الفصل 4
1
يَا خُوتِي الَعْزَازْ، وَالَلِّي تْوَحَشَتْ نْشُوفْهُمْ، نْتُمَا الْفَرْحَة تَاعِي وْتَاجْ رَاسِي،
2
قَعْدُو ثَابْتِينْ فَإِيمَانْكُمْ بَالَرَّبْ. رَانِي نَطْلَبْ مَنْ أَفْودِيَة سَنْتِيخِي بَاشْ يْكُونُو مَتَّاحْدِينْ فَالَرَّبْ.
3
وْنَطْلَبْ مَنَكْ حَتَّى نْتَ، شْرِيكِي الَلِّي نْثِيقْ فِيهْ بَزَّافْ، بَاشْ تْعَاوَنْهُمْ عْلَى خَاطَرْ كَافْحُو مْعَايَ فَالْخَدْمَة تَاعْ الْإِنْجِيلْ، أَكْلِيمَنْدُسْ وْڤَاعْ الْخُوتْ لَخْرِّينْ الَلِّي عَاْونُونِي فَالْخَدْمَة، وَالَلِّي سْمِيَاتْهُمْ مَكْتُوبِينْ فَكْتَابْ الْحَيَاةْ.
4
فَرْحُوا دِيمَا فَالَرَّبْ، وَنْعَاوَدْ تَانِي نْڤُولْكُمْ فَرْحُوا.
5
خَلِيوْ الَضْرَافَة الَلِّي فِيكُمْ يَعَرْفُوهَا الَنَّاسْ ڤَاعْ.رَاهْ الَرَّبْ قْرِيبْ.
6
مَا تَتْقَلْقُوشْ عْلَى حَتَّى حَاجَة، بَصَّحْ طَلْبُو كُلَشْي مَنْ اللهْ بَالَصْلاَةْ وَالَدْعَاوِى وَالشُكْرْ، وْخَلِيوْ الَشِّي الَلِّي تَطَلْبُوهْ مَعْرُوفْ عَنَدْ الله.
7
وَسْلاَمْ اللهْ الَلِّي فُوقْ كُلْ حَاجَة، يَحْرَزْ قْلُوبْكُمْ وْأَفْكَارْكُمْ فَالْمَسِيحْ يَسُوعْ.
8
وْفَالَلَّخَرْ يَا الخُوتِى، دِيرُو بَالْكُمْ فْهَادُو الَصْوَالَحْ : ڤَاعْ الَشِّي الَلِّي صْحِيحْ ، يَسْتَاهَلْ يَتَّحْتَرَمْ، ڤَاعْ الَشِّي الَلِّي حَقْ، ڤَاعْ الَشِّي الَلِّي نْقِيْ،
9
ڤَاعْ الَشِّي الَلِّي نَبْغِيوَهْ ڤَاعْ الَشِّي الَلِّي سُمْعَة تَاعَهْ مْلِيحَة،وْڤَاعْ الَشِّي الَلِّي يَسْتَهَلْ يَشَكْرُوهِ الَنَّاسْ.
10
رَانِي فَرْحَانْ بَزَّافْ فَالَرَّبْ، عْلَى خَاطَرْ وَلِيتُو مَنْ جْدِيدْ تَتْهَلاَوْ فِيَّا، وْكُنْتُو بَاْغْيِّينْ تَتْهَلاَوْ فِيَّا مَنْ قْبَلْ بَصَّحْ مَا لْقِيتُوشْ فُرْصَة.
11
مَا قُولَتْلْكُومْشْ هَاكَا عْلَى خَاطَرْ أَنَا مَحْتَاجْ، بَصَّحْ تْعَلَّمَتْ نَقْتَنَعْ بَالَشِّي الَلِّي عَنْدِي.
12
تْعَلَّمَتْ نْعِيشْ فْوَقَتْ لَغْبِينَة وْفْوَقَتْ الَشَّبْعَة. تْعَلَّمَتْ نْعِيشْ كِمَا كَانْ الْحَالْ، كُنَتْ شَبْعَانْ وَلاَ جِيعَانْ، كَانْ عَنْدِي بَزَّافْ وَ لاَ شْوِيَة.
13
وْأَنَا نْنَجَمْ نْدِّيرْ كُلَشْي فَالْمَسِيحْ الَلِّي يْقَّوِينِي.
14
بَصَّحْ هَكَاكْ، دَرْتُو حَاجَة مْلِيحَة مَلِّي شَارَكْتُونِي فَالْمَحْنَة تَاعِي.
15
وْتَعَرْفُو يَا سُكَانْ فِلِّيبِي، بَلِّي فَالَلَّوَلْ كِي بْدِيتْ نْخَبَرْ بَالْإِنْجِيلْ، مَلِّي خْرَجَتْ مَنْ مَكْدُونِيَة، حَتَّى كْنِيسَة مَا كَانَتْ تْعَاوَنِي،فَالْمَدْخُولْ تَاعِي وَفَالْمَصْرُوفْ مَنْ غِيرْكُمْ نْتُمَ وَحَدْكُمْ.
16
وْحَتَّى كِي كُنَتْ فَتِسَالُونِيكِي، رْسَلْتُو لِي كْتَرْ مَنْ خَطْرَة الَشِّي الَلِّي كُنَتْ مَحْتَاجْ ليِه.ْ
17
وَرَانِي مَا نْحَوَسَشْ عْلَى الْهْدِيَاتْ، بَصَّحْ بْغِيتْ الْغَلَّة تَاعْكُمْ تْزِيدْ.
18
رَاهْ لْحَقْنِي الَشِّي الَلِّي كُنَتْ مَحْتَاجْ لِيهْ وَكْتَرْ. وْدَرْوَكْ عَنْدِي الَلِّي يَكْفِينِي عْلَى خَاطَرْ أَبَفْرُودِيسْ جَابْ لِي ڤَاعْ الَشِّي الَلِّي رْسَلْتُوهْ ِلي، هُوَ كِمَا الَرِّيحَة لَمْلِيحَة تَاعْ ذْبِيحَة مَقْبُولَة عَنَدْ الله وْتَرْضِيهْ.
19
إِلاَهِيَ غَادِي يْمَدْ لِيكُمْ ڤَاعْ وَاشْ تَحْتَاجُو، عْلَى حْسَابْ الْمَجَدْ تَاعَهْ بَالْمَسِيحْ يَسُوعْ.
20
الْمَجَدْ لله بُونَا دِيمَا.آمِينْ.
21
سَّلْمُو عِلَى ڤَاعْ الْمُومْنِينْ الْمَقْدْسِينْ بَالْمَسِيحْ يَسُوعْ، وَالْخُوتْ اَلَلِّي مْعَايَ يْسَّلْمُو عْلِيكُمْ.
22
وَيْسَّلْمُو عْلِيكُمْ الْمُومْنِينْ الَمْقَدْسِينْ الَلِّي هْنَا ڤَاعْ، وَبَالْخْصُوصْ الَلِّي يَخَدْمُو عَنَدْ قَيْصَرْ.
23
وَالَنِّعْمَة تَاعْ رَّبِنَا يَسُوعْ الْمَسِيحْ تْكُونْ مْعَاكُمْ.