الاصحاح 10
1
يَاخُوتِيْ، فَرّحَةْ ڤَلْبِيْ وْالطَلْبَة لِيْ نَطْلبْهَا مَنْ عَنْد الله هِيَ لَسْلَاكْ نْتَاعْ إِسْرَائِيْل.
2
عْلَخَاطَرْ نَشْهَدْ بْلِي عَنْدْهُمْ غِيْرَة لله، بْصَحْ مَاشِيْ عْلَى حْسَابْ المَعْرِفَةْ.
3
هُمْ مَايْعَرّْفُوشْ حَقْ الله، وْحَابِيْنْ يْثَبْتُوْ فِيْ الْحَقْ لِّيْ يْشُفُوْهْ هُمَا مَنْ غِيْرْ حَقْ الله.
4
عْلَخَاطَرْ حَقْ الْشَرِيْعَةْ هُوَ: الْمَسِيْحْ حَقَ لڤَاعْ لِّيْ يْأَمْنُوْا بِهْ.
5
وْمُوسَىْ كْتَبْ عْلَىْ الْحَقْ لِيْجِيْ مَنْ الْشَرِيْعَةْ وْڤَالْ: «الْإِنْسَانْ لِّيْ يْطَبَقْ الْشَرِيْعَةْ، يْعِيْشْ بِهَا».
6
بْصَحْ الْحَقْ لِيْ يْجِيْ مَنْ الْإِيْمَانْ يْڤُوْلْ: «مَاتْڤُوْلْشْ فِيْ قَلْبَكْ: شْكُوْنْ يَطْلَعْ لَلْسْمَا؟» مَعَنْتِهَا يْهَّوَدْ الْمَسِيْحْ،
7
«وْلَاْ: شْكُونْ يْهَّوَدْ لْقْبُوْرْ الْمُوْتَ؟» مَعَنْتْهَا بَاهْ يَطْلَعْ الْمَسِيْحْ مَنْ الْمُوْتْ.
8
بْصَحْ وَاشْ يْڤُولْ؟ «كْلَاْمْ الله ڤْرِيْب لِيْكْ، فِيْ فَمَكْ وْفِيْ ڤَلْبَكْ» أَيْ كلَمْةَ الْإِيْمَانْ لِّيْ نْخَبْرُو بِهَا؟
9
عْلَخَاطَرْ إِلَا إِعْتَرَفْتْ بْفَمَكْ بْالْرَّبْ يَسُوعْ، وْأَمَنْتْ بْلِيْ الله حْيَاهْ مَنْ بِيْنْ لْمُوْتَ فِيْ ڤَلْبَكْ، سْلَكْتْ.
10
اْلْڤَلْبْ يْأَمَنْ بْالْحَقْ، وْالْفَّمْ يَعْتَرَفْ بْالْحَقْ لْلَسْلَاكْ.
11
عْلَخاَطَرْ الْكْتَابْ يْڤُوْلْ: « ڤَاعْ لِيْأَمَنْ بِيْهْ مَرَاحْشْ يَنْدَمْ».
12
عْلَىْ هَادْ الْشِيْ مَاكَاشْ فَرْقْ بِيْنْ يْهُوْدِيْ وْيُوْنَانِيْ، عْلَخَاطَرْ كَايَنْ رَّبْ وَاحَدْ لْڤَاعْ الْنَاسْ، يَسْمَعْ لْڤَاعْ لِّيْ يَدْعِيْوْ لَهْ.
13
عْلَخَاطَرْ «ڤَاعْ لِّيْ يَدْعُوْ بْإِسْمْ الْرَّبْ يْسْلَكْ».
14
وْكِيْفَاشْ يَدْعِيْوْ بْاْلِّيْ مَأْمْنُوْشْ بِهْ؟ وْكِيْفَاشْ يْأَمْنُوْ إِلْا مَاسَمْعُوْشْ بِهْ؟ وْكِيْفَاشْ يْسَمْعُوْ إِلَا مْكَاشْ لِيَخْبَرْ لْهُمْ؟
15
وَشْكُوْنْ يْخَبَرّْ إِلَا مْكَاشْ لِيْ يَرْسَلْ؟ كِيْمَا هُوَ مَكْتُوبْ: «أَشْحَالْ نَبْغِيْ رْجْلِيْنْ الْنَاسْ لِّيْ يْخَبْرُوْا بْلَّهْنَا، وْلِيْخَبْرُوْا بْاْلْخِيْرْ».
16
بْصَحْ مَاشِيْ ڤَاعْ الْنَاسْ طَاعُوْا اْلِإِنْجِيْلْ، عْلَخَاطَرْ إِشَعْيَاءْ يْڤُولْ: «يَارَّبْ شْكُونْ يَأَمَنْ لِّيْ خْبَرْنَا بِهْ؟»
17
إِمَلَا الْإِيْمَانْ يْجِيْ بَالِيْ يَتَخْبَرّْ، وْلِيْ يْتَخْبَرّْ مَنْ كْلَامْ الله.
18
بْصَحْ نْڤُوْلْ: زَعْمَا مَازَالْ مَاسَمْعُوشْ؟ لَالَا! «بْصَحْ لْجْمِيْعْ الْبُلْدَانْ خْرَجْ صُوْتْهُمْ، وْلْڤَاعْ الْعَالَمْ وْصَلْ كْلَامْهُمْ».
19
وَنْزِيْدْ نْڤُولْ: يَادْرَا إِسْرَائِيْلْ مَاعْلَبَالَهْشْ؟ فْلَوَلْ مُوْسَى يْڤُولْ: «نْخَلِيْكُمْ تْغِيْرُوْ مَنْ لِّيْ يْشَبَهْ شِيْ شَعْبْ، بْشَعْبْ مَايَسْوَاشْ نْخَلِيْ فِيْكُمْ غِيْرَةْ».
20
وْيْزِيْدْ إِشَعْيَاءْ فِيْ كْلَامَهْ وْيْڤُولْ: «الْنَاسْ لِّيْ مَاحَوسُوْشْ عْلِيَا لْڤَاْوْنِيْ، وَوْلِيْتْ بَايَنْ لّْنَاسْ لِمَسَقْسَاوْشْ عْلِيَا».
21
وَمَنْ جِهَةْ بَنِيْ إِسْرَائِيْلْ يْزِيْدْ يْڤُولْ: « ڤَاعْ الْنْهَارْ وْأَنَا نْمَدْ يْدِيْ بَاشْ نْعَاوَنْ شَعْبْ لِّيْ رَاسَهْ خْشِيْنْ وْيْعَانَدْ».