الفصل 5
1
وْجَاوْ لْجِهَة واحْدُخْرَى لْلْبْحَرْ لْبْلاَدْ سْمُوهَا اَلْجَدَرِيِينْ.
2
وْكِي خْرَجْ مَالْفْلُوكَة تَمْ تَمْ لَقَاهْ وَاحَدْ لَبْنَادْمْ فِيهْ رُوحْ نَجِسْ،
3
كَانَ يْسْكُنْ فَلْقْبْرْ، وْحْتَى وَاحْدْ مَا نَجَّمْ يَرْبْطَهْ حْتَّى بَالْسْلاَسَلْ،
4
عْلَى خَاطَرْ نْشَدْ بْزَّافْ بالْسْلاَسَلْ وْحْتَّى ولَّى يْطَرْطَڤْهُمْ وْ مَا نَجَّمْ حْتَّى وَاحَدْ يْتْحْكَّمْ فِيهْ.
5
وْكَانْ دَايْمَنْ لِيلْ وْ نْهَارْ فْلْجْبَالْ وْ لْقْبَرْ وْ يْزَڤِّي وْ يْجْرَحْ رُوحَهْ بْلَحْجْرْ.
6
وْ كِشَافْ يَسُوعْ مْلْبْعِيدْ جْرَى وْ سْجَدْلَهْ،
7
وْ زَڤَّى بْزَّافْ وْ ڤَالْ: " شَا بِينِي وِ بِينَكْ يَا يَسُوعْ ابْنْ الله؟ فِوْجَهْ رْبِّي مَتْعْدَبْنِيشْ!".
8
عْلَى خَاطَرْ ڤَالَهْ: " اخْرْجْ مَالْبْنَادَمْ يَا رُوحْ نَجِسْ".
9
وْ سْقْسَاه: "كِي سَمُّوكْ".وْ جَاوْبَهْ :"سَمُّونِي جَيْشْ، عْلَى خَاطْرْ رَانَا بْزَّافْ".
10
وْ حَاوْلُوه ْبَاشْ مَايْرْسَلْهُمْشْ بَرَّى لمْدِينَة.
11
وْ كَانْ تْمَا عْنْدْ لْجْبَلْْ ڤْطِيعْ كْبِيرْ تَاعْ لَحْلَالِيفْ يْرْعَاوْ،
12
وْطْلْبُوه ڤَاعْ شْوَاطْنْ وِ يْڤُولُو:" رْسَلْنَا نَدُّخْلٌو فَلْحْلَالِيفْ".
13
وْ تَمْ تَمْ سْمَحَّلْهُمْ يَسُوعْ. وْ خَرْجَتْ اَلْأَرْوَاحْ اَلْنَّجِسَةُ وْ دَخْلَتْ فَلْحْلَالِيفْ، وْجْرَا لْڤْطِيعْ وْ طَاحْ فْلَبْحَرْ وْ كَانُو وَحْدْ اَلْفِينْ وْ جَافُو فْلْبْحَرْ.
14
بْصَّحْ سُرَّاحْ لَحْلَالِيفْ هَرْبُو وْ خَبْرُو لِّي فْلْمْدِينَة وْ دْوَاوِيرْ .وْ خَرْجُو بَاشْ يْشُوفُو شَا صْرَى.
15
وْ جَاوْ لْعْنْدْ يَسُوعْ و كِشَافُو لْمْجْنُونْ لِّي كَانْ فِيهْ رُوحْ نَجِسْ مْجْمَّعْ وْ لاَبَسْ وْ عَاقْلْ ،خَافُو.
16
وْ حْكَاوْلْهُمْ ِلّي شَافُو شَا صْرَى مْعَ لْمَجْنُونْ وْ لَحْلَالِيفْ .
17
وْ ڤَالُو لْيَسُوعْ يَرْحَلْ مْنْ بْلاَدْهُمْ.
18
وْ كِي دْخَلْ يَسُوعْ لْلْفْلُوكَة طْلْبْ مْنَّهْ لِّي كَانْ مْجْنُونْ بَاشْ يْكُونْ مْعَاهْ،
19
وْ مَخْلاَهْشْ ،يَسُوعْ بْصَّحْ ڤَالَه ْ: "رُوحْ عَنْدْ دَارْكْ وْ مَّالِيكْ ، وْ خْبَّرْهُمْ شَا دَارْلَكْ الله ْو ِكيفَاشْ رَحْمَكْ".
20
وْ رَاحْ وْ بْدَا يْبَرّحْ فْعَشْرْ مْدُنْ شَدَارْ يَسُوعْ مْعَاهْ. وْ تْعَجْبُو لْغَاشِي. اقامة ابنة يايرس و نازفة الدم
21
وْ كِفَاتْ يَسُوعْ بْلْفْلُوكَة لَلْجِهَة لُخْرَى ، تْلاَمُّو عْنْدَهْ بْزَافْ الْنَّاسْ ، وْ كَانْ عَنْدْ لْبْحَرْ.
22
وْ جَا عَنْدَهْ وَاحْدْ رَئِيسْ الْمْجْمَعْ سْمُوهْ يَايْرُسُ. وْ كِيشَافَهْ سْجْدْلَهْ ،
23
وْ حَاوْلَهْ وْ هُوَ يْڤُولْ :"بْنْتِي الصْغِيرَة رَاهِي تْلَقَّفْ. لُوكَانْ غِيرْ تْجِّي وْ تْحْطْ يْدَْكْ عْلِيهَا بَاشْ تْبْرَا وْ تْحْيَا!" .
24
وْرَاحْ مْعَاهْ وْ تْبْعُوهْ بْزَّافْ الْنَّاسْ وْ كَانُو غَابْنِينَهْ.
25
وْ كَانْتْ مْرَاه عَنْدْهَا طْنَاعْشْ سْنَة وْ ِهيَ تَدْمِي ،
26
نْضَرَّتْ بْزَّافْ مَاالْطْبَّى وْ خْسْرْتْ ڤَاعْ لِي عْنْدْهَا وْ مَانْفْعْهَا وَالُو، غِيرْ زَادْ عْلِيهَا الضَّرِ.
27
وْ كِي سَمْعَتْ بْيَسُوعْ جَاتْ فِي وَسْطْ الْجْمَاعَة مْنْ مُورَاهْ ، وْمَسَّتْ قْشَهْ،
28
عْلَى خَاطَرْ ڤَالَتْ : " إِلاَ تْلَمّسْتْ يَالُوكَانْ غِيرْ قْشَّهْ نْبْرَا".
29
وْ تَمْ تَمْ حَبَّسْ نَزِيفْ دَمْهَا ، وْ فَاقَتْ فِي رُوحْهَا بْلِّي بْرَاتْ مَالْمَرْضْ.
30
وْ تَمْ تَمْ دَارْ يَسُوعْ بِينْ الجْمَاعَة وْ حَّسْ فِي رُوحَهْ بْقْوَّة خَرْجَتْ مْنَّهْ، وْ ڤَالْ:" شْكُونْ لِّي لْمَسْ قْشِّي؟".
31
وْ ڤَالُولَهْ تْلاَمْذْه:" رَاكْ تْشُوفْ ڤَاعْ الْغَاشِي يَدَّمْرُوكْ، ْو تْڤُولْ: شْكُونْ لِمَسْنِي؟".
32
وْ كَانْ يْشُوفْ وِ يْحَوَّسْ بَاشْ يْشُوفْ لِّي دَارَتْ هَادْ الشِّي.
33
بَصَّحْ لْمْرَاه جَاتْ وْهِيَ خَايْفَة بْزَّافْ، وْ عَارْفَة شَاصْرَالْهَا، وْ سَجْدَتْ وْ ڤَالْتْلَهْ ڤَاعْ اْلْحَقْ.
34
وْ ڤَالْهَا : " يَا بْنْتِي ِإيمَانَكْ شْفَاكْ ، رُوحِي بَسْلاَمَة وْ كُونِي صْحِيحَة".
35
وْ هْوَ يْهْدَرْ جَاوْ مْنْ دَارْ رَئِيسْ الْمَجْمَعْ وِ يْڤُولُو:" بْنْتْكْ مَاتَتْ. عْلاَهْ رَاكْ تْشَقّؤي فْلْمْعَلَّمْ؟".
36
وْ تَمْ تَمْ سْمَعْ يَسُوعْ الْكْلْمَة لِّي نْڤَالَتْ، وْ ڤَالْ لْرَئِيسْ المَجْمَعْ : "مَتْخَافْشْ ! آمْنْ بَرْكْ".
37
وْ مَاخَلَّى حْتَى وَاحَدْ يْتَبْعَهْ غِيرْ بُطْرُسْ وْ يَعْقُوبْ، وْ يُوحُنَّا خُو يَعْقُوبْ.
38
وْ جَا لْدَارْ رَئِيسْ الْمْجْمَعْ وْ سْمَعْ التْوَاغْ . يْبْكُو وِ يْنَوْحُو.
39
وْ دْخَلْ وْ قَالْهُمْ : "عْلاَهْ رَاكُمْ تْبْكُو وْ تْنُوْحُو؟ لْبْنْتْ مَمَاتْتْشْ رَاهِي غِيرْ رَاڤْدَة ".
40
وْ ضَحْكُو عْلِيهْ. بْصَّحْ هُوَ خْرَّجْهُمْ ڤَاعْ. وْ دَّى مْعَاهْ بُوا البْنْتْ وَ امْهَا وْ لِي كَانُو مْعَاهْ وْ دْخْلْ وِينْ كَانْتْ الْبْنْتْ مْكَسْلَة،
41
وْ شْدْ يَدْ الْبَنْتْ وْ ڤَالْهْا: "طَالِيثَا ، نُوضِي!". لِي مْعْنَاهْ: يَا بْنْتْ لِيكْ نْقُولْ: نُوضِي!
42
وْ َتمْ تَمْ نَاضَتْ الْبَنْتْ وْ تْمْشَاتْ، عْلَى خَاطَرْ كَاْنتْ بْنْتْ تَاعْ طْنَاعْشْ سْنَة نْخْلْعُوا خْلْعَة كْبِيرَة .
43
وْ وَصَّاهُمْ بْزَّافْ بَاشْ حْتَّى وَاحْدْ مَا يْعْرَفْ شَا صْرَى وْ ڤَالْ بَاشْ يَعْطُوهَا تَاكُلْ.