الاصحاح 23
1
تْكَلَمْ يَسُوعْ مْعَ جْمَاعَاتْ النَاسْ وْ تْلَامْذَهْ
2
وْقَالْ: "عُلَمَاءْ الشَرْعْ وْ الفَرِسِيِينْ ڤعْدُوا عَلَى كُرْسِي مُوسَى هُمَا لِعَنْدْهُمْ الحَقْ بَاشْ إِفَسْرُوا الشَرِيعَة تَاعْ مُوسَى،
3
ڤاعْ لِيْقُولُولْكُمْ دِيرُوهْ وْ تَبْعُوهْ، وْبَصَحْ مَاتْدِيرُوشْ فْعَايَلْهُمْ عْلَى خَاطَرْ مَايْدِيرُوشْ هَادَاكْ الشِّي لِيْقُولُوهْ
4
هُمَا إِحَزْمُوا حْزَامَاتْ تْقَالْ وْ صْعَابْ وْ يْحَطُوهُمْ عْلَى كْتَافْ النَّاسْ، وْ بْصَح ْهُمَا ماَيْحَرْكُوا حْتَى صْبَعْهُمْ بَاشْ يَرَفْدُوا مْعَاهُمْ،
5
وْ إِلاَ دَارُوا حَاجَة، يْدِيرُوهَا غِيرْ بَاشْ إِشُوفُوهُمْ النَاسْ: وْيْوَسْعُوا العِصَابَاتْ عْلَى جْبَاهيِهُمْ وْ يْطُوْلُوا جْلَايَلْهُمْ،
6
وْ يَبْغُوا يْكُونُوا فَا البْلَايَصْ المْخَيْرِينْ فَالَوْلَايَمْ، وْ فَدْيُورّْ الصْلَاةْ،
7
وْ يَبْغُوا اِسْلْمُوا عْلِيهُمْ النَّاسْ فْلَسْوَاقْ، وْ يَعْيطُولْهُمْ النَّاسْ: يَا سِيدِي يَا سيِدِي!
8
وْ بْصَحْ نْتُومَا مَاتْخَلِيوْشْ حَتَى وَاحَدْ اِيْعِيَطَلْكُمْ سِيدِي، عْلَى خَاطَرْ نْتُمَا قَاعْ خُوتْ، وْ عَنْدَكُمْ سِيدْ وَاحَدْ.
9
وْ مَانْسَمُوشْ حَتَى وَاحَدْ عْلَى هَادْ الأَرْضْ بُوكُمْ، عْلَى خَاطَرْ بُوكُمْ وَاحَدْ وْ هُوَ الأَبْ اللِي فِي السْمَا.
10
وْ مَا تْسَمِيوْشْ أَرْوَاحْكُمْ مْعَلْمِينْ، عْلَى خَاطَرْ مْعَلِمْكُمْ وَاحَدْ وْ هُوَ المَسِيحْ.
11
وْالْكْبِيرْ فِيكُمْ اِيْكُونْ خَدَامْ لِيكُمْ .
12
وْ لِيَرْفَدْ رُوحَهْ وْ يْعَلِي شَّانَهْ اِيْطِيحْ، بْصَحْ اللِّي يْتْوَاضَعْ الرَّبْ اِيْعَلِيهْ".
13
بْصَحْ يَاوِيلْكُمْ يَا عُلَمَاءْ الشَرِيعَة وْ الفَرِسِيِينْ المُنَافِقِينْ! عْلَى خَاطَرْ تْبَلْعُوا مَلَكُوتْ السَّمَاوَاتْ قُدَامْ النَّاسْ، مَاتَدَخْلُوشْ نْتُمَا وْ مَاتْخَلُوشْ لُخْرِينْ يْدَخْلُوا.
14
يَا وِيلْكُمَ يَا عُلَمَاءْ الشّرِيعَه وَ الفَرِسِييِنْ وْ المُنَافِقِينْ! عْلَى خَاطَرْ تَاكْلُوا رَزْقْ الهَجَالَاتْ، وْطُوْلُوا فِي صْلَاتْكُمْ غِيرْ بَاشْ تْبَانُوا. عْلَى هَادْ الشِّي الْعِقَابْ نْتَاعْكُمْ غَادِي يْكُونْ صْعِيبْ مَنْ نْتَاعْ النَّاسْ لَخْرِينْ.
15
يَاوِيلْكُمْ يَا عُلَمَاءْ الشَرِيعَه وَ الفَرِسِيِينْ وْ المُنَافِقِينْ! عْلَى َخَاطَرْ رَاكُمْ تَقَطْعُوا البَّرْ وْ البْحَرْ بَاشْ تْرَدُوا شِّي وَاحَدْ يْهُودِي، وْ كِيْوَليِ يْهُودِي تْرَدُوهْ يَسْتَاهَلْ جِهَنَمْ كْتَرْ مَنْكُمْ زُوجْ مَرَاتْ.
16
يَا وِيلْكُمْ يَا لمَسْؤُولِينْ الْعُمْيِينْ! اللِّي تْقُولُوا لِيَحْلَفْ بْبِيتْ اللَه مَا عْلِيهْ حَتَى شِي، بْصَحْ لِيَحْلَفْ بْذْهَبْ تَاعْ بِيتْ الله يْوَفِي حَلْفَهْ.
17
يَاجُهَالْ، يَا عُمْيِينْ! وَاشْ لِكْبِيرْ وْ عَنْدَهْ القِيمَةْ: الدْهَبْ وْلَا بِيتْ الله اللِّي يْرَدْ الدْهَبْ مْقَدَسْ؟
18
وْاللِّي يَحْلَفْ بْالمَدْبَحْ حْلَفْ مَاشِي مَقْبُولْ، وْ بَصَحْ إلاَحْلَفْ بْالفدِيَة اللِّي فُوڤ مَنْهَا خَاصَهْ يُوفِي بْحَلْفَهْ.
19
يَا جُهَالْ يَا عُمْييِنْ! وَاشْ لِخِيرْ: الدْبِيحَة وْلَا الْمَدْبَحْ اللِّي يْرَدْ الدْبِيحَه مْقَدْسَة؟
20
لِيَحْلَفْ بْالْمَدْبَحْ رَاهْ حْلَفْ بِيهْ وْ بْقَاعْ دَاكْ الشِّي لِفُوڤهْ
21
وْاللِّيَ حْلَفْ بْبِيتْ الله رَاهْ يَحْلَفْ بِيهْ وْ بْالله اللِّي سَاكَنْ فِيهْ،
22
وْلِحْلَفْ باْلسّْمَا يَحْلَفْ بْعَرْشْ الله وْ حَتَى بالله اللِّي قَاعَدْ عْلِيهْ.
23
يَا وِيلْكُمْ يَا عُلَمُاءْ الشَرِيعَة وْالفَرِسِيِينْ وْ المُنَافِقِينْ! تْعَشْرُوا النَعْنَاعْ وْالبْسْبَاسْ وَ الْكَمُونْ، وْخَلِيتُو الحْوَايَجْ المُهِمِينْ فالشَرِيعَة اللِّي هُمَا الحَقْ الرَحْمَة. وَ الإِيمَانْ ,كَانْ خَاصْكُم ْتْدِيرَوا هَادْ الشِي بْلَامَا تْخَلِيوْ الاُمُورْ لُخْرَي.
24
يَاالْمَسْؤُولِينْ الْعُمْيِينْ! اللِي يْصَفِيوْ الْمَا مَنْ النَامُوسْ وَ يْصَرْطُوا الْجْمَلْ
25
يَا وِيلْكُمْ يَا عُلَمُاءْ الشَرِيعَهْ وْ الفَرِسِيِينْ المنافقين! رَاكُمْ تْنَقُوا الكَاسْ وْ الطَبْسِي مَنْ بَرَا، وَتْخَلُوا لدَاخَلْ مْعَمَرْ بْهَادَاكْ الشِي لِجَاكُمْ مَاالسَرْقَة وْالطْمَعْ.
26
يَا الْفَرِيسِي الْعْمَى! نْقِي فَااللَوَلْ الكَاسْ وْالطَبْسِي مَاالدَاخَلْ بَاشْ اِيْوَلِي نْقِي حَتَى مَنْ بَرَا.
27
ياَوِيلْكُمْ يَا عُلَمَاءْ الشَرِيعَة وَ الفَرِسيِيِنْ الْمُنَافِقيِنْ نْتُمَا كِمَا الَقْبُورْ الْمَبِيضْ اللِي تْبَانْ شَابَة مَنْ بَرَا، وْبَصَحْ مَالدَاخَلْ مْعَمَرْ بَعْضَامْ المُوتَى وْ بْكُلْ حَاجَة نَجِسَة،
28
وْهَكَا حَتَى نْتُمَا تْبْانُوا لَنَاسْ مَنْ بَرَا مَتْقِينْ الله، وَبَصَحْ مَاالدَاخَلْ رَاكُمْ مْعَمْرِينْ بالنِفَاقْ وْ الدْنُوبْ.
29
ياَ وِيلْكُمْ يَا عُلَمَاء الشَرِيعَه وَ الفَرِسِيِينْ المُنَافِقِينْ! عْلَى خَاطَرْ رَاكُمْ تْبْنُوا قْبُورْ الأَنْبِيَاء وَ تْزَيْنُوا مَدَافِنْ الصَالْحِينْ،
30
وْتْقُولُوا: لُكَانْ عَشْنَا فُوقْ جْدُودْنْا كَانْ قَاعْ مَا شَارَكْنَاهُمْ فِي الَقْتِيلَة تَاعْ الأَنْبِيَاء.
31
وْهَكَا غَادِي تْشَهْدُوا عْلَى رْوَاحْكُمْ بَلِي اَنْتُمَا وْلَادْ هَادُوكْ لِقَتْلُوا الأَنْبِيَاء
32
أَيَ كَمْلُوا أَنْتُمَا دَاكْ الشِي لِبْدَاوَهْ جْدُودْكُمْ.
33
يَالَحْنُوشَة وْ وْلَادْ الْفَاعِي! كِيفَاشْ تْهَرْبُوا مَنْ دَيْنُونَةْ جِهَنَمْ؟
34
عْلَى دَاكْ الشِي غَادِي نَرْسَلَلْكُمْ الأَنْبِيَاء وَ الْحُكَمَاء وْعُلَمَاء الشَرِيعَة، كَايَنْ مَنْهُمْ لِغَادِي تَكَتْلُوهُمْ وْ اللِي غَادِي تْصَلْبُوهُمْ، وْمَنْهُمْ لِغَادِي تْضَرْبُوهُمْ فِي دْيُورْ الصْلَاةْ نْتَاعْكُمْ وْ طَرْدُوهُمْ مَنْ مَدِينَة لَمْدِينَة،
35
بَاشْ يَنْزَلْ عْلِيكُمْ الْعِقَابْ تَاعْ كُلْ دَمْ مَغْدُورْ طَاهَرْ سَالْ عْلَى الأَرْضْ، مَنْ دَمْ هَابِيلْ اللِي كَانْ مَتْقِي الله حَتَى دَمْ زَكَرْياَ بْنْ بَرْخِيَا اللِي قَتْلُوه بِبنْ المَوْضِعْ الْمُقَدَسْ وْ الْمَذْبَحْ.
36
وْرَانِي نڤولكم الحَقْ:" هَادْ الْعِقَابْ قَاعْ غَادِي يَنْزَلْ عْلَى هَادْ الجِيلْ"
37
يَا أُرْشَلِيمْ ياَ أُرْشَلِيمْ يَا اللِي تُكْتَلْ الأَنْبِيَاء وْ تَرْجَمْ الْمَرْسُولِينْ لِيهَا، شْحَالْ مَنْ مَرَا بْغِيتْ نْلَمْ وْلَادَكْ كِمَا تْلَمْ الْجَاجَه فْلَالِيسْهَا تَحْتْ جْنَاحْهَا، بَصَحْ مَابْغِيتْيشْ!
38
هَاهِيَ دَارْكُمْ غَادِي تَبْقَالْكُمْ خَرِبَة.
39
عْلَى خَاطَرْ نْقُولْ:" مَا غَادِيشْ تْشُوفُونِي مَاالْيُومْ حَتَى تْقُولُوا مْبَارَكْ اللِي جَايْ بِاسَمْ الرَّبْ!".