الاصحاح 10
1
عْلَخَاطَرْ اَلشَرِيعَة، كَانَتْ بَرْكْ تَرْمَزْ لَلصْوَالَحْ لَمْلاَحْ لِي رَاحْ يْجِيوْ، عْلَى هَدِي مَايْقَدْرُوشْ بَالذَبِيحَةْ لِي يْقَدْمُوهَا دِيمَا دُورْ اَلْعَامْ، تْخَلِي الَبْنَادَمْ لِيْقَدَمْهَا كَامَلْ.
2
مَلاَ لُوكَانْ مَزَالَتْ اَلدْنُوبْ تَتْنَقَى بَالذْنُوبْ، مَاشِي كُنَا مَازَلْنَا نْمَدُو اَلذَبِيحَة؟، وَعْلَخَاطَرْ لِي مَدُوهَا دُرْوَكْ تْنَقَاوْ بَالذَبِيحَةْ خَطْرَةْ وَحْدَةْ، يَعْنِي ضَمِيرْهُمْ تْنَقَا.
3
بَصَحْ يَتْفَكْرُو دْنُوبْهُمْ كُلْ عَامْ.
4
عْلَخَاطَرْ مُحَالْ دَمْ اَلْحَوْلِي وَالْعَتْرُوسْ يَنَقِيوْ اَلْخَطَايَا.
5
عْلَى هَدْ اَلشِي كِي جَا الْمَسِيحْ لَدَنْيَا ڤَالْ: «مَابْغِيتْشْ يَارَبِي ذَبِيحَةْ وَلاَ عَطِيَةْ، بَصَحْ رَاكْ دَرْتْلِي جَسَدْ،
6
أَنْتَ يَارَبِي مَاتَفْرَحْشْ بَذَبِيحَةْ وُالَقْرَابِينْ.
7
وُمَنْبَعَدْ ڤُولْتْ: رَاحْ نْجِي. عْلَخَاطَرْ مَكْتُوبْ عْلَيَا فْى لَكْتَابْ، بَاشْ نْدِيرْ مَشِيئْتَكْ يَاللهْ».
8
عْلَخَاطَرْ كَانْ ڤَالْ: «أَنْتَ يَارَبِي مَاتَبْغِيشْ وُمَاتَفْرَحْشْ بَذَبِيحَةْ وَلاَ عَطِيَةْ تَاعْ اَلْخَطِيَةْ». اَلْلِي تَتْمَدْ عْلَى حْسَابْ وَاشْ تْڤُولْ اَلشَرِيعَةْ.
9
وُزَادْ ڤَالْ: «رَاحْ نْجِي بَاشْ نْدِيرْ مَشِيئْتَكْ يَاللهْ». يَتْنَحَى اَللَوَل ْوُيَثْبَتْ اَلزَاوَجْ.
10
وُبْهَادْ اَلْمَشِيئَةْ نْتَاعْ اللهْ وَلِينَا مْقَدْسِينْ بِيَسُوعْ اَلْمَسِيحْ لِي قَدَمْ نَفْسَهْ ذَبِيحَةْ خَطْرَةْ وَاحْدَةْ.
11
وُكَانْ كُلْ كَاهَنْ زْمَانْ يْقَدَمْ بَزَافْ اَلْخْطْرَاتْ اَلذَبَايَحْ اَلْلِي كَانَتْ مُحَالْ تْنَقِي الَبْنَادَمْ وُتْنَحِي اَلْخَطِيَة.
12
وُبَصَحْ يَسُوعْ كِي قَدَمْ نَفْسَهْ ذَبِيحَةْ عْلَى اَلدُنُوبْ خَطْرَةْ وَاحْدَةْ، جْمَعْ عْلَى يَمِينْ اللهْ لِلَبْدَا،
13
وَيْجِي وَقْتْ وِينْ عَدْيَانَهْ يْوَلِيوْ تَحْتْ رَجْلِيهْ.
14
عْلَخَاطَرْ بَذَبِيحَةْ وَاحَدْ جَابْ لِلَكْمَالْ هَدُوكْ لِي قَدَسْهُمْ.
15
وَالرُّوحْ اَلْقُدُسْ يَشْهَدْ تَانِي لِينَا، مَنْبَعَدْ كِي ڤَالْ:
16
«هَدَا هُوَ اَلْعَهْدْ لِي نْدِيرَهْ مْعَاهُمْ مَنْ هَدَاكْ اَلزْمَانْ، يْڤُولْ اَلرَّبْ، نْدِيرْ اَلشَرِيعَةْ تَاعِي فَي قْلُوبْهُمْ وُنَكْتَبْهَا فَي عْقُولْهُمْ.
17
وُمَانْتْفَكَرْشْ ذْنُوبْهُمْ وُلْخَطَايَا تَاعْهُمْ بَعْدْ هَدْ اَلشِي».
18
عْلَخَاطَرْ وِينْ يْكُونْ اَلْغُفْرَانْ لَلدُنُوبْ، مَاتْكُونْشْ ذَبِيحَةْ عْلَجَالْ هَدُوكْ اَلدُنُوبْ.
19
مَلاَ يَاخُوتِي، دُرْوَكْ عَنْدْنَا اَلثِقَةْ بَاشْ نَدَخْلُو لَلْمَوْضِعْ « لْمُقَدَسْ» بَدَمْ يَسُوعْ،
20
بَالطْرِيڤْ لَجْدِيدْ لِي فِيهْ لَحْيَاةْ لِي وَجْدَهْ لِنَا، بَلْحِجَابْ، يَعْنِي اَلْجَسَدْ نْتَاعَهْ،
21
وُكَاهَنْ كْبِيرْ وُعَظِيمْ عْلَى بِيتْ اللهْ،
22
مَلاَ نَتْقَدْمُو لْعَنْدَهْ بْقَلْبْ صَافِي مْعَمَرْ بَالْإِيمَانْ، وَقْلُوبْ نْقِيَةْ مَنْ اَلشَرْ، وُأَجْسَادْنَا مَغْسُولَةْ بِمَا نْقِي.
23
وُيْخَصْنَا نْكُونُو ثَابْتِينْ فَي الرَّجَاءْ نْتَاعْنَا، عْلَخَاطَرْ اللهْ لِي وْعَدْنَا أَمِينْ فِي اَلْوَعْدْ نْتَاعَهْ.
24
مَلاَ يْخَصْنَا نَهْتَمُو بِبَعْضْيَاتْنَا وُنَتْشَجْعُو بَاشْ نَتْحَابُو وُنْدِيرُو اَلْخِيرْ،
25
وُماَنْخَلِيوْشْ اَلْإِجْتِمَاعَاتْ نْتَاعْنَا كِيمَا يْدِيرُو شِي نَاسْ، بَصَحْ كُلْ وَاحَدْ يَشَجَعْ خُوهْ، وُخَاصَةْ أَنُو يُومْ اَلرَّبْ رَاهْ قْرِيبْ.
26
عْلَخَاطَرْ إِلاَ عْرَفْنَا اَلْحَقْ وُزَدْنَا دْنَبْنَا بَالْعَانِي، مَابْقَاتْشْ ذَبِيحَةْ لِي تَغْفَرْ اَلدْنُوبْ،
27
بَصَحْ اَلْوَاحَدْ يْقَارَعْ بَالْخُوفْ نْهَارْ اَلْحِسَابْ وُالنَارْ اَلْقَاسِيَةْ لِي تَحْرَقْ اَلنَاسْ لِي تْمَرْدُو عْلَى اللهْ.
28
وُكَانْ لِي خَالَفْ شَرِيعَةْ مُوسَى، كَانُو يْقَتْلُوهْ مَنْ غِيرْ رَحْمَةْ إِلاَ شَهْدُو زُوجْ وَلاَ ثْلاَثَةْ مَنْ اَلنَاسْ عْلِيهْ.
29
مَلاَ أَشْحَالْ تْخَمُوا بَلِي لاَزَمْ يَتْعَاقَبْ لِي يَعْفَسْ عْلَى إِبْنْ اللهْ، وُحَسْبْ دَمْ اَلْعَهْدْ لِي تْقَدَسْ بِيهْ نَجَاسَةْ، وُزَادْ يَشْتَمْ فَي رُّوحْ اَلنِعْمَةْ؟
30
وَحْنَا نْعَرْفُو لِي ڤَاْل: «أَنَا لِي نَدِي اَلتَارْ، أَنَا لِي نْجَازِي، يْڤُولْ اَلرَّبْ». وُتَانِي: «اَلرَّبْ يْحَاسَبْ شَعْبَهْ».
31
وُأشْحَالْ يْخَوَفْ كِي اَلْوَاحَدْ يْطِيحْ فِي يَدِينْ اللهْ اَلْحَيْ!
32
بَصَحْ أَتْفَكْرُوا يَامَاتْ اَللَوْلِينْ وِينْ عْرَفْتُو اَلنُورْ، جَاهَدْتُو وُصْبَرْتُو بَزَافْ عْلَى عْذَابْكُمْ.
33
وُرَاكُمْ مَنْ جِهَةْ مَعْرُوفِينْ بْوَاشْ عَيْرُوكُمْ وُتْعَدَبْتُو، وُمَنْ جِهَةْ خْرَى رَاكُمْ وَلِيتُو مْشَارْكِينْ مْعَ لِي سَبْقُوكُمْ وُتْعَدْبُوا عْلَجَالْ إِسْمْ اللهْ.
34
وَنْتُمْ رَاكُمْ شَارَكْتُو لْمَسْجُونِينْ عْدَابْهُمْ، وُقْبَلْتُو بَالْفَرْحَةْ كِي نَحَوَلْكُمْ دْرَاهَمْكُمْ، عْلَخَاطَرْ عَارْفِينْ بَلِي عَنْدْكُمْ كَنْزْ عَظِيمْ وُمَايَفْنَاشْ فَى السَمَوَاتْ،
35
مَلاَ مَاتَتْخَلاَوْشْ عْلَى هَدْ اَلثِقَةْ لِي عَنْدْهَا أَجْرْ كْبِيرْ.
36
عْلَخَاطَرْ رَاكُمْ مَحْتَاجِينْ تْصَبْرُو، بَاشْ كِي تْخَدْمُو مَشِيئَةْ اللهْ يْكُونْ لِيكُمْ لِي وَعْدَهْ لِكُمْ.
37
وُبَعْدْ وَقْتْ قْصِيرْ «رَاحْ يْجِي لِي نْقَارْعُولَهْ وُمَا يَبْطَاشْ.
38
وُالَبْنَادِيمْ لِي يَتَقِي اللهْ رَاهْ يْعِيشْ بَالْإِيمَانْ، وَإلاَ نْكَرْ إِيمَانَهْ، اللهْ مَايَفْرَحْشْ بِيهْ».
39
وُحْنَا مَاشِي كِيمَا هَدُوكْ لِتْخَلاَوْ عْلَى اَلْإِيمَانْ وُقَاسُو نْفُوسْهُمْ لَلَعْذَابْ، بَصَحْ حْنَا مَنْ هَدُوكْ لِي عَنْدْهُمْ اَلْإِيمَانْ بَاشْ يْرَبْحُو لَحْيَاةْ.