الإصحاح 8
1
وُالشِي أَلِي يْهَمْ فِي هَدْ اَلشِي ڤَاعْ، هُوَ أَنُو عَنْدْنَا رَايَسْ كَهَنَة قَدْ هَذَايَا، وُرَاهْ مْجَمَعْ عْلَى يَمِينْ عَرْشْ الله اَلْعَظِيمْ فَى السْمَا.
2
وُيَخْدَمْ فَي اَلْمَوْضِعْ لَمْقَدَسْ وُالْهَيْكَلْ لِي بْنَاهْ اللهْ وُمَاشِي بْنَادَمْ.
3
عْلَخَاطَرْ كُلْ رَايَسْ كَهَنَةْ تَنْدَارْ بَاشْ يَمَدْ اَلذَبِيحَةْ وَالْقَرَابِينْ، وُمَنْبَعَدْ كَانْ لاَزَمْ عْلِيهْ يْمَدْ تَقْدِيمَة عْلَجَالَهْ.
4
وُلُوكَانْ اَلْمَسِيحْ جَا مَنْ اَللَرْضْ وُمَكَانَشْ رَاحْ يْكُونْ كَاهِنْ، عْلَخَاطَرْ فِيهْ كَهَنَةْ لِي يْمَدُو اَلذَبِيحَة عْلَى حِسَابْ اَلشَرِيعَة،
5
وُالْكَهَنَة يْخَدْمُو فْي بِيتْ اللهْ اَلْلِي يَشْبَهْ اَلسْمَا، لِي بْنَاهْ مُوسَى كِيمَا وَحَى لِهْ اللهْ فِي الَجْبَلْ. عْلَخَاطَرْ ڤَالَهْ: «دِيرْ كُلْشِي عْلَى حْسَابْ وَاشْ نْوَرِيهُلَكْ فِي الَجْبَلْ».
6
وُدُرْوَكْ رَاهْ عَنْدَهْ خَدْمَةْ خِيرْ مَنْ تَاعْ اَلْكَهَنَة عْلَخَاطَرْ هُوَ لِي يَتْوَسَطْ لْعَهْدْ خِيرْ وُعَظِيمْ لِي قَايَمْ عْلَى وُعُودْ مْخَيْرَةْ.
7
لُوكَانْ اَللَوَلْ كَانْ مَنْ غِيرْ عِيبْ، مَايْكُونْشْ عَهْدْ وَاحَدْ آخَرْ.
8
وُكَانْ اللهْ يْلُومْ فَى اَلشَعْبْ وَيْقُولْهُمْ: «رَاهِي جَايَةْ يَامَاتْ يْقُولْ اَلرَّبْ، وِينْ نَبْدَا عَهْدْ جْدِيدْ مْعَ بَنِي إِسْرَائِيلْ وبَنِي هَارُونْ،
9
مَاشِي كِيمَا اَلْعَهْدْ اَلْلِي دَرْتَهْ مْعَ جْدُودْهُمْ نْهَارْ لِي خْرَجْتْهُمْ مَنْ مَصْرْ، عْلَخَاطَرْ مَاثَبْتُوشْ فَي الْعَهْدْ نْتَاعِي، وَأنَا تْخَلِيتْ عْلِيهُمْ يْقُولْ اَلرَّبْ.
10
عْلَخَاطَرْ هَدَا هُوَ اَلْعَهْدْ نْتَاعِي لِي نَعْهَدْ بِيهْ بَنِي إِسْرَائِيلْ مَنْبَعَدْ هَدِيكْ اَلْيَامَاتْ، يْقُولْ اللهْ: رَاحْ نْدِيرْ اَلشَرِيعَةْ نْتَاعِي فَي الْفِكْرْ نْتَاعْهُمْ، وُنَكْتَبْهَا فَي قْلُوبْهُمْ، وَأنَا نْكُونْ لْهُمْ رَّبْ وُهُمْ يْوَلُو اَلشَعْبْ نْتَاعِي.
11
وُحَتَى وَاحَدْ مَايَعْلَمْ لاَ جَارَهْ لاَ خُوهْ يْقُولُوا: اَعْرَفْ اللهْ، عْلَخَاطَرْ ڤَاعْ رَاحْ يْعَرْفُوا اللهْ مَنْ صْغِيرْهُمْ لَكْبِيرْهُمْ.
12
وُرَاحْ نَغْفَرْ ذْنُوبْهُمْ، وُمَانَتْفَكَرْشْ اَلْخَطَايَا نَتَعْهُمْ لِي دَارُوهَا».
13
وُإِلاَ ڤَالْ «عَهْدْ جْدِيدْ» مَعْنَتْهَا اَللَوَلْ قْدِيمْ، وُاَلْلِي قْدِيمْ وشَاخْ
رَاحْ يَفْنَى.