الاصحاح 15
1
إِمَلَا إِيْلِيقَلْنَا حْنَا لّْكْبَّارْ فِيْ الإِيْمَانْ نْسَايْسَو خُوْتْنَا لِّيْ ضْعَافْ فْي الإِيْمَانْ، وْمَنْشُوفُوشْ غِيْرّْ صْوَالْحْنَا.
2
إِيْلِيْقْ كُلْ وَاحَدْ فِيْنَا إِعَاوَنْ خُوْه فِي لْخِيْر بَاشْ يْتْشْبَعْ وْيَتْقَوَى فِى الإِيْمَانْ.
3
عْلَخَاطَرْ المَسِيْح مَاجَاشْ يَرْضِي صْوَالْحَهْ، بْصَحْ كِيْمَا هُوَ مَكْتُوبْ: «دُوكْ لشْتَايْم لِّيْ عَيْرُوك بِهَا طَاحُوْ عْلِيَا».
4
عْلَخَاطَرْ ڤَاعْ دَاكْ لِيْ تَكْتَبْ مَنْقْبْلْ تَكْتَبْ بَاشْ نْثَبْتُو وْنْتْقَوَاوْ فِي كَلْمَةْ الله، وْيْكُونْ لِيْنَا رَجَاءْ.
5
وْالله مُولْ الصْبَرّْ هُوَ لِّي يْشْجَعْكُمْ بَاشْ تَتْفَهْمُو وْتْخَمُو تَخْمَامْ وَاحَدْ بِيْنَاتْكُمْ عْلَى حْسَابْ كْلَامْ المَسِيْحْ،
6
بَاشْ تْعْلُوْا وْتْمَجْدُوا الله بُوْ رَّبْنَا يَسُوعْ المَسِيْح بْقَلْب وَاحَدْ وْفَمْ وَاحَدْ.
7
عْلَى هَادْ الشِيْ قْبْلُوا بَعْضِيَاتْكُمْ كِيْمَا قَبْلنَا المَسِيْحْ تَانِيْ، عْلَجَالْ مَجْد الله.
8
وَنْڤُولْ: لْمَسِيْحْ وْلَّاَ خْدَامْ لْمَخْتُونِيْنْ، بَاشْ يْبَيْن حَقْ الله، وْيْشَدْ فَي لْوَعْد لِّي تْمَدْ لّْلأَبَاءْ الَلَوْلِيْنْ.
9
وْلَجْنَاسْ لَخْرِينْ حَمْدُوا الله عْلَى جَالْ الرَحْمَةْ نْتَاعَهْ كِيْمَا هُوَ مَكْتُوبْ: «عْلَجَالْ دَكْ الشِيْ نْحَمْدَكْ بِيْنْ لَجْنَاسْ، وْلإِسْمَكْ نْغَنْيْ»
10
وْيْزِيْدْ يْڤُولْ: «يَالَجْنَاسْ سَبْحُوْا الله مْعَ شَعْبَهْ»
11
وْتَانِيْ: «سَبْحُوا الله يَاڤَاعْ لَجْنَاسْ، وْمَدْحُوهْ يَاڤَاعْ البَنِيَادْمِيينْ».
12
وْإِشَعْيَاءْ ڤَالْ تَانِيْ: «غَادِيْ لْعَرْڤْ لِيَخْرَجْ مَنْ يَسَى هُوَ لِيَتْسَلَطْ عْلَى لَجْنَاسْ، وَيْتَكْلُو عْلِيه لَجْنَاسْ».
13
وَنْصَلِيْ لِلَّه مُوْلْ الرَجَاءْ بَاشْ يْمَدْلْكُمْ لْفَرْحَةْ وْلَهْنَا فْي الِإيْمَاْن، وْبَاشْ يْزِيْد فِيْكُمْ الْرَّجَاءْ بْقَوَةْ الرُّوحْ القُدُسْ.
14
وَأَنَا مَنْ جِهْتِي يَاخُوتُي رَانِيْ مَتْيَقْن بْلِي تْحْبُوْ بْزَافْ تْدِيْرُو الخِيْر، وْفَاهْمِيْن وْقَارّْيِيْنْ، وْرَّاكُمْ قَادْرِيْن تَنْصْحُوْ بَعْضْكُمْ لْبَعْضْ.
15
عْلَى هَادْ الشِيْ كْتَبْتْ لِيْكُمْ هَادْ لَبْرِّيَة حْتَى وِإِلاَ كُنْت شْوِيَة قَاسِيْ بَاشْ نْفْكَرّْكُمْ يَاخُوْتِيْ، وْ هَدَا عْلَى حْسَابْ النِعْمَةْ لِتَعْطَاتْ لِيْ مَنْ عَنْدْ الله،
16
بَاشْ نْكُونْ خَادْمْ كِيْمَا الكَهَنَةْ لْسِيْدْنَا يَسُوعْ لْمَسِيْح بِيْنْ البَرَّانِيَةْ، بَاشْ نْخْبَرّْ بْإِنْجِيْل الله وْيْكُونُوا شْغُلْ ذْبِيْحَةْ مْقَدْسَة لله بْالرُّوحْ القُدُسْ.
17
يْشَرَّفْنِيْ أَنِي نْكُونْ خَاْدْمْ لْلْمَسِيْحْ فِيْ إِنْجِيْلْ الله.
18
عَلَخَاطَرْ نْحَبْ بَرّْكْ نَحْكِيْ عْلَى لِي دَرَهْ لْمَسِيْح بِيَا بَاشْ البَرَّانِيَةْ يْجُوْ وْيْقَبْلُو الإِنْجِيْلْ، وَهَادْ الشِيْ بْالكْلاَمْ وْالفِعْلْ،
19
بْمُعْجِزَاتْ وْعَجَايْبْ كْبَارْ لِّي خْدَمْهُمْ رُّوحْ الله، كِيْ خْبَرْت بْكْلاَمْ الله مَنْ جْوَايَهْ أُوْرّْشَلِيمْ حْتَى إِللِّيرِيكُونَ.
20
وْكُنْت دِيْمَا بَاغِيْ نْبَشَرّْ فِي بْلاَدْ لِمَازَالَتْ مَاسَمْعَتْشْ بْالْمَسِيْحْ، بَاشْ مَانَبْنِيشْ عْلَى سَاسْ وَاحَدْ أْخُرّْ.
21
بْصَحْ كِيْمَا هُوَ مَكْتُوبْ: «لِيْ مَاتَخَبَرْلْهُمْشْ غَادِيْ يْشُوْفُو، وْلِيْ مَاسَمْعُوشْ غَادِيْ يْفَهْمُو».
22
عْلَى هَاذِيْ كَانَتْ شْغَالاَت لِيْ مَاخَلاَوْنِيْشْ بَاشْ نْجِيْ عَنْدْكُمْ.
23
بْصَحْ دَرّْوَكْ وْأَنَا فِي هَادْ لَجْوَايَهْ مَا نْطِيڤْشْ نَخْدَمْ، هَدِي عْوَامْ وَأَنَا بَاغِيْ نْجِيْ عَنْدْكُمْ،
24
غَادِيْ كِيْ نْرُّوحْ لْسْبَانْيَا نْفُوتْ لْعَنْدكُمْ. عْلَخَاطَرْ بَاغِيْ نْشُوْفْكُمْ وْنْجَمَعْ شْوِيَةْ مْعَاكُمْ، وْتَانِيْ تْسَهْلُوْ عْلِيَا الطْرِيْڤْ.
25
بْصَحْ أَنَا دَرّْوَكْ رَانِيْ غَادِيْ لْأُوْرْشَلِيْمْ بَاشْ نْعَاوَنْ الْمُوْمْنِيْنْ تْمَكْ،
26
عْلَخَاطَرْ نَاسْ تَاعْ مَكِدُونِيَّةَ وَأَخَائِيَةَ بْغَاوْ يْعَوْنُوْ الزَوَالِيَةْ فِي أُوْرْشَلِيْمْ وْجَمْعُوْ لْهُمْ شَا يْسَحْقُوْ.
27
هُمْ لِيْ بْغَاوْ يْعَاْوْنُو، وْحَسُوْا بْلِيْ لاَزَمْ عْلِيْهُمْ. عْلَخَاطَرْ المُوْمْنِيْن لِّيْ مَنْ لِيْهُودْ مَدُوْ فْي الرُّوْحْ لْڤَاعْ لَجْنَاسْ، عْلَبِيْهَا حَسُوْا بْلِيْ لاَزَمْ يْعَاوْنُهُمْ فِي لِّيْ يَحْتَاجُوهْ.
28
وْكِيْ نَكْمَلْ هَادْ الزْيَارَةْ لأُوْرْشَلِيْمْ نْفُوتْ عَنْدْكُمْ فِيْ طْرِيْڤِي لَسْبَانْيَا.
29
وَرَانِيْ عَارَفْ بَلِيْ إِلاَ رَانِيْ جَايْ عَنْدْكُمْ، نْجِيْ مْعَمَرْ بْالْبَرَّكَاتْ لِعْطَاهُمْ لِيْ الْمَسِيْح.
30
وْبَاغِيْ نَطْلَبْ مَنْكُمْ يَاخُوْتِيْ، بْرَبْنَا يَسُوعْ المَسِيْحْ وْالمَحَبَةْ نْتَاعْ الْرُّوحْ، بَاشْ تْجَاهْدُوْا مْعَايَا فْي الصْلَاةْ لْرَّبِيْ،
31
بَاشْ نْسْلَكْ النَاسْ لِمَرَاهُمْشْ مُومْنِيْن فْي الْيَهُودِيَةْ، وْبَاشْ تْكُوْنْ خْدَمْتِيْ فْي أُورْشَلِيْمْ مَقْبُولَة عَنْدْ الْمُومْنِيْن،
32
حْتَىْ نْجِيْ عَنْدكُمْ إِلاَ بْغَى رَّبِيْ، وْنْرَيَحْ شْوِيَةْ مْعَكُمْ.
33
رّْبْ لَهْنَا يْكُونْ مْعَكُمْ. أَمِيْنْ