الإصحاح 18
1
مَنْبَعْدْ هَدَا رَاحْ بُولُس مَنْ أَثِينَا لْكُورَنْثُوسْ،
2
لْڤَا يَهُودِي آسْمَهْ أَكِيلاَ، بُنْطِيَّ الأَصْلْ، كَانْ غِيرْ كِيمَا جَا مَنْ إِيطَالِيَةَ، مْعَ بْرِيسْكِلاَّ مَرْتَهْ، عْلَى خَاطَرْ كُلُودِيُوسْ أَمَرْ يْطَرَّدْ ڤَاعْ الْيَهُودْ مَنْ رُومَا، وُجَا لْعَنْدْهُمْ.
3
وُمَلِي كَانْ عَنْدَهْ خَدْمَة كِيمَا هُمَا، خْيَاطَة لْخْيَامْ ڤْعَدْ عَنْدْهُمْ يَخْدَمْ مْعَهُمْ.
4
وُكَانْ كُلْ سَبْتْ يَتْنَاقَشْ فَالْمَجْمَعْ الْحَاضْرِينْ وُيْقَنَعْ يَهُودْ وُيُونَانِيِّينْ.
5
وُكِي وْصَلْ سِيلاَ وُتِيمُوثَاوسْ مَنْ مَكِدُونِيَّة، تْفَرَغْ بُولُسْ لَتَبْشِيرْ كَانْ يَشْهَدْ لَلْيَهُودْ بَالْمَسِيحْ يَسُوع.
6
وُهُمَا كَانُوا يْعَارْضُوهْ وُيْڤُولُوا كْلاَمْ مَاشِي مْلِيحْ نْفَضْ قَشَّاهْ وُڤَال لْهُمْ: " دَمْكُمْ عْلَى رِسَانْكُمْ! مَالْيُومْ أَنَا أَنْبَشَرْ اَلْأُمَمْ".
7
وُأَرْحَلْ مَنْ تَمْ لْوَاحَدْ اَلدَارْ تَعْ رَاجَلْ أَسْمَهْ يُوسْتُسْ، كَانْ يَعْبَدْ اللهْ، وُكَانَتْ دَارَهْ لَصْڤَا لَلْمَجْمَعْ.
8
وكْرِيسْبُسْ رَايَسْ الْمَجْمَعْ آمَنْ بَالرَّبْ هُوَ وَأَهْلْ دَارَهْ، وُبَزَافْ مَنْ الْكُورِنْثِيِّينْ كِي سَمْعُوا آمْنُوا وُتْغَطْسُوا.
9
وَالرَّبْ ڤَالْ لْبُولُسْ فِي رُؤْيَا فَالْلِيلْ: " مَا تْخَافْشْ أَهْدَرْ وُمَا تَسْكُتْشْ،
10
عْلَى خَاطَرْ رَانِي مْعَاكْ، وُوَاحَدْ مَا يَقْدَرْ يْمَسَّكْ، خَاطَرْ عَنْدِي شَّعْبْ كْثِيرْ فِي هَدْ لَمْدِينَة".
11
وُفَوَتْ عَامْ وُسَتْ شْهُورْ يْعَلَمْ بِينَتْهُمْ كَلِمَة الله.
12
وُكِي كَانْ غَالْيُونْ وَالِي تَعْ أَخَائِيَة، نَاضُوا الْيَهُودْ ضَدْ بُولُسْ برَأيْ وَاحَدْ، وُجَابُوهْ الْمَحْكَمَة
13
ڤَايْلِينْ:"هَدَا رَاهْ يْقَنَاعْ الْنَاسْ يَعْبْدُوا الله عْلَى خْلاَفْ اَلشَرِيعَة".
14
وُكِي بْغَى بُولُس يْجَاوَبْ، غَالِيُون ڤَالْ لَلْيَهُودْ: " يَا يَهُودْ، لُوْ كَانَتْ الْقَضِيَة ظُلْمْ وَلاَ خُبْثْ نَحْتَمَلْكُمْ كِيمَا يَقْضِي الْعَدْلْ.
15
وِ إِذَا كَانَتْ قَضِيَة كَلْمَة، وُأَسَامِي، وُشَرِيعَتْكُمْ، أَفْرِيوْهَا بِيْنَتْكُمْ. عْلَى خَاطَرْ مَانِيشْ بَاغِي نْكُونْ قَاضِي فِي هَدْ الْأُمُورْ".
16
مَنْ بَعْدْ طَرَدْهُمْ مَالْمَحْكَمَة.
17
وُڤَاعْ الْيُونَانِيِّينْ أَدَاوْ سُوسْتَانِيسْ رَايَسْ الْمَجْمَعْ، وُضَرْبُوهْ ڤُدَّامْ الْمَحْكَمَة، وُغَالْيُونْ مَا هَمَاهْشْ اَلشِي
18
وُبُولُسْ زَادْ قْعَدْ شْحَالْ مْلْ لِيَامْ، مَنْ بَعْدْ وَدَّعْ الْخُوتْ وُسَافَرْ مَلْ بْحَرْ لْسُورِيَّة، وُكَانْ مْعَهْ بِرِيسْكِلاَ وُأَكِيلاَ، مَنْ بَعْدْ مَا حَسَنْ رَاسَهْ فِي كَنْخَرِيَا عَلَى خَاطَرْ كَانْ دَارْ وَعْدْ لله.
19
وُكِي وَاصْلُوا لأَفَسُسْ خَلَهُمْ تَمَا وُهُوَ أَدْخَلْ مَجْمَعْ الْيَهُود وُتْكَلَمْ مْعَهُمْ .
20
وُطَلْبُوا مَنَه يْزِيدْ يْفَوْتْ وَقْتْ مْعَهُمْ وُهُوَ مَا بْغَاشْ.
21
وَدَّعْهُمْ وُڤَالْ: " لاَزَمْ عْلِيَا نْفَوَتْ الْعِيدْ الْجَايْ فِي أُورُشَلِيمْ. وُنَوْعَدْكُمْ نَرْجَاعْ عَنْدْكُمْ مَرَة أَخْرَى إِنْ شَاءَ الله". وُرَاحْ مَنْ أَفَسُسْ.
22
وكِي وْصَلْ لْقَيْصَرِيَّة طْلَعْ وُسَلَّمْ عْلَى الْكَنِيسَة، مَنْ بَعْدْ هَوَّدْ لْأَنْطَاكِيَة.
23
فَوَتْ وَقْتْ تَمَا مَنْ بَعْدْ رَاحْ يْزُورْ لَمْدُونْ فِي غَلاَطِيَّة وُفِرِيجِيَّة يْشَجَعْ ڤَاعْ الْتْلاَمِيذْ.
24
جَا لأَفَسُس يَهُودِي يْسَمُوهْ أَبُولُّوسْ، إِسْكَنْدْرِي الأَصْلْ، رَاجَلْ فَصِيحْ الْلْسَانْ يَفْهَمْ فَالْكُتُبْ.
25
كَانْ يَعْرَفْ بَزَافْ فِي طْرِيڤْ اَلرَّبْ. وُكَانْ حَارْ فَالْرُّوحْ يَتْكَلَّمْ وُيْعَلَّمْ بْتَدْقِيقْ عْلَى اَلرَّبْ. كَانْ يَعْرَفْ غِيرْ الْتَغْطَاسْ تَعْ يُوحَنَّا.
26
وُكَانْ يْبَشَرْفَالْمَجْمَعْ. وُكِي سَمْعَهْ أَكِيلاَ وُبِرِيسْكِلاَّ أَدَاوَهْ عَنْدْهُمْ، وُشَرْحُولَهْ طْرِيڤْ اَلرَّبْ بْكْثَرْدِقَة.
27
وُكِي بْغَى يْرُوحْ لْأَخَائِيَة، كَتْبُوا الْخُوتْ لَتْلاَمِيذْ بَاشْ يَقَبْلُوهْ فِي وَسْطْهُمْ. كِي جَا عَوَّنْ كْثِيرْ بْالْنِّعْمَة أَلِي كَانُوا مْؤَمْنِينْ مَقْبَلْ،
28
عْلَى خَاطَرْ كَانْ جَرِيئ فِي كْلاَمَه مْعَ لِيهُودْ، يْبِيَنْ لْهُمْ بَالْكُتُبْ بَلِي يَسُوعْ هُوَ الْمَسِيحْ.