الاصحاح 7
1
وْلاَ مَارَاكُمْشْ عَارْفِيْن يَاخُوتِيْ. بْلِيْ كُنْت نَهْدَرْ مْعَ النَاسْ لِيْ يْعَرْفُوْ مْلِيحْ الشَرِيْعَةْ. بْلِيْ البْنَادَمْ مَادَامْ حَيْ، الشَرِيْعَة هِيَ لِيْ تَحْكُمْ فِيْه.
2
مَثْلاً لَمْرَّاْ لِّيْ مَتْزَوْجَةْ مْعَ الْرَّاجْلْ، هِيَ مَرْتَبْطَة مْعَاهْ مِنْ خِلَالْ الْشَرِيْعَةْ بْدَاكْ الْرَّاجَلْ لِّيْ هُوَ حَيْ، بْصَحْ كِيْ يْمُوْتْ الْرَّاجَلْ تَتْحَرّْرْ دِيْكْ لَمْرَّا مِنْ شْرِيْعَة الْرَّاجَلْ.
3
مَعَنْتْهَا لُوْكَانْ تَتْزَوجْ رَّاجَلْ وَاحَدْ أَخُرْ وْرَّاجْلْهَا حَيْ تَتْسَمَى زَانْيَةْ. وْبَصَحْ لُوكَانْ يْمُوتْ رَاجْلْهَا هِيَ تْحَرّْرْتْ مِنْ الشَرِيْعَة وْمَتَتْسَمَاْش زَانِيَةْ لُوْكَانْ تَتْزْوجْ بْوَاحَدْ أَخُرْ.
4
5
مَلاَ يَاخُوتِيْ نْتُمْ تَانِيْ رَّاكٌمْ تْمَوْتُوْ رْوَاحْكُمْ لْلشَرِيْعَةْ بْجَسَدْ الْمَسِيْحَ بَاشْ تْكُونُوا لْهَدَاكْ لِّيْ حْيَا مْنْ بِيْنْ لْمُوتَا، وْنْعِيْشُو حَقْ الله. حْنَا كِيْ كُنَا فْي الجَسَدْ كَانَتْ الشَهْوَةْ تَاعْنَا بْالخَطِيَةْ لِّيْ نْعَرْفُوهَا بْالشَرِيْعَة تَخْدَمْ فِيْنَا بَاشْ تْكُونْ الخَلْصَةْ تَاعْنَا فْي التَالِيْ هُوَ المُوْتْ.
6
ودَرْوَكْ كِيْ تْحَرَّرْنَا مَنْ الشَرِيْعَةْ وْمَاتْ فِيْنَا هَدَاكْ القِيْدْ وْتْكَسَرّْ، وَوْلِيْنَا نْعَبْدُو الله بْالرُّوْحْ وْمَاشِيْ غَيْر بَالْكْلاَمْ.
7
إِمَلَا شَا نْڤُولْ؟ زَعْمَة الشَرِيْعَة هِيَ خْطِيَةْ؟ لاَلَا! بْصَحْ اَنَا عْرَفْتْ الخَطِيَة بْالشَرِيْعَة. لُوْكَانْ مَاشِيْ لَوْصِيَةْ لِّي ڤالَتْلِيِ: «لاَ تَشْتِهِ!» مَاكُنْتْش غَادِيْ نَعْرَفْ شَا هِيَ الشْهْوَةْ.
8
وْتَانِيْ الخَطِيَةْ لّْيْ عَرّْفْنَاهَا بْالشَرِيْعَةْ نَلْڤَاوْهَا فِيْ كُلْ شَهْوَةْ، وْمَنْ غِيْرْ لَّوْصِيَةْ مَنْعَرْفُوشْ الْخَطِيَةْ.
9
وْأَنَا كُنْتْ زْمَانْ نْعِيْش مَنْ غِيْر الشَرِيْعَةْ، بْصَحْ كِيْ جَاتْ الشَرِيْعَةْ عْرَفْتْ وْعَشْتْ مِيَتْ فِيْ لْخَطِيَةْ،
10
وْهَكَا بَانَتْ الشَرِيْعَةْ لّْيْ فِيْهَا وْصِيَةْ نْتَاعْ لَحْيَاةْ نَلْقَاوْ فِيْهَا تَانِيْ وْصِيَةْ لّْمُوْتْ.
11
عْلَخَاطَرْ الْخَطِيَةْ عَاوْنَتْ رُّوْحْهَا بْلَوْصِيَةْ، وْسَكْنَتْ فِيَا وْدَاتْنِيْ لَلْمُوتْ.
12
مَعْنْتْهَا الشَرِيْعَةْ مْقَدْسَةْ، وْلَوْصِيَةْ تَانِيْ لِّيْ فِيْهَاْ مْقَدْسَةْ وْمْلِيْحَةْ وْفِيْهَا الْحَقْ.
13
زَعْمَا وْلاَ لِّيْ يَصْلَحْ لِّيْ يْمَوَتْ؟حَشَا! بَرّْكْ الْخَطِيَةْ بَاشْ تْبَانْ بْلِيْ هِيَ خَطِيَةْ وْتَدِيْ لَلْمُوتْ وْهَادْ الشِيْ نْعَرّْفَهْ بْالشَرِيعَةْ الصَالْحَةْ، وْلِّيْ بِهَا نَعْرَّفْ بْلِيْ الْخَطِيَةْ تَمَوَتْ لَبْنَادَمْ.
14
حْنَا رَانَا عَارْفِيْنْ بَلِيْ الْشَرِيْعَةْ هِيَ رُّوْحِيَةْ، وْلْجَسَدْ تَاعِيْ تَنْبَاعْ لَلْخَطِيَةْ.
15
عْلَخَاطَرْ مَانَعْرَفْشْ شَا رَّانِيْ نْدِيْرَهْ، مَارَانِيْشْ نْدِيْرْ لِيْ نَبْغِيْهْ، بْصَحْ رَّانِيْ نْدِيْرْ لِيْ مَانَبْغِيْهْشْ.
16
إِمَلَا إِلَا رَّانِيْ نْدِيْرْ لِمْانَبْغِيْهْشْ، هْنَا نَسْتَعْرَفْ بْلِيْ الْشَرِيْعَةْ مْلِيْحَةْ.
17
وْدَرّْوَكْ مَارَانِيْشْ نْدِيْرَهْ أَنَا، بْصَحْ الْخَطِيَةْ لِيْ سَاكْنَةْ فِيَا هِيَ لِتْدِيْرَهْ.
18
وْرَّانِيْ عَارَفْ بْلِيْ مَكَانْشْ حَاجَةْ مْلِيْحَةْ لِّيْ تَسْكُنْ فِي الْجَسَدْ نْتَاعِيْ. عْلَخَاطَرْ عَنْدِيْ الإِرَادَةْ بَاشْ نَخْدَمْ، بَصَحْ بَاشْ نْدِيْرّْ لِّيْ مْلِيْحْ مَنَقْدَرّْشْ.
19
عْلَخَاطَرْ مَارَانِيْشْ نْدِيْرّْ شْغَلْ لَمْلِيْحْ ليْ نَبْغِيْه، بْصَحْ رَّانِيْ نْدِيْرْ دَاكْ الشَرّْ لِمَانَبْغِيْهْشْ.
20
مَعَنْتْهَا إِلَا كُنْتْ نْدِيْرْ لِمَانَبْغِيْهْشْ، مَاشِيْ أَنَا لِرَّانِيْ نْدِيْرْ فِيْهْ، بْصَحْ لْخَطِيَةْ لِسَاكْنَةْ فِيَاَ.
21
مَعَنْتْهَا نَلْڤَى رُّوحِيْ بْلِيْ كِيْ نَبْغِيْ نْدِيْرْ لْمْلِيْحْ عْلَى حْسَابْ الشَرِيْعَةْ، يْجِيْوْ فِيْ بَالِيْ الْصْوَالَحْ لِيْ مُشْ مْلَاحْ.
22
إِمَلَا حْتَى وْإِلا رَانِيْ بْنَادَمْ نَخْدَمْ لْرُّوحِيْ، لاَزَمْ نَفْرَّحْ بْشَرِيْعَةْ الله.
23
بْصَحْ دَرْوَكْ نْشُوفْ شْرِيْعَةْ وَاحْدَةْ اخْرَّ الْجَسَدْ نْتَاعِيْ يْحَارْبْ الْشَرِيْعَةْ لِيْ فِيْ الْفَكْرْ نْتَاعِيْ، وْيْخَلِيْنِيْ عَبْدْ بَاشْ نْدِيْرْ الْخَطِيَةْ لِيْ يَبْغِيْهَا الْجَسَدْ نْتَاعِيْ.
24
يَاحَاوْجِيْ! أَنَا لَبْنَادَمْ الْشَرِيْر! شْكُوْنْ لِغَادِيْ يْسَلَكْنِيْ مَنْ هَادْ لْجَثَّةْ نْتَاعْ لْمُوْتْ؟
25
نْشْكُرّْ الله بْرَّبْنَا يَسُوْع لْمَسِيْحْ! خَاطَرْ أَنَا بْتَخْمَامِيْ نَخْدَمْ شْرِيْعَةْ الله، بْصَحْ بْالْجَسَدْ نَخْدْمْ شَرِيْعَةْ لْخَطِيَةْ.