الفصل 13
1
وَ هُوَ خَارَج مَالْهَيكَلْ، ڤَالَهْ وَاحَدْ مَاَلتْلاَمَدْ:" يَا مَّعَلَمْ وَاشْ هَادْ الَحْجَرَة وَاشْ هَادْ اَلْبَنْيَانْ
2
جَاوْبَهْ يَسُوعْ وْ ڤَالَهْ :" رَاكْ تْشُوْفْ هَادْ البَنْيَانْ الَعْظِيمْ،مَغَادِيشْ تَبْقَى حَجْرَة فُوڤْ حَجْرَة وْ مَا تَتْهدَّمْشْ".
3
وْكِكَانْ ڤَاعَدْ عْلَي جْبَلْ الزِيتُونْ ، مْڤَابَلْ الْهَيْكَلْ، سَقْسَاهْ بُطْرُسْ وْ يَعْقُوْب وْيُوحَنَا وْ اَنْدَرَاوْسْ وْ هُمَا وَحَدْهُمْ
4
"ڤُولْنَا وِينْتَا غَادِي يَصْرَاهَادَ؟ وْشَاهِيَّ العَلَامَة لِّغَادِي تْبيَّن هَادْ الِشِي؟".
5
جَاوَبْهُمْ يَسُوعْ وَبْدَا يْڤْولْهُمْ :" حَرْزُو حَتَّي وَاحَدْ مَا يْوَدَّرْكُمْ
6
بَزَّافْ غَادِي يْجُو وْيَهَدْرُو بَاسْمِي وَيْضَيْعُوا بَزَّافْ النَّاسْ.
7
بَصَّحْ مِينْ تَسَمْعُو بَخْبَرْ الحَرْبْ مَا تْخَافُوشْ هَادا يْلِيْقْ يَصْرَا
8
عْلى خَاطَرْغَادِي يَنْڤْلَبْ شَعْبْ عْلَى شَعْبْ وْ مَمْلَكَة عْلَى مَمْلكَة وْ غَادِي تَصْرَا الزْلاَزَلْ فِي بَزَّافْ جْوايَهْ ،هَادِ هِيَ البَدْيَةُ تَاعْ هَادْ الضُرْ.
9
حَرْزُو رْوَاحْكُم ْعْلَي خَاطَرْغَادِي يَدُّوكُمْ لَلْمْحَاكَمْ وْ يَجَلْدُوكُمْ عْلَى جَالِي وِ يْوَڤْفُوكُم عَنْدْ الوُلاَةْ شَهَادَة لِيهُمْ
10
وَ يْليِقْ الِانْجِيل ْيَتبْشَرْ عَنْد ْڤَاعْ النَّاسْ.
11
وَ مِينْ يْجَرُوكُمْ لِلْمْحَاكَمْ مَاتْخاَفُوْش وْ مَا تَتْقَلْقُوشْ مِينْ غَادِي تَهَدْرُو، بَصَّحْ ڤُولُو شَانعْطَالْكُم فْديكْ السَاعَة،ُ عْلَي خَاطَرْمَاشِي نْتُومَا لِغَادِي تَهَدْرُو بَصَّحْ الرُوحْ القْدُسْ
12
غَادِي يْسَلَّمْ الأَخْ خُوهْ لَلْمُوتْ وَالأَبْ يْسَلَم ْوَلْدَهْ ، وَ الوْلاَدْ يْجُو ضَدْ وَالْدِيهُمْ وَ يَكُتَلُوهُم.ْ
13
غَادِي تْكُونُو مَكْرُوهِين مَالنَّاسْ عْلَي جَالْ سْمِي، بَصَّحْ لِيَصْبَر ْحَتَّي التَالِي يَسْلَكْ.
14
مِينْ تْشُوفُو "رَجْسَةْ الْخَرَابْ " كَايْنَة لِهْدَرْ عْليها نْبِي دَانْياَلْ ،مَتَلْقَاشْ لِيَقْدَرْ يَحْرَزْ رُوحَه ْفِي دَاكْ الوَقْتْ يَهَرْبُو لِى فَااليَاهُودِيَة لَلْجْبَلْ ،
15
وَ لِيكُونْ فَالسْطَحْ مَا يْلِيقْشْ يْهَوَّدْ وَ يَدِّي حَاجَة مَنْهَا
16
وَلِي رَاهْ فَجْنَانْ مَيْوَلِيْش لَلُورْ وَ يَدِّي كَسْوَتَهْ .
17
يَا وِيلْ النْسَا لِبَلْكَرْشْ وَ لِيْرَضْعُوا فِي دُوكْ لِّيَام ْ
18
وَ صَلُّو بَاشْ مَا تْكُونْشْ الضَرْبَة فِي الشْتَا
19
عْلَي خَاطَرْ فِي هَادِيكْ لِّيَامْ يْكُونْ ضِيقْ لِعُمْرَهْ مَا صْرَامَلِّي رَبِّي خْلَقْ الدُنْياَ حَتَّي لْدَرْوَكْ
20
لُكاَنْ مَاشِي رَبِّي لِقَلَّلْ هَدِيكْ اللِّيامْ وَاحَد ْفيِهُمْ مَاكَانْ غَادِي يَسْلَكُ ، عْلَي جَالْ لِخْطَارْهُم ْرَبِّي قَلَّلْ هَدِيكْ لَيَامْ.
21
لُكَانْ يْڤُولُولْكُمْ فِدَاكْ الوَقْتْ المَسِيحْ رَاهْ هْنَا وَ لاَ رَاهْ لْهِيهْ مَا تْآمْنُوهْشْ
22
غَادِي يْبَانُوكُثَرْ مِنْ مَسِيحْ دَّجَالْ وَ أَنْبِياَءْ كَدَّابِينْ وْيْمَدُّو مُعْجِزاتْ بَاشْ يْضَيْعُوكُمْ وْحَتَّي المُخْتَارِينْ
23
حَرْزُو رْوَاحْكُمْ أَنَا رَانِي خَبَّرْتكُمْ بْكُولْشِي قَبْلْ مَا يَصْرَا.
24
بَصَّحْ فِي هَديِكْ لِياَمْ الشَمْسْ تَطْلَع ْكحْلَة وَالقْمَرْ يْوَلِي بْلْاَ ضَوْ.
25
النْجُومْ لِفَسْمَا طِيحْ وَالقُوَاتْ تَتْزَعْزَعْ.
26
غَادِي تْشُوفُو إِبْنْ الاِنْسَانْ جَايْ فِي السْحَابْ بْقُوَة كْبِيَرة وْ مَجْدْ رَبِي.
27
غَادِي يَرْسَلْ المَلَايْكَة مَنْ رَبْعَة جْوَايَهْ مَنْ أَقْصَي السْمَا حَتَّي أَقْصَي الأَرْضْ .
28
مَنْ شَجْرَةْالكَرْمُوسْ تْعَلْمُو لَمْثَلْ مِينْ تْشُوفُو أَغْصَانْهَا وَلاَتْ طْرَيَّة وْ خَرْجَتْ لَوْرَاقْ تَعَرْفُو بَلِّي الصَيفْ ڤْرِيبْ .
29
اَنْتُومَا تَانِي هَاكَاكْ مِينْ تْشُوفُو هاَدْ الصْوَالَحْ يَصْرَاوْ عَرْفُو بَلِّي الوَقْتْ ڤْرِيبْ.
30
الحَقْ نْقُولْكُمْ مَغَادِي يَكمَلِ هَاد ْالجِيلِ حَتَي يْصِيرْ ڤَاعْ هَادْ الشِي
31
السْمَا وْ اللّرْضْ يَفْنُوْ بَصَّحْ كْلاَمِي مَيَفْنَاشْ .
32
"هاَدِيكْ السَاعَة مَيعْرَفْهَاشْ حَتَّي وَاحَدْ لاَ المَلاَيْكَمَة لِي فَسْمَا وَ لاَ الإبْنْ غِيرْ الأَبْ.
33
حَرْزُوسَّهْرُو وْ صَّلُو،عْلَى خَاطَرْ مَتَعَرْفُوشْ وِينْتَا يْجِي هَادْ الَوَقْتْ .
34
كِيمَا وَاحَدْ يْسَافَرْ وْ خَلَا دَارَه ْوعْطَي لِلْعَبِيدْ سُلْطَانْ علْيهَا ،وْ كُلْ وَاحَدْ خَدْمَتَهْ وْ وَصَّي العَسَّاسْ بَاشْ يَسْهَرْ.
35
سَهْرُوعْلَى خَاطَرْ مَتَعَرْفُو ِوينْتَا مُولْ الدَارْ يْوَلِّي فاَلعْشِيَا ،نُص اللِيلْ، مِيْن يْصِيحْ الدِيكْ وَ لا َفَصْبَاح.
36
باَشْ مَايِجِيشِ عْلَي غَفْلَة وَ يَلْقَاكُمْ رَاڤدِينْ .
37
لِينْڤولَهَ لْكُمْ نْقُولَه ْلْڤَاعْ ،أَسَهْرو".