الإصحاح 17
1
فْي تِسَالُونِيكِي وُفَاتُوا مَنْ أَمْفِيبُولِيسْ وُأَبُولُونِيَّة، حَتَى وَصْلُوا لْ تَسَالُونِيكِي، وِينْ كَانْ مَجْمَعْ الْيَهُودْ.
2
أَدْخَلْ بُولُس لِيهُمْ كِي عَدْتَهْ، وُكَلَمْهُمْ ثْلاَثْ سْبُوتْ عْلَى لَكْتُبَا،
3
يْوَضَحْ ويْبِيَنْ لْهُمْ بَلِي الْمَسِيح كَنْ لاَزَمْ يَتْأَلَمْ ويْقُومْ مَنْ الْمُوتْ، وبَلِي: هَدَا هُوَ الْمَسِيحْ يَسُوع أَلِي رَانِي نْبَشَرْلْكُمْ بِيه.
4
وقُومْ مَنْهُمْ تْقَنْعُوا ومْشَاوْ مْعَ بُولُس وسِيلاَ، كَانْ بَزَافْ مَنْ الْيُونَانِيِّينِ الْمَتْعَبْدِينْ لله، وكْثِيرْ مَنْ النْسَا النَبِيلاَتْ.
5
وتَمَ غَارُوا الْيَهُودْ أَلِي مَاشِي مُومْنِينْ وجَابُوا وَاحَدْ الْنَاسْ أَشْرَارْمَنْ الْطْرِيڤْ، وجَمْعُوا الْنَاسْ ضَدْهُمْ حَتَى دَارُوا فَوْضَى فَلَمْدِينَة، وهَجْمُوا عْلَى دَارْ يَاسُونَ بَاشْ يْسَلَمْ لْهُمْ بُولُس وسِيلاَ.
6
ومَلِي مَا لْڤْوْهُمْشْ، أَدَاوْ يَاسُونَ ونَاسْ أُخْرِينْ مَنْ الإِخْوَة عَنْدْ حُكَّامْ لَمْدِينَة يَشْكُوا عْلِيهُمْ بَعْيَاطْ: "هَذُوا أَلِي ڤَلْبُوا الدَنْيَا ورَهُم جَاوْ هْنَا تَانِي،
7
ويَاسُونَ رَحَب بِهُمْ. وهَدُوا ڤَاعْ يَمْشِيوْ ضَدْ قْوَانِينْ قَيْصَروڤَالُوا: كَايَنْ سَلْطَانْ وَاحَدْ أُخَرْ: يَسُوع!".
8
الْشَّعْبْ وحُكَّامْ لَمْدِينَة زَاعْفُوا كِي سَمْعُوا هَدْ لَكْلاَمْ.
9
وحَكْمُوا الْحُكَّامْ كَفَالَة مَنْ يَاسُونَ واللَخْرِينْ، وطَلْڤُوهُمْ.
10
وفَالْلِيلْ الإِخْوَة رَسْلُوا بُولُس وسِيلا أَلْ بِرِيَّة. كِي وَصْلُوا رَوحُوا لمَجْمَعْ الْيَهُود.
11
وكَانْ الْيَهُود تَعْ بِيرِيَّة أَشْرَفْ مَنْ تَلاعْ تَسَالُونِيكِي، قَبْلُواالْكَلِمَة بْحَمَاسْ ويَدْرْسُوا الَكْتُبَا كُلْ يُومْ يَحَوْسُوا يَتْأَكْدُوا عْلَى صِحَة الْتَعْلِيمْ.
12
وأَمْنُوا مَنْهُمْ بَزَافْ، مَنْ النْسَا الْيُونَانِيَّاتْ اَلشَّرِيفَاتْ، ومَنْ اَلرْجَالْ تَانِي.
13
وكِي سَمْعُوا الْيَهُودْ تَعْ تَسَالُونِيكِي بَلِي بُولُسْ بَشَرْ بْكَلِمَة الله فِي بِيرِيَّة، جَاوْ يْهَيْجُوا الْنَّاسْ عْلِيهْ.
14
وُفَالْحَالْ أَدَوَهْ شِي إِخْوَة جِهَة لَبْحَرْ بَاشْ إِسَافَرْ، سِيلاَ وتِيمُوثَاوُس ڤَعْدُوا تَمَ.
15
والإِخْوَة أَلِي رَفْقُوا بُولُس حَتَى أَلْ أَثِينَا. مَنْ بَعْدْ رَاجْعُوا وبُولُسْ وَصَاهُمْ يْڤُولُوا لْسِيلاَ و تِيمُوثَاوُس يَلَحْڤُوا بِيهْ فِي أَسْرَعْ وَقْتْ، مْضَّوْ.
16
وكِي كَانْ بُولُسْ يَسَنَى فِيهُمْ فِي أَثِينَا رُّوحَهْ حَزْنَتْ، كِي شَافْ لَمْدِينَة مْعَمْرَة أَصْنَامْ.
17
وكَانْ يْكَلَمْ فَالْمَجْمَعْ الْيَهُودْ الْمُتَعَبْدِينْ، ولِي يَتْلَقَهُمْ فْسَاحَة لَمْدِينَة كُلْ يُومْ.
18
وقَابْلُه قُومْ مَنْ الْفَلاَسِفَة الأَبِيكُورِيّين والرّوَاقِيِّين، وَحْدِينْ ڤَالُوا: " يَادْرَى وَاشْ رَاهْ حَابْ هَدْ الأَحْمَقْ بكْلاَمَه". ووَاحَدْ أَخْرِينْ: " رَاهْ يْبَشَرْ بْأَلِهَة غْرِيبَة". عْلَى خَاطَرْ كَانْ يْبَشَرْهُمْ بْيَسُوعْ وبَالْقِيَامَة.
19
أَدَاوَهْ مْعَهُمْ لْ أَرِيُوسْ بَاغُوس، وڤَالُوا لَه: " تَقْدَرْ تْعَرَفْنَا كْثَرْ عْلَى هَدْ اَلتَّعْلِيمْ الَجْدِيدْ أَلِي رَاكْ تَحْكِي بِه.
20
خَاطَرْ رَانَا نَسْمْعُوا أُمُورْ جْدِيدَة عْلِينَا، حَبِنَا نَفَهْمُوا مَعْنَهَا".
21
كَانْ أَهْلْ أَثِينَا و الْبَرَانِيِينْ اَلسَاكْنِينْ فِيهَا، يْفَوْتُوا وَقْتْ لَفْرَاغْهُمْ يَتْنَاقْشُوا عْلَى الْأَفْكَارْ الَجْدِيدَة.
22
وڤَفْ بُولُسْ فِي وَسْطْ أَرِيُوسْ بَاغُوس وڤَالْ: " يَا رْجَالْ أَثِينَا! رَانِي نْشُوفْ فِيكُمْ مْدِيْنِينْ بَزَافْ،
23
كِي كُنْتْ نْدُورْ ونْشُوفْ الْمَعَابَدْ تَعْكُمْ، شَفْتْ وَاحَدْ الْمَذْبَحْ مَكْتُوبْ عْلِيهْ: "لإِلَهْ مَجْهُولْ". وهَذَا أَلِي رَاهْ عَنْدْكُمْ مَجْهُولْ، رَانِي أَنْبَشْرْكُمْ بِهْ.
24
الإِلَهْ أَلِي خْلَقْ الَعَالَمْ وڤَاعْ أَلِي فِيهْ، هُوَ رَّب الْسْمَا والأَرْضْ، مَا يَسْكُنْشْ فِي هَيَاكَلْ مَصْنُوعَة بَالْيَدِينْ،
25
ومَا يَتَخْدَمْشْ بيَدِينْ الْنَاسْ كَلِي رَاهْ مَحْتَاجْ اَيْ شِي، هُوَ أَلِي يْمَدْ لَلْجَمِيعْ لَحْيَاة والْنَفْسْ وكُلْ شِي.
26
وهُوَ أَلِي خْلَقْ مَنْ دَمْ وَاحَدْ ڤَاعْ الْشُعُوب، وسَكَنْهُمْ فكُلْ الأَرْضْ، وحَدَدْ لَوْقَاتْ ولْحُدُودْ لْ كُلْ شَعْبْ،
27
بَاشْ يَحَوْسُوا عْلَى الله ويَلْقَوَاهْ، عْلَى خَاطَرْ مَا رَاهْ بْعِيدْ عْلَى حَتَى وَاحَدْ مَنَا.
28
بِهْ أَلِي رَانَا نَحْيَاوْ نَتْحَرْكُوا ونُوْجَدْ، كِمَا قَالُوأ وَاحْدِينْ مَنْ الْشُعَرَاء تَعْكُمْ: حْنَى تَانِي ذَرِيَة تَاعَهْ.
29
إِلَى رَانَا حْنَى ذَرِيْتَه، مَا لاَزَمْشْ نَحَسْبُوا الأُلُوهِيَة تَشْبَه الْذْهَبْ وَلَى الْفَضَّة وَلَى حَجْرَة يَقْدَرْ الْإِنْسَانْ يَصْنَعْهَا كِمَا بْغَى.
30
الله ذُورْكْ رَاهْ يَأْمَرْ ڤَاعْ الْنَاسْ فِي كُلْ مْكَانْ يَرَجْعُوا لِيه ويْتُوبُوا، مْغَمَضْ عَيْنِيهْ عْلَى وْقَاتْ الْجَهْلْ أَلِي فَاتْ.
31
عْلَى خَاطَرْ رَاهْ خِيَرْ نْهَارْ أَلِي يْحَاسَبْ فِيهْ ڤَاعْ الْنَاسْ بَالْعَدْلْ، بْرَاجَلْ هُوَ أَلِي خْتَارَهْ، ومَدْ الْبَرْهَانْ للْجَمِيعْ مَلِي نَوْضَهْ مَنْ الْمُوتْ".
32
وكِي سَمْعُوا بَالْقِيَامَة مَالْمُوتْ كَانُوا وَاحْدِينْ يَسْتَهْزَاوْ، و وَاحَدِينْ يْڤُولُوا: "بَاغْيِينْ أَتْزِيدْ تْكَلَمْنَا عْلَى هَدْ الْمَوْضُوعْ!".
33
وهَكْدَا خْرَجْ بُولُس مَنْ وَسْطْهُمْ.
34
بَصَحْ نَاسْ تَبْعُوهْ وأَمْنُوا، كَانْ مَنْهُمْ دِيُونِيسِيُون الأَرِيُوبَاغِيُّ، ومْرَأة أَسَمْهَا دَامَرِسُ و وَاحْدِينْ تَانِي مْعَهُمْ.