leaw ngo maxeomüw majawüw ngün miac at ngün miquiamb owixaw nejiw, at aliw quiaj xeyay wacüx?"