الاصحاح 17
1
وْمَمْبَعْدْ سَتْ يَّام دَّا يَسُوعْ بُطْرُسْ وَ يَعْقُوبْ وْيُوحَنَّا خُوهْ وْ طْلَعْ بِيهُم لْوَاحَدْ جْبَلْ عَالِ غِير بْوَحَدْهُمْ.
2
وْ تْبَدَّل اَلْشَكْلْ نْتَاعَه ڨُدأمْهُمْ، وْ وَجْهَهْ بَدَا يْضَوِّي كِالْشَمْسْ، وْ وَلاَّتْ لَبْسَتَهْ بَيْضَا كِاَلْنُّورْ
3
وْ تَمّْ بَانَلْهُمْ مُوسَى إلِيَّا يَهَدْرُوا مْعَاهْ.
4
وْ ڨاَلْ بُطْرُسْ لِيَسُوعْ :"شْحَالْ غَايَا نْكُونُوا هْنَا يَا سِيدِي، إِذَا بْغِيتْ نَصَنْعُوا تَلْتْ خَيْمَاتْ: وَحْدَة لِيكْ، و لْمُوسَى وَاحْدَة، و لِإلِيَّا وَاحْدْ خْرَى"
5
وْ فِي اَلْوَقْتْ لِكَانْ يَهْدَرْ فِيه ضَلَّلَتْ عْلِيهُمْ، وَاحَدْ اَلْسْحَابَة مْضَوْيَّة وَتَكَلَّمْ صُوتْ مَنْ اَلْسْحَابَة وْ ڨَالْ:" :"هَادَا هُوَ وَلْدِي اَلْعَزِيزْ اَلْلِي بِيهْ أَنَّا فْرَّحْتْ بَّزَافْ. سَمْعُوا لِيهْ" .
6
وْ كِسَمْعُوا اَلْتْلاَمَذْ هَادْ اَلْشِي طَاحُوا عْلَى وْجُوُهُمْ وْ خَافُوا بَزّاف.
7
جَا يَسُوعْ وْ مَّسْهُمْ وْڨَالْهُمْ :" نُوضُوا، مَا تْخَافُوشْ".
8
وْ طَلْعُوا عَيْنِيهُمْ وْ شَافُوا غِيرْ يَسُوعْ وَحْدَهْ.
9
وْ كِهَوْدُوا مَالَجْبَلْ وَصَّاهُمْ يَسُوعْ وْ ڨالْ:" مَا تْڨُولُوا حْتَى لْوَاحَدْ وَاشْ شَفْتُوا حْتَّى يْقُومْ إِبْنْ اَلْإِنْسَانْ مَالْمُوتْ".
10
وْ سَقْسَاوَهْ تْلاَمْذَه وْڨَالُولَهْ: "أَيَّ عْلأَشْ عُلَمَاءْ اَلْشَرِيعَة: يْڨُولُوا إِلِيقْ إِلِيَّ اجِي هُوَ اَلْلَّوَّلْ؟"
11
جاوْبهمْ يَسُوعْ وْ ڤَالْهُم ׃" إِلِيَّا يْجِي هُوَ اَلْلَوَّلْ و يْصَلَّح كُل شي.
12
وْ بَصَّحْ نْڤُولْكُمْ: إِلِيَّا جَا وْمَاعَرْفُوهْشْ، بَصّحْ دَاروْ بِيَا ڤَاعْ وَاشْ بْغَاوْ. وْ هَاكَا تَانِ إِبنْ اَلْإِنْسَانْ هُوَغَاذِي يَتْعَذّْبْ عْلَى يَدْهُمْ".
13
وْ فْدَاكْ اَلْوَقْتْ فْهَمُوا اَلْتَلأَمَذْ بَلِي كَان يَهدَرْ لْهُمْ عَلَى يُوحَنَّا اَلْمَعْمَدَانْ. شفاء غلام به شيطان
14
كِوَصْلُوأ عَنْدْ اَلْجَمعْ، ڤَدَمْ عَنْدَه وَاحْدْ اَلْرَاجَلْ وْ سْجَدْ لَهْ
15
وْڤَالْ : " يَاسِيدي، إرْحَمْ وَلْدِي عْلَى خَاطَرْ رَاهْ يَتْعَّدَبْ بَزَافْ، وْشْحَالْ مَنْ خَطْرَة يْطِيحْ فَاَلْنَّارْ وْ فَلْمَاء.
16
وْ جَبْتَهْ لَتْلاَمْذَكْ بَصَّحْ مَانَجْمُوشْ يْبَرُّوهْ".
17
جَاوْبْهُمْ يَسُوعْ وڤَالْ: "يَاهَادْ اَلْجِيلْ لِمَا عَنْدَهْشْ إِيمَانْ، حَتَىّ لْوِينْتَى غَاذِي نَتْحَمَّلْكُمْ ؟ ڤَدْمُوهْلِي هْنَّا !".
18
انتهْرَهْ يَسُوعْ، وْ خْرَجْ مَنَّهْ اَلْشَيْطَانْ. وْبْرَى اَلْوَلْدْ فِي دِيكْ اَلْسَاعَه
19
وْمَمْبَعْدْ ڤَدْمُوا اَلْتَلاَمَذْ عَنْدْ يَسُوعْ وْسَقْسَاوَهْ غِيرْ بِينْهُمْ وْ بِينَهْ وْ ڤَالُوا : " عْلاَشْ حْنَا مَانَجَمْنَاشْ نْحَرْجُوا اَلْرُوحْ اَلْشَرِيرَة ؟".
20
وْ ڤَالَلْهُمْ :" بَسْبَابْ قَلَة إيمَانْكُمْ. وْ نْڤُولْكُمْ اَلْحَقْ: إِلاَ كَانْ عَنْدَكُمْ إِيمَانْ قَدْ حَبَّة اَلْخَرْذَلْ ، غَاذِي نْڤُولْ لْهَادْ اَلْجْبَلْ: تْحَوَلْ مَنْ هْنَا رُوحْ لْهِيهْ غَاذِي يَتْحَوَلْ وْ مَاكَانْ حْتَى حَاجَة مُحَالْ عْلِيكُمْ.
21
وْ بَصَّحْ هَاذْ اَلْنَّوْعْ مَالَرْوَاحْ مَا يَخْرُجْشْ غِيرْ بِاَلْصَلاَة وَ اَلْصُوْمْ"
22
وْ كِكَانُوا مُجْتَمْعِينْ فِي اَلْجَلِيلْ ڤَالْهُمْ يَسُوعْ :" إِبْنْ اَلْإِنْسَانْ غَاذِي يَتْسَلَّمْ لْيَدِّينْ اَلْنّاسْ
23
وْ غَادِي يَكْتْلُوهْ، وَ فِي اَلْنَّهَارْ اَلْثَالث غَاذِي يْنُوضْ". وْ حَزْنُوا اَلْتلاَمَذْ بَزَّافْ. ضَريبةِ اَلْهَيْكَلْ
24
وْ كِوَّلاَيَسُوع وْتْلاَمَذْ هْ لْكَفْرْ نَاحُومْ جَاوْ مَّالِينْ اَلْضْرِيبَةْ تَاعْ بِيتْ اَلْلَّه عَنْدْ بُطْرُسْ وَ سَقْسَاوَهْ :" اَلْمُعَلِّمْ نْتَاعْكُمْ مَا يْخَلَّصْشْ اَلْضَرِيبَة تَاعْ بِيت اَلْلَّه ؟".
25
وْجَاوَبْهُمْ :"وَاهْ غَاذِي يْخَلَصْهَا ". وْ كِدْخَلْ لَدَّارْ سَبْڤَهْ يَسُوعْ وْ ڤَالْهْ :" وَاشْ تْخَمَّمْ يَا سَمْعَانْ ؟ مَنْ عَنْدْ مَنْ يَدُّوا مُلُوكْ اَلْأرْضْ اَلْضْرِيبَة وْ لاَ اَلْجِيزْيَّة، مَنْ عَنْدْ اَلْبَرّانِي ؟"َ.
26
وْجَاوْبَهْ بُطْرُسْ: "مَاَلْبَرَّانِي ". و ڤُالَهْ يَسُوعْ :"عْلَىَ هَادْ اَلْشِي وْلاَدْهُمْ رَاهُمْ مَعْفِيِّينْ مَا اَلْضَرِيبَة.
27
وْ بَصَّحْ بَاشْ مَا تَتْسَبُوشْ فِي مُشْكِلْ، رُوحْ لَلْبْحَرْ وْقِيسْ اَلْصَّنَارَة، و اَلْحُوتَه اَلْلَوْلَىَ لِغَاذِي تْشَدْهَا، حَلَلْلَهَا فُمْهَا وْ غَاذِي تَلْقَى فِيهْ رَبْعَة تَاعْ اَلْدْرَاهَمْ ، دِّيهُمْ وْ رُوحْ خَلَّصْ عْلِيكْ وْ عْلِيَّا.