الاصحاح 16
1
غاَدِي نَوصِيكُم عْلَى خْتْنَا فِيْبِي، لِهِيَ تَخْدَمْ فْلْكَنِيسَة تَاع’ كَنْخَرِيَا،
2
بَاش تْرَحْبُو بِهَا وْتْقَبْلُوهَا بِيْنَاتْكُمْ كِيْمَا لاَزَمْ، وْعَاوْنُوهَا فْلِيْ تَحْتَاجَهْ، عْلَخاَطَرْ هِيَ تَعَاوْن بْزَافْ النَاسْ وْعَاوْنْتْنِيْ أَنَا تَانِيْ.
3
بْلْغُوْ سْلَامِيْ لْبْرِيسْكِلَا وْأَكِيْلَا لِيْعَوْنُوا فِيَا فِيْ لْخِدْمَةْ لْمَجْد لْمَسِيْحْ،
4
لِّيْ خَطْرُّوْ بَحْيَاتْهُمْ عْلَجَالْ حْيَاتِيْ، وْمَارَانِيْشْ وَحْدِيْ بَرّْكْ لِنَّشْكَرّْ فِيْهُمْ، بَصَحْ ڤَاعْ المُؤْمِنِيْنْ،
5
وْتَانِيْ عْلَى لْجْمَاعَةْ لِيْ فِيْ دَارّْهُمْ. سَلْمُوْا عْلَى أَبَيْنِتُوسَ لِّيْ نْعَزَّهْ، لِّيْ هُوَ لْلْوَّلْ لِيْ أَمَنْ بْالمَسِيْح فِيْ أَخَائِيَةَ.
6
سْلْمُوْا تَانِيْ عْلَى مَرْيَمْ لِّيْ تَعْبَتْ بْزَافْ عْلَّى جَالْنَا.
7
سَلِّمُوا عَلَى أَنْدَرُونِكُوسَ وَيُونِيَاسَ نْسَابِي، لِّيْ كَانُوا مْحَابْسِيَة مْعَايَا، وْهُمَا مَعْرُوفِيْن عَنْد الرُسُلْ، وْلِي قَبْلُو لْمَسِيْحْ قْبْلِيْ.
8
سْلْمُوْا عْلَى أَمْبِلِيَاسَ حْبِيْبِي عَنْدْ الله.
9
سْلْمُوْا عْلَى أُورْبَانُوسَ لِّيِ يِسَاعَدْ فِيْنَا لِيَخْدْمْ مْعَانَا لْمَجْدْ لْمَسِيْحْ، وْعْلَى إِسْتَاخِيسَ حَبِيبِي.
10
سْلْمُوْا عْلَى أَبَلِّسَ لي هُوَ أَمِينْ فِي الْمَسِيحِ. سْلْمُوا عْلَى العَاْيلَة نْتَاعْ أَرِسْتُوبُولُوسَ.
11
سْلْمُوْا عْلَى هِيرُودِيُونَ نْسِيبِي. سْلمُوْا عْلَى النَاسْ لِّيْ مَنْ عَايْلَةْ نَرْكِيسُّوسَ لِيْحَبُوْا لْمَسِيْحْ.
12
سْلْمُوْا عْلَى تَرِيفَيْنَا لِّيْ تَبْعَتْ لْمَسِيْحْ مْعَ تَرِيفُوسَا هِيَ تَانِيْ. سَلْمُوْا عْلَى المَحْبُوبَةْ بَرْسِيْسَ لِّيْ تَعْبَتْ بْزَافْ فَيْ لْمَسِيْحْ.
13
سَلْمُوْا عْلَى المُخْتَارْ لِّيِ فِي لْمَسِيْحْ رُوفُسَ وْعَلَى مَّه تَانِيْ لِهْيَ تَانِيْ مَّا.
14
سْلْمُوا عْلَى أَسِينْكِرِيتُسَ، فِلِيغُونَ، هَرْمَاسَ، بَتْرُوبَاسَ، وَهَرْمِيسَ، وَعْلَى.لْخُوْتْ لِّيْ مْعَاهٌمْ.
15
سْلْمُوا عْلَى فِيلُولُوغُسَ وَجُولِيَا، وَنِيرِيُوسَ وْخْتَهْ، وَأُولُمْبَاسَ، وَعْلَى ڤَاعْ لْمُومْنِيْنْ لِّيْ مْعَاهُمْ.
16
سْلْمُوْا عْلَى بَعْضْكُمْ البَعْض بْسْلَامْ نْقِي. ڤَاعْ كَنَائِسْ لْمَسِيْح هْنَا تْسَلَمْ عْلِيْكُمْ.
17
وْنَطْلَبْ مَنْكُمْ يَاخُوْتِيْ بَاشْ تْدِيْرُو بَالْكُمْ عْلَى النَاسْ لِّيْ يْزَرْعُوْ الْفَتْنَة وْيْحَبُوْ يْقَسْمُوْ، وْيْخَالْفُوْ لِّيْ جَا فِي الإِنْجِيْلْ، هَادُوْكْ بَعْدُوا عْلِيهُمْ.
18
عْلَخَاطَرّْ الْنَاسْ لِكِيْمَا هَادُوْ مَايْمَجْدُوشْ لْمَسِيْحْ، بْصَحْ يْحَوْسُوْ يْعَمْرُو كْرُوْشْهُمْ. يْسْتَخْدْمُوْ لَكْلَامْ لَمْزَوقْ وْلَمْلِيْحْ وْيْخَدْعُو فِي النَاسْ لِعَنْدَهَا النِيَّة.
19
وْالنَاسْ ڤَاعْ سَمْعَتْ عْلَى الطَاعَةْ تَاعْكُمْ، وَأَنَا رَاكُمْ فَرَّحْتُونِيْ، وْبَاغِيْ تَانِيْ مَنْكُمْ تْوُلُوْ فَاهْمِيْنْ لْلْخِيْر وْبْعَادْ عْلَى الشَرّْ.
20
والله لِّيِ يِمَدْ لَهْنَا غَادِيْ يَعْفَسْ وْيَسْحَق ْالشِيْطَانْ بَالخَفْ تَحْتْ رْجْلِيْكُمْ. نِعْمَةْ رَّبْنَا يَسُوْعْ لْمَسِيْحْ مْعَاكُمْ ڤَاعْ. أَمِيْن.
21
يْسلَمْ عْلِيْكُمْ تِيمُوثَاوُسُ لِّيْ يَخْدَمْ مْعَايَا، وْتَانِيْ لُوكِيُوسُ وَيَاسُونُ وَسُوسِيبَاتْرُسُ نْسَابِيْ.
22
أنا تَرْتِيُوسُ لي كتبت هاد لبرية، نسلم عليكم تاني بغسم المسيح.
23
يْسْلَمْ عْلِيْكُمْ غَايُسُ لِيْ ضْيْفْنِيْ عَنْدَهْ وْرَحَبْ عَنْدَهْ بْڤَاعْ الكَنِيْسَةْ. يْسْلَمْ عْلِيْكُمْ أَرَاسْتُسُ لِّيْ يْشَدْ صَنْدُوقْ المَالْ تَاعْ لّْمْدِيْنَةْ، وْخُونَا كَوَارْتُسُ.
24
نِعْمَةْ رَّبْنَا يَسُوْعْ لْمَسِيْحْ مْعَاكُمْ ڤَاعْ. أَمِيْن.
25
وْالله لِيْ قَادَرْ يْثَبْتْكُمْ، عْلَى حْسَابْ الإِنْجِيْلْ وْالتَبْشِيرَةْ تَاعْ يَسُوعْ لْمَسِيْحْ، عْلَىْ حْسَابْ السِرْ لِيْ تَعْلَنْ وْكَانْ زْمَانْ مْخَبِيْ،
26
بْصَحْ دَرَّوَكْ بَانْ، وْسَمْعُوا بِيْه ڤَاعْ لَجْنَاسْ بْكْتٌبْ الأَنْبِيَاءْ عْلَىْ حْسَابْ كْلَامْ الله، بَاشْ يْطِيْعُوا وْيْأَمْنُوا بِهْ.
27
الحِكْمَةْ لله وَحْدَهْ، وْلْيَسُوعْ لْمَسِيْحْ لِيْهْ المَّجْدْ لْلْبْدَا. أَمِيْنْ.