الَفَصَلْ الْخَامَسَ
1
كُوْنُو ثَابْتِينْ فَالْحُرِيَة الَلِّي حَرَّرْنَا لْمَسِيحْ بِهَا، وْمَاتْوَلُوشْ بَاشْ تْكُونُوْ عْبِيدْ.
2
أَنَا بُوْلُسْ وْنْڤُوْلْكُمْ: إِلَا غِيرْ خْتَنْتُو، لْمَسِيحْ مَايْنْفَعْكُمْ فِي وَالُوا!
3
وْنَشْهَدْ بَلِّي ڤَاعْ بْنَادَمْ لِيَتْخَتَنْ يْكُونْ لَزَمْ عْلِيهْ يْعِيشْ بَالَشَّرِيعَة.
4
وْإِلَا حْوَسْتُو تْبَرُرُ رْوَاحْكُمْ بَالَشَّرِيعَة رَاكُمْ ضَيَعْتُو الْمَسِيحْ، وْطْحْتُو مَالَنِّعْمَة.
5
وَحْنَا رَانَا بَالَرُّوحْ نْقَارْعُورَجَاءْ الْحَقْ بَالْإِيمَانْ.
6
عْلَى خَاطَرْ فَالْمَسِيحْ يَسُوعْ مَايْنْفَعْ لاَ لَخْتَانْ لاَ الْغُرْلَة ، بَصَّحْ يَنْفَعْ غِيرْ الْإِيمَانْ الَلِّي نْعِيشُوهْ بْالْمَحَبَةْ.
7
مَاقْبَلْ كُونْتُوا مْلِيحْ. مَلَا شْكُونْ حْبَسْكُمْ بَاشْ مَاتْطِيعُوشْ الْحَقْ؟
8
وْهَادْ الَشِّي مَاجَاشْ مَنْ عَنْدْ الله لِى دْعَاكُمْ.
9
«شْوِيَة خْمِيرَة تْخَلِي ڤَاعْ لَعْجِينْ يْتْخَمَرْ».
10
بَصَّحْ عَنْدِي ثِقَة فِيكُمْ فَالَرَّبْ بَاشْ مَتْقَبْلُوشْ حْوَايَجْ وَاحَدْ خْرِينْ. بَصَّحْ الَلِّي يَزْعَجْكُمْ غَادِي يَتْحَاسَبْ مَنْ عَنْدْ الله.
11
وْأَنَا يَاخُوْتِي إِلاَ كُنَتْ نْخَبَرْ بْشَّرِيعَةْ الْخِتَانْ، عْلَاهْ رَاهُمْ يَضْطَهْدُو فِيَّا؟ وْمُشْكِلْ الَصَلِيبْ تْنَحَى.
12
يَالَيْتْ هَادُو الَنَّاسْ الَلِّي يْقَلْقٌوكُمْ يْحَبْسُوا هَادْ الَشِّي لِيْدِيْرُوهْ!
13
وْرَاكُمْ يَاخُوتِي مَدْعُوِينْ بَاشْ تْكُونُو أَحْرَارْ. بَصَّحْ مَلَازَمْشْ لْحُرِيَة تَاعْكُمْ تْكُونْ بَابْ بَاشْ تْدِيرُالَشِّي الَلِّي مَايَرْضِيشْ الله، بَصَّحْ خَدْمُوا بَعْضِيَاتْكُمْ بَالْمَحَبَة.
14
عْلَى خَاطَرْ ڤَاعْ الَشَّرِيعَة نْكَمْلُوهَا فْكَلْمَة وَاحْدَةْ: «تْحَبْ قْرِيبَكْ كِرُّوْحَكْ».
15
وْإِلَا كُنْتُو كِى لَوْحُوشْ تَاكْلُو بَعْضِيَاتْكُمْ، مَلَا بَلَاكُو تَفْنَاوْ بَعْضِيَاتْكُمْ.
16
وْتَانِي نْڤُولْ: تْمَشَاوْ بَالَرُّوحْ وْمَاتَبْعُوشْ الَشَهْوَة تَاعْ الْجَسَدْ.
17
عْلَى خَاطَرْ الْجَسَدْ يَبْغِي الصْوَالَحْ الَلِّي مَايَبْغِيْهُومْشْ الَرُّوْحْ، وْالَرُّوْحْ هُوَ تَانِي ضَدْ الْجَسَدْ، وْكُلْ وَاحَدْ يْقَاوَمْ لاَخُرْ، حَتَّى تْدِيرُوا الَلِّي مَاتَبْغُوَهْشْ.
18
بَصَّحْ إِلاَ عَشْتُو بَالَرُّوحْ مَعَنْتْهَا مَارَاكُمْشْ تَحَتْ الَشَّرِيعَة.
19
وَالْأَعْمَالْ تَاعْ الْجَسَدْ بَايْنِينْ، الَلِّي هُمَا: الَزِنَى وَالْنَجَاسَة وْدَّعَارَة
20
لَعْبَادَة تَاعْ الْأَوْثَانْ سِحْرْ ،الْكَرَهْ ، لَمْخَاصْمَة لْغِيرَة وَالْأَنَانِيَة التَحَزُبْ الْبِدْعَة
21
لَحْسَدْ لَقْتِيلَةْ سَكْرَانْ وْالسَبَانْ وْغِيرْهَا، وْڤَاعْ لِيكِيمَا هَادُو نْزِيدْ نْڤُوْلْكُمْ تَانِي عْلِيهَا كِيمَا سْبَقْ وْڤُولْتَلْكُمْ تَانِي: الَنَّاسْ لِتْدِيرْ هَادْ الصَوَّالَحْ مَايْوَرْثُوْشْ مَلَكُوْتْ الله.
22
وْثَمْرْالَرُوحْ الْقُدُسْ هُوَ: مْحَبَة فَرَحْ لَهْنَا صْبَرْ لْطَافَةْ لَصْلَاحْ، لْإِيمَانْ
23
لْقَلْبْ الَصَافِي وْضَبْطْ الَنَفَسْ. وْمَكَاشْ أَيْ شَرِيعَة لِتَمْنَعْ هَادْ صْوَّالَحْ لَمْلَاحْ.
24
بَصَّحْ الَلِّي هُمْ فَالْمَسِيحْ صَلْبُو الْجَسَدْ تَاعْهُمْ مْعَ الْشَهْوَة تَاعَهْ.
25
لَا كُنَّا نْعِيشُو بَالْرُوحْ، لَازَمْ نْسَلْكُو تَانِي عْلَى حْسَابْ الَرُّوحْ.
26
مَلَازَمْشْ نْكُونُو مَغْرُورِينْ وَنْدَوْسُوا بِيْنَاتْنَا، وَنْحَسْدُو بَعْضِيَاتْنَا.