الفصل 2
1
مَا دَامْ كَايَنْ الَتَّشْجِيعْ فَالْمَسِيحْ، وْكَايَنْ الَشَرِكَة فَالْمَحَبَة،وْفَالَرُوحْ الْقُدُوسْ، وْكَايَنْ الْحَنَانْ وَالَرَحْمَة.
2
كَمْلُوا الْفَرْحَة تَاعِي وْكُونُوا عْلَى رَايْ وَاحَدْ، وْكُونُوا مَتَاحْدِينْ فَالْمَحَبَة، بْقَلْبْ وَاحَدْ وْبْفَكْرْ وَاحَدْ.
3
وْعَمَرْكُمْ مَا تْدِيرُوا حَتَّى حَاجَة بَالْأَنَانِيَة وَالْإِفْتِخَارْ، بَصَّحْ بَالتَّوَاضُعْ، خَمُوا دِيمَا تْخَيْرُوا غِيرْكُمْ عْلَى رْوَاحْكُمْ.
4
وْحَتَّى وَاحَدْ مَنْكُمْ مَا يْخَمَمْ غِيرْ فْمَصْلَحْتَهْ، بَصَّحْ فْمَصْلَحَةْ الَنَّاسْ لَخْرِينْ.
5
بَصَّحْ يْكُونْ فِيكُمْ تَخْمَامْ يَسُوعْ الْمَسِيحْ.
6
هْوَ الَلِّي كَانْ فَالطَبِيعَة تَاعْ اللهْ، عُمْرَهْ مَا يخَمَمْ يَسَتْغَلْ الْمُسَاوْيَة تَاعَهْ مْعَ اللهْ لْمَصْلَحْتَهْ.
7
بَصَّحْ تْخَلَى عْلَى الْقِيمَة تَاعَهْ، وْدَّا طَبِيعَة تَاعْ الْعَبْدْ،
8
وْوَلَى فْصُورَة بْنَادَمْ. تْوَاضَعْ حَتَّى الْمُوتْ، الْمُوتْ عَلَى الَصَّلِيبْ.
9
وْعْلَى هَادْشِي رَفْعَهْ اللهْ، وْمَدْلَهْ إِسْمْ فُوقْ كُلْ إِسْمْ،
10
بَاشْ تَسْجَدْ لَهْ كُلْ رُكْبَة، فَالَسْمَا وْعْلَى الْأَرْضْ وْتَحْتْ الْأَرْضْ.
11
وْيَشْهَدْ كُلْ لْسَانْ بَلِّي يَسُوعْ الْمَسِيحْ هُوَ الَرَّبْ، بَاشْ يْبَانْ الْمَجْدْ تَاعْ الله ْالْأَبْ.
12
خُوتِي لَعْزَازْ، كِمَا كُنْتُوا دِيمَا تْطِيعُونِي، مَا شِي غِيرْ ْوَأنَا حَاضَرْ، بَصَّحْ حَتَّى وْأَنَا غَايَبْ، وْدِيرُوا جُهَدْكُمْ باَشْ تْكَمَلْوا لَسْلاَكْ تَاعْكُمْ بَالْخُوفْ وْالَطَاعَة.
13
عْلَى خَاطَرْ اللهْ هُوَ الَلِّي يَخْلَقْ فِيكُمُ ْالإِرَادَة باشْ تْدِيرُوا الَشِّي اَللِّي يَبْغِيهْ.
14
ديِرُوا كُلْشِي بْلاَ مَا تَشْكِيوْ وْبْلاَ مَا تَتْخَاصْمُوا بِنَاتْكُمْ.
15
بَاشْ تْكُونُوا بْلاَ لُومْ وْنْقَيِّينْ. وْتْكُونُوا وْلاَدْ اللهْ ، مَا فِيكُمْ حَتَّى عِيبْ فْي وَسَطْ جِيلْ حْيَاتَهْ فَاسْدَة، وَتْضَّوِيوْ كِنُورْ فِي الْعَالَمْ .
16
مَتْمَسْكِينْ فَكْلاَمْ اللهْ الَلِّي يْمَدْ الَحْيَاةْ، وْهَكَا غَاِّدي نَفْتَخَرْ فَالَنْهَارْ الَلِّي غَادِي يْوَلِي فِيهْ الْمَسِيحْ، عْلَى خَاطَرْ مَا جَرِيتْشْ بْلاَ فَايْدَة وْمَا عْيِتْشْ بَاطَلْ.
17
وحْتَى لُوكَانْ يْكُونْ دَمِي مَخْوِي عْلَى ذْبِيحَة إِيمَانْكُم وْخَدمَتْكُم، غَادِي نْكُون فَرّحَانْ بْزَافْ مْعَاكُم كَامَل.
18
هَكّا فَرّحُوا وسَعْدُو حْتَى نْتُم مْعَايَا.
19
نْتُمَا مَنْ الَرَّبْ يَسُوعْ،مَانْطَوَلْشْ نَرْسَلْ لِيكُمْ تِيمُوثَاوْسْ، بَاشْ نَفْرَحْ كِي نَعْرَفْ خْبَارْكُمْ.
20
عْلَى خَاطَرْ مَا عَنْدِي حَدْ كِمَا هُو الَلِّي يَهْتَمْ ِفيكُمْ بْقَلْبْ صَافِي.
21
عْلَى خَاطَرْ ڤَاعْ يْحَوْسُوا غِيرْ عْلَى مَصْلَحَتْهُمْ، مَاشِي عْلَى مَصْلَحْةْ يَسُوعْ الْمَسِيحْ.
22
أَمَا تِيمُوثَاوَسْ، رَاكُمْ تَعَرْفُوا الَحْوَايَجْ الَلِّي فَاتْ مَنْهُمْ، عْلَى خَاطَرْ خْدَمْ مْعَايَ كِمَا الَوَلْدْ مْعَ بُوهْ بَاشْ يْزِيدُو الَنَّاسْ يَسَمْعُوا عْلَى الَإْنْجِيلْ.
23
هَادَا هُوَ الَلِّي نَتْمَنَا نَرَسْلَهْ لِيكُمْ كِي نَعْرَفْ وَاشْ غَادِي يَصْرَا لِي.
24
وْرَانِي عَنْدِي ثِّقَة فَالَرَبْ بَلِّي حَتَّى أَنَا قْرِيبْ نْجِي لْعَنَدْكُمْ.
25
بَصَّحْ شَفْتْ بَلِّي لَزَمْ نَرْسَلْ لِيكُمْ خُويَا فَالْإِيمَانْ أَبْفِرودُتْسْ، الَلِّي عَوَنِي فَالْخَدْمَة وْكَافَحْ مْعَايَ، وْالَلِّي رْسَلْتَوهْ لْعَنْدِي بَاشْ يْعَاوَنِي فَالَشِي الَلِّي نَحْتَاجُوا.
26
رَاهْ مَشْتَاقْ بَزَّافْ يْشُوفْكُمْ كَامَلْ، وْكَانْ مَغْمُومْ، عْلَى خَاطَرْ سَمَعْتُوا بَالْمَرْضْ تَاعَهْ.
27
عْلَى خَاطَرْ كَانْ مْرِيضْ وْقْرِيبْ يْمُوتْ، بَصَّحْ اللهْ رَحْمَهْ، وَرْحَمْنِي حَتَّى أَنَا بَاشْ مَا نْزِيدْشْ هَمْ عْلَى هَمْ.
28
وْبَسْبَابْ هَادْشِي رَسْلَتَهْ لْكُمْ بَالْخَفْ، بَاشْ مَلِّي تْشُوفُوهْ تَفَرْحُوا وْيَنْقَصْ عْلِيَ الْهَمْ.
29
رَحَبُوا ِبيهْ بَالْفَرْحَة كِمَا خُوكُمْ فَالَرَبْ، وَتْهَلَاوْ فْكُلْ وَاحَدْ كِمَا هُوَ.
30
الَلِّي عْلَى جَالْ خَدْمَةْ الْمَسِيحْ كَانْ رَاحْ يْمُوتْ، وْغَامَرْ بْحْيَاتَهْ بَاشْ يْكَمَلْ الَشِّي الَلِّي كَانْ نَاقَصْ فْخَدَمْتْكُمْ لِي.