الاصحاح 10
1
مَنْ بَعْدْ عَيَّطْ لَتَّلَامِيذْ الطنَاعَشْ وَ عْطَاهُمْ سُلْطَانْ عْلَى الْأَرْوَاحْ الْنَّجِسَة بَاشْ يْخَرْجُوهَا، وْ يَشْفِيوْ مْكُل مَرْضْ و مْكُلْ ضُعْفْ
2
وَ سْمِيَاتْ تَاعْ طنَاعَشْ تَلْمِيذْ هِيَ: هَذِي الْلَّوَلْ سَمعَانْ لِّي يَنْڨَالَّهْ بُطْرُس،وانْدْرَاوُسْ خُوهْ. و يَعْقُوبْ بَنْ زَبَدِي، وْ يُوحَنَّا خُوهْ.
3
فِيلِبُوسْ، وْبَارْثُولْمَاوَسْ. تُومَا، مَتَّى مُولْ الْضْرِيبَة، يَعْقُوبْ بَنْ حَلَفِي، تَدَّاوُسْ.
4
سَمْعَانْ الْقَنَاوِي، وْ يَهُودَا الْاسْخَرْيُوطِي الِّي خَانَه.
5
هَادُوكْ الْطْنَاعَشْ رْسَلْهُمْ يَسُوعْ وْ وَصَّاهُمْ وْ ڨَالْهُمْ:" مَتْرُوحُوشْ عَنْدْ الْشُّعُوبْ الِّي مَشِي يْهُودْ، وْ مَتَدُّخْلُوشْ مْدِينَة الْسَامِرَة.
6
بَصَّحْ رُوحُوا لْعَنْد الْخِرْفَانْ الْمْوَدْرِينْ الِّي مَنْ شَعْب اسْرَائِيل.
7
وْ فَطْرِيڨْكُمْ خَبْرُوا الْنَّاسْ: بَلِّي الْوَقْت نْتَاعْ مَلَكُوتْ الْسَّمَواتْ ڨَرَّبْ
8
بَرُّوا الْمَرْضَى. طَهْرُوا الِّي فِيهُم الْبْرَصْ. وْ حَيِّيوْ الموتى. وْ خَرْجُوا الْارْوَاحْ الْشَّرِيرَة.
9
دِيتُوا بْلَاشْ أَيَّ اعْطُوا بْلَاشْ. وْ مَتَدُّوشْ فِي جْيُوبْكَمْ لاَ ذْهَبْ وْلَا فَضَّة وْلَا نْحَاسْ،
10
وْ لَا رَزْمَة لَلْطْرِيڨ وْ لَا زُوجْ لَبْسَات وْ لَا صَبَابَط وْ لَا حَتَّى عْصَا، عْلَا خَاطَرْ الْخَدَّامْ يَسْتَاهَل مَاكْلَتَّه.
11
"و الْمدِينَة وْ لَا الْدُّوَارْ الِّي تَدَّخْلُوهُم سَقْسُوا عْلَى لِشْكُونْ يَسْتَاهَل، إِضَيَفْكُم و ڨُعْدُوا عَنْدَه حَتَّى لِتُخُرْجُوا مَنْتَم.
12
و اذَا دْخَلْتُوا الْشِي دَارْ سَلْمُوا عْلَى مَّالِيهَا،
13
و الَا كَانُوا مَّالِينْ الْدَّار يَسْتَاهْلُوا سْلَامْكُم، أَيْ سْلاَمْكُمْ يَوْصُلْهُمْ وْ إِلَى مَا كَانُوشْ يَسْتَاهْلُوا ، سْلاَمْكُمْ يْوَلِّيلِكُمْ
14
وْلِّي مَايَقْبَلْكُمْشْ وْ مَا يَسْمَعْشْ كْلاَمْكُمْ أَخُّرْجُوا مَنْ دَارَهْ وْمَنْ دِيكْ المْدِينَة، وْ أَنَّفْظُوا الغُبْرَة الِّي فِي رْجْلِيكُمْ .
15
نْڨُولْكُمْ الْحَقْ :" حَالَة سَدُومْ وْ عَمُّورَة غَادِي تْكُونْ قَلْ مَنْ حالة هديك المدينة.
16
غَادِي نَرْسَلْكُمْ كِمَا الغْنَمْ فِي وَسْطْ الذْيُوبَ ، كُونُوا حُكَمَا كِلْفَاعِي وْ ظْرَيْفِينِ كِي الْحْمَامْ .
17
أَحَّرْزُوا أَرْوَاحْكُمْ مَالْنَّاسْ، عْلَى خَاطَرْ غَادِي يْسَلْمُوكُمْ لَلْمْحَاكَمْ، وْ فِي دْيُورْهُمْ تَاعْ الصْلاَةْ غَادِي يْضَرْبُوكُمْ وْ يَجَّلْدُوكُمْ.
18
وْغَادِي يْجَرُّوكُمْ ڨُدَّامْ الحُكَامْ و ْالْمْلُوكْ عْلَى جَالِي شْهَادَة لِيهُمْ وْ لَنَّاسْ وْ لْمَاشِي يْهُودْ.
19
وْ كِي يَدِّيكُمْ مَا تَتْقَلْقُوشْ كِيفَاشْ وْ لاَ وَاشْ غَادِي تَهَّدْرُوا ،
20
بَصَّحْ الْرُّوحْ تَعْ بُوكْمْ الِّي فِي السْمَا هُوَ الِّي غَادِي يَعْطِيكُمْ الْكْلاَمْ لِّي تْڨُولُوهْ
21
وْ غَادِي الْخُو يْسَلَّمْ خُوهْ، وَ الْبُو يْسَلَّمْ وَلْدَهْ وْ الْوْلاَدْ يْنُوضُو ضَدْ وَالْدِيهُمْ وْ يُكَّتْلُوهُمْ ،
22
وْ غَادِي تْكُونُوا مَكْرُوهِينْ مَالنَّاسْ عْلىَ جَالْ إِسْمِي. بَصَّحْ لِيْصْبُرْ حَتَّى التَّالِي وْ يَثْبَتْ فِيَّ غَادِي يَسْلَكْ .
23
وْ كِيْطَرْدُوكُمْ مَنْ هَادْ الْمْدِينَة هَرْبُوا لْوَحْدُ أُخْرَى. الْحَقْ نْڨُولْكُمْ : " مَا غَادِيشْ تْكَمْلُوا مْدُنْ اسْرَائيلْ حَتَّى يْجِي ابْن الْإِنْسَانْ.
24
"مَشِّي الْتِّلْمِيذْ خِيرْ مَنْ مْعَلَّمْ، تَاعَهْ وْ مَشِّي الْعَبْدْ خِيرْ مَنْ سِيدَه.
25
بَرَكَا عْلَى التَّلْمِيذْ إِكُونْ كِمَا مُعَلِّمْ تَاعَهْ ،و ْلاَ الْعَبْدْ كَمَا سِيدَهْ. وْلِّي سَمَّاوَهْ مُولْ الْدَّارْ بَعْلَزَبُولْ، مَالِينْ الْدَّارْ كِيفَاشْ غَادِي يْسَمُّوهُمْ!
26
مَا تْخَافُوهُمْشْ. عْلَى خَاطَرْ ڨَاعْ لْمَسْتُورْ غَادِي يَعَّرْفُوهْ، وْ ڨَاعْ لْمَدْسُوسْ غَادِي يْبَانْ.
27
وْعْلَى دَاكْ الشِّي ڨَاعْ لِنْڨُولَهَلْكُمْ فِالظَّلْمَة ڨُولُوهْ فَالنُّورْ، وْ لِّي تْسُمُعُوهْ بْوَذْنِيكُمْ بَرْحُوا بِيهْ فُوڨْ السْطُوحْ،
28
مَا تْخَافُوشْ مَنْ هَادُوكْ لِيكَتْلُوا الجَسَدْ وْ مَا يَقَّدْرُوشْ يَكَّتْلوُا الْرُّوحْ ، بَصَّحْ خَافُوا مَنْ هَادَاكْ الِّي قَادَرْ يَهْلَكْ الْرُوحْ وْ الجَسَدْ فِي زُوجْ فِي جَهَنَّمْ.
29
مَشِّي زُوجْ زْوَاوَشْ يَنْبَاعُو بْدِينَارْ؟ وْ غَادِي مَا يْطِيحْ عْلَى لَرْضْ حَتَّى وَاحَدْ فِيهُمْ إِلاَ إِذَ بْغَا بُوكُمْ الِّي فَالْسْمَا. وْ
30
بَصَّحْ نْتُمَا حَتَّى شْعَرْ رَاسْكُمْ رَاهْ ڨَاعْ مَحْسُوبْ.
31
مَا تْخَافُوشْ! رَاكُمْ نْتُمَا خِيرْ مَنْ بَزَّافْ الزْوَاوَشْ!
32
ڨَاعْ لِيَسْـتَعْرَفْ بِيَا ڨُدَّامْ النَّاسْ ، نَسْتَعْرَفْ بِيهْ ڨُدَّامْ بُويَا الِّي فَالْسْمَا،
33
وْ لِّي يَنْكَرْنِي ڨُدَّامْ النَّاسْ نَنُّكْرَهْ ڨُدَّامْ بُويَا الِّي فَالسْمَا
34
مَا تَحَسْبُوشْ جِيتْ بَاشْ نْدِيرْ لَهْنَا فَالأَرْضْ. مَاشِّي لَهْنَا بَصَّحْ السِّيفْ .
35
جِيتْ بَاشْ نْفَرَّقْ الوَلْدْ عْلَى بُوهْ، وْ بِينْ البَنْتْ وَ مْهَا، وْ بِينْ الكَنَّة و عْجُوزَتْهَا.
36
لْعَدْيَانْ تَعْ بْنَادَمْ لْعَايْلَة تَعَهْ.
37
أَلِّي يَبْغِي بُوهْ وَ لاَّ مَهْ كْثَرْ مَنِّي مَا يَسْتَهَلْنِيشْ، وْ لِي يَبْغِي بَنْتَهْ وَلَّا وَلْدَه كْتَرْ مَنِّي مَا يَسْتَهَلْنِيشْ،
38
وْلِمَيَرْفَذْشْ صَلِيبَهْ وَ يْتَبَّعْنِي مَا يَسْتَهَلْنِيشْ.
39
عْلَى خَاطَرْ لِبْغَى يَرْبَحْ حْيَاتَهْ يَخْسَرْهَا ، وْ لِيَخْسَرْهَا عْلَى جَالِي غَادِي يَلْقَاهَا.
40
ِليَقْبَلْكُمْ يَقْبَلْنِي، وْ لِيَقْبَلْنِي يَقْبَلْ لِرْسَلْنِي .
41
وْ لِيَقْبَلْ كَاشْ نْبِيْ وْ هُوَ عَارَفَهْ نْبِي غَادِي يَاخَذْ أَجَرْ كِمَا تَعْ نْبِيْ ، وْالِّي يَقْبَلْ بْوَاحَدْ مَتَقِّي الله وْ هُوَ عَارَفَهْ مَتَقِّي الله غَادِي يَاخَذْ أَجْرْ كِمَا تَاعْ مَتَقِّي الله،
42
وَ الِّي إِيمَدْ غِيرْ كَاسْ مَاء بَارَدْ لْهَادُوكْ الصْغَارْ بْسَمْ غِيرْ تَلْمِيذِ ، الحَقْ نْڨُولْكُمْ :هَادَا مَا غَادِيشْ إِضِيعْ أَجْرَهْ".