الاصحاح 12
1
يَاخُوْتِيْ: بْرَّحْمَةْ رَّبِيْ نَطْلَبْ مَنْكُمْ تْمْدُوْ رْوَاحْكُمْ ذْبِيْحَةْ حَيَةْ مْقَدْسَةْ لِتَعْجَبْ الله، بْالْعِبَادَةْ تَاعْكُمْ.
2
وْمَتَتْشَبْهُوْشْ لْلْنَاسْ الْعَالَمْ، بْصَحْ خَلُوْ حْيَاُتْكُمْ تَتْبَدَلْ كِيْ يَتْبَدَلْ تَخْمَامْكُمْ، وْتْعَرْفُوْا شَا هِيَ مَشِيْئَةْ الله: لِهِيَ صَالْحَةْ وْكَامْلَة لِتَرْضِيْهْ.
3
وَأَنَا بِالْنِعْمَةْ لِعْطَهَا لِّيْ الله نْڤُولْ لْكُلْ وَاحَدْ لِيْ رَاهْ بِيْنَاتْكُمْ: مَاتْدِيْرُش فِيْ بَالَكْ بَلِيْ نْتَا خِيْرْ مْلَخْرِيْنْ، بْصَحْ كُنْ مْتْوَضَعْ ، عْلَى ْحْسَابْ كِيِمَا الله عْطَى قِيْسْ مَنْ الْإِيْمَانْ لْكُلْ وَاحَدْ.
4
عْلَخاَطَرْ كِيْمَا فْي الْجَسَدْ لِعَنْدَهْ بْزَافْ طْرَافْ، بْصَحْ كُلْ طَرْفْ عَنْدَهْ خَدْمَةْ وَاْحْدَةْ يْدِيْرْهَا،
5
هَكَا تَانِيْ حْنَا لِرَّانَا بْزَافْ: ڤَاعْ كِيْمَا رَّانَا حْنَا جَسَدْ تَاعْ لْمَسِيْح، وْبَزَافْ طْرَافْ لْبَعْضِيَاتْنَا، وْكُلْ وَاحَدْ يَخْدَمْ لَلْتَالِيْ.
6
وْتَانِيْ عَنْدْنَا مَوَاهِبْ مَخْتَلْفَةْ عْلَى حْسَابْ الْنِعْمَةْ لِعْطَهَا رَّبِيْ لْكُلْ وَاحَدْ فِيْنَا: لِيْتْنْبَأْ يْكُوْنْ عْلَى حْسَابْ الْإِيْمَانْ،
7
يْمَدْ مَوْهِبَةْ الْخِدْمَةْ لَلِيْ يَخْدَمْ، وْلِيْعَلَمْ بَاشْ يْعَلَمْ،
8
وْلِيْ يْشَجَعْ يْمَدْلَهْ مَوهِبَةْ فْيْ الْتَشْجِيْعْ، وْلِّيْ يْعَاوَنْ يْوَلِيْ كْرِيْمْ، وْلِعَنْدَهْ مَوْهِبَةْ الْتَسْيِيْرْ يْدَبَرّْ مْلِيْحْ، وْلِعَنْدَهْ مَوْهِبَةْ الْرَحْمَةْ يْدِيْرْ كُلْشِيْ بْالْفَرْحَةْ.
9
لْمَحَبَةْ لاَزَمْ تْكُوْنْ مَنْ غِيْر نِفَاقْ. لَازَمْ تْكَرْهُوْ الْشَّرْ وْتْحَبُوْ الْخِيْر.
10
وْتْعَاوْنُوْا بِيْنَاتْكُمْ بْالَمَحَبَةْ تَاعْ لْخُوتْ، وْكُلْ وَاحَدْ يْكُوْنْ كْرِيْمْ لْخُوهْ.
11
إِجْتَهْدُوْ وْمَاتَتْكَسْلُوْشْ، وْعَبْدُوْ الله بْلَحْرَّارَة،
12
وْكُوْنُوْا فَرْحَانِيْن فِيْ الْرَجَاءْ، وْصَبْرُوْا كِيْ يْكُوْنْ عْلِيْكُمْ الْضِيْقْ، وْكُوْنُوا دِيْمَا فْي صْلَاْة،
13
تْعَاوْنُوْ بِيْنَاتْكُمْ إِلَا كَانْ وَاحَدْ مَخْصُوْصْ، وْرَّحْبُوْ بْالْنَاسْ الْبَرَانِيَةْ.
14
بَارْكُوْا لِّيْ يْضَطَهْدُوْ فِيْكُمْ. بَارْكُوْا وْمَاتْلَعْنُوْشْ.
15
فَرْحُوْا مْعَ لِّيْ يْفَرْحٌوْا وْبْكُوْا مْعَ لِّيْ يَبْكُوْا.
16
عِيْشُوْا مْعَ بَعْضْ كِيْ عَايْلَةْ، مَاتَتْكَبْرُّوشْ وْكُوْنُوْا دِيْمَا مَتْوَضْعِيْنْ لْلْغِيْرْ. خْلِيْوْ الْنِفَاقْ بْعِيْد عْلِيْكُمْ.
17
مَاتْرَدُوْشْ الْشَرْ بْالْشَرْ. وْدِيْرُوْا الْخِيْرْ ڤُدَامْ ڤَاعْ الْنَاسْ.
18
وْإِلَا كُنْتُوْا قَادْرِيْنْ سَلْمُوْ عْلَى ڤَاْعْ اْلْنَاسْ.
19
مَاتَنْتَقْمُوْشْ يَاخُوْتِيْ، وْمَرَاهْشْ عِيْبْ كِيْ يَزْعَفْ الْبْنَادَمْ، عْلَخاَطَرْ مَكْتُوبْ: «أَنَا نَنْتَقَمْ وْأَنَا لِيْ نْحَاسَبْ يْڤُوْلْ الله.
20
إِلَا لَعْدُوْ تَاعَكْ جَاعْ وْكْلَهْ. وْإِلَا عْطَشْ مْدْلَهْ يْشْرَبْ. عْلَخَاطَرْ إِلَا دَرْتْ كِيْمَاهَاكْ، كَلِيْ رَاكْ دَايَرْ جْمَرّْ فُوِڤْ رَاسَهْ».
21
مَاتْخَلِيْشْ الْشَرْ يْغَلْبَكْ، بْصَحْ غْلَبْ الْشَّرْ بْالْخِيْرْ.