الإصحاح 2
1
عْلَى هَادْ اَلشِي لاَزَمْ نْرَدُو بَالْنَا عْلَى وَاشْ سْمَعْنَا بَاشْ مَانْفَوْتُوهْشْ وُمَانْبَعْدُوشْ عْلَى اَلْحَقْ،
2
عْلَخَاطَرْ إِلاَ كَانْ الَكْلاَمْ لِي تْكَلْمُو بِيهْ اَلْمَلاَيْكَا تْحَقَقْ، ڤَاعْ وَاحَدْ لِي تْعَدَى عْلَى الَكْلاَمْ وُعْصَاهْ نَالْ اَلْعِقَابْ لِي يَسْتَهْلَهْ.
3
مَلاَ، كِيفَاشْ رَاحْ نْسَلْكُوا حْنَا إِلاَ اَسْتَهْزِينَا وُمَقْبَلْنَاشْ هَادْ لَسْلاَكْ الَكْبِيرْلِي اَلرَّبْ تْكَلَمْ بِيهْ فَي اَللَوَلْ، وُمَنْبَعَدْ شَهْدُوا بِيهْ لِي سَمْعُوهْ،
4
وَالله شْهَدْ مْعَاهُمْ بَالْعَلاَمَاتْ وُأَيَاتْ وُمُعْجِزَاتْ كْثِيرَة وُبِمَوَاهِبْ نْتَاعْ اَلرُّوحْ اَلْقُدُسْ كِيمَا بْغَا.
5
وُالله مَامَدْشْ اَلْعَالَمْ لِي جَايْ لَلْمَلاَيْكَا بَاشْ يَتْحَكْمُو فِيهْ.
6
بَصَحْ وَاحَدْ شْهَدْ وُڤَالْ فَي كْتَابْ الله: «أَشْكُونْ هُوَ الَبْنَادَمْ حَتَى تَتْفَكْرَهْ؟ وَلاَ وَلْدْ اَلبْنَادَمْ بَاشْ تَتْهَلَى فِيهْ؟
7
رَدِيتُو قَلْ مَنْ اَلْمَلاَيْكَا لِوَقْتْ قْصِيرْ. وُمَنْبَعَدْ عْطِيتْلُو اَلْعَزْ وُالْكَرَامَة، وُرَدِيتْ ڤَاعْ الَخْلِيقَة بِينْ يَدِيهْ.
8
وُخَلِيتْ كُلْ شِي يْوَلِي تَحْتْ رَجْلِيهْ». عْلَخَاطَرْ عْطَالَهْ كُلْشِي وُمَا خَلاَشْ أَيِ شِي غِيرْ خَاضَعْ لِيهْ، حَتَى وَإْلاَ رَانَا نْشُوفُو بَلِي مَزَالْ مَاشِي كُلْ شِي لِرَاهْ خَاضَعْ لَهْ.
9
بَصَحْ لِي تَنْدَارْ قَلْ عْلَى اَلْمَلاَيْكَة لْوَقْتْ قْصِيرْ، يَعْنِي يَسُوعْ، نْشُوفُوهْ مْكَلَلْ بْتَاجْ اَلْعَزْ وُالْكَرَامَة، عْلَجَالْ تْأَلَمْ وُمَاتْ بَاشْ كُلْ بْنَادَمْ يْذُوقْ نِعْمَة الله بِيهْ.
10
وُبْهَدَاكْ اَلشِي لِي خَدْمَهْ الله وُهُوَ بِيهْ وْلِيهْ كُلْ شِي، جَابْ بَزَافْ وْلاَدْ لَلْعَزْ، بَاشْ يَكَمَلْ رَئِيسْ اَلْخَلاَصْ سْلاَكْهُمْ مَتْعَذَبْ.
11
عْلَخَاطَرْ لِي يْقَدَسْ وَلِي تْقَدْسُو ڤَاعْ مَنْ وَاحَدْ، عْلَى هَدْ اَلشِي سْمَاهُمْ خُوتْ بْلاَمَا يَحْشَمْ،
12
وُڤَالْ: «نْخَبَرْ أَسْمَكْ لْخُوتِي، وُفْوَسْطْ الَجْمَاعَة نْسَبْحَكْ».
13
وُزَادْ ڤَالْ: «نَتْكَلْ بَرْكْ عْلِيهْ». وُتَانِي:«رَانِي مْعَ لَوْلاَدْ لِي عْطَاهُمْ لِي الله».
14
وُكِيمَا لَوْلاَدْ تْشَارْكُو بَلْحَمْ وُدَمْ، مَلاَ حَتَى هُوَ شَارَكْ مْعَهُمْ فِي كُلْشِي ، بَاشْ بَالْمُوتْ نْتَاعَهْ يَتْغَلَبْ عْلَى إِبْلِيسْ لِي عَنْدَهْ سُلْطَانْ اَلْمُوتْ،
15
وُيْحَرَرْ هَدُوكْ اَلنَّاسْ أَلِي بَسَبَة اَلْخُوفْ مَنْ اَلْمُوتْ عَاشُو ڤَاعْ حْيَاتْهُمْ عَبِيدْ لَلْخُوفْ.
16
عْلَخَاطَرْ فَي اَلصَحْ مَاجَاشْ يْعَاوَنْ اَلْمَلاَيْكَة، بَصَحْ جَا بَاشْ يْعَاوَنْ وْلاَدْ إِبْرَاهِيمْ.
17
عْلَى هَدِي، كَانْ لاَزَمْ يَشْبَهْ خَوْتَهْ فِي كُلْ شِي، بَاشْ يْكُونْ رَحِيمْ، وُرَايَسْ تَاعْ اَلْكَهَنَة أَمِينْ فَي صْوَالَحْ الله بَاشْ يَطَهَرْ اَلشَعْبْ مَنْ ذْنُوبْهُمْ،
18
عْلَخَاطَرْ فَي الشِي لِي هُوَ مْجَرَبْ وُتْأَلَمْ بِيهْ، يْطِيڤْ يْعَاوَنْ لِي تْجَرْبو.