الإصحاح 16
1
مَنْ بَعْدْ وَصْلُوا لْدَرْبَة وُلِسْترَة، وُكَانْ وَاحَدْ اَلتِلْمِيذْ إِسَمُوهْ تِيمُوثَاوْسْ، وَلْدْ مْرَة إِيهُودِيَة مُؤْمِنَة وَبُوهْ يُونَانِي،
2
وُكَانْ عَنْدَهْ شْهَادَة مْلِيحَة عَنْدْ الْخَاوَة أَلِي فِي لٍسْترَة وْإِيقُونِيَة.
3
وُبُولُسْ بْغَى يَدِيهْ مْعَاهْ، وَدَاهْ وُخَتْنَهْ عْلَى جَالْ لِيْهُودْ أَلِي كَانُوا فِي دُوكْ الْجْوَايَهْ، عْلَى خَاطَرْ كَانُوا ڤَاعْ عَارْفِينْ بَلِي بُوهْ يُونَانِي.
4
وُمَلِي كَانُوا يْفُوتُوا عْلَى الْمُدُنْ كَانُوا يْوَصُوا الْخَاوَة بَاشْ يَحْتَرْمُوا الْقَرَرَاتْ أَلِي أَخْذَوْهَا الْرُّسُلْ وُالْمَشَايَخْ أَلِي فِي أورْشَلِيمْ.
5
وُكَانَتْ الْكَنَائِسْ تَتْقَوَى فَالإيمَانْ وُيَزْدَدُوا لِيهَا مُؤْمِنِينْ كُلْ يُومْ.
6
مَنْ بَعْدْ مَا سَافْرُوا لْفِرِيجِيَّة وُغَلاَطِيَّة، مْنَعْهُمْ اَلرُّوحْ اَلْقُدُسْ يَبَشْرُوا بَالْكَلِمَة فِي أَسِيَّا.
7
وُكِي وَصْلُوا لْمِيسِيَّا بْغَاوْ إِيْرُحُوا لْبِثِينِيَّة، وَالرُّوحْ مَاخَلَهُومْشْ يَدَخْلُوهَا.
8
وُفَاتُوا عْلَى مِيسِيَّا وُهَوْدُوا لْتَرُوَاسْ.
9
وُشَافْ بُولُسْ رُؤْيَا فَالْلِيلْ: رَاجَلْ مَكِدُونِي وَاڤَفْ يْحَّوَسْ عْلِيهْ وُڤَالْ: "أَرْوَحْ لْمَكِدُونِيَّة وُسَعَدْنَا!".
10
وُمَلِي شَافْ الْرُؤْيَة، تْأَكْدْنَا بَلِي اَلرَّبْ دْعَانَا نْبَشْرُهُمْ، وُسَافَرْنَا لْمَكِدُونِيَّة فَالْحَالْ.
11
قَلَعْنَا مَنْ تَرُوَاس لْجَزِيرَة سَامُوثْرَاكِي، وُفَالْغَدْ رَوَحْنَا لْ نِيَابُولِيسْ.
12
وُمَنْ تَمْ لْفِلِبِي، أَلِي كَانَتْ هِيَ لْمْدِينَة الَكْبِيرَة فِي مُقَاطَعَة مَكِدُونِيَّة، وُهِيَ مَسْتَعْمْرَة مَنْ الْرُومَانْ. وُفَوَتْنَا شْحَالْ مَلْ لِيَامْ فِيهَا.
13
وُفِي نْهَارْ اَلسَّبْتْ خْرَجْنَا بَرَى لَمْدِينَة ڤُدَامْ وَاحَدْ الْوَادْ، وِينْ كَانُوامْوَلْفِينْ إِصَلُوا، جَمَعْنَا وُكُنَا نْبَشْرُوا لَنْسَا أَلِي كَانُوا مْجْمْعَاتْ تَمَ.
14
وُ كَانَتْ وَاحَدْ لَمْرَة تَسْمَعْ إِسَمُهَا لِيدِيَّة، تَاجِرَة الأَرْجُوَانْ وُ هِيَ مَنْ مْدِينَة ثَيَاتِيرَا، تْحَبْ تَعْبَدْ الله، فْتَحْ اَلرَّبْ ڤَلْبْهَا بَاشْ تَقْبَلْ كْلاَمْ بُولُسْ.
15
وُمَلِي تْغَطْسَتْ هِيَ وُالْعَايْلَة تَعْهَا عَرْضَتْهُمْ وُ ڤَالَتْ: " إِذَا رَاكُمْ مَقْتَنْعِينْ رَانِي مُؤْمِنَة الَرَّبْ، أَدْخْلُوا ضْيَافْ لْدَارِي وُقَعْدُوا مْعَنَا".
16
وُفِي وَاحَدْ الْيُومْ كُنَا رَيْحِينْ لَصْلاَةْ، تْلَقَاتْ بِينَا وَحْدَة جَارِيَة فِيهَا رُّوحْ شَوَافَةَ. كَانَتْ أَدَخَلْ دْرَاهَمْ كْبَارْلَسْيَادْهَا مَنْ خَدْمَة اَلشْوَافَة.
17
وُكَانَتْ تَمْشِي مُورْ بُولُسْ وُمُوْرَانَا وُتْعَيَطْ ڤَايْلَة: "هَدْ الْنَّاس عِبَاد الله الْعَلِي، أَلِي رَاهُمْ يْدْعُوكُمْ لَطْرِيڤْ أَسْلاَكْ".
18
وُكَانَتْ أَدِيرْ هَكْدَ شْحَالْ مَلْ لِيَامْ. حَتَى بُولُسْ زْعَفْ دَارْ لَرُّوحْ وُڤَالْ: " نْأَمْرَكْ بَأَسْمْ يَسُوعْ الْمَسِيحْ تَخْرَجْ مَنْهَا!". وُخْرَجْ مَنْهَا تَمْ تَمْ.
19
وُكِي شَافُوا سْيَادْهَا بَلِي الْمَدْخُولْ تَعْهُمْ نَڤْطَعْ، حَكْمُوا بُولُس وُسِيلاَ وُأَدَوْهُمْ لْسَاحَة لَمْدِينَة يْحَاكْمُهُمْ.
20
وُقَدْمُوهُمْ لَلْحُكَامْ، ڤَالُوا: " هَدْ اَلزُوجْ رَاهُمْ أَيْدِرُوا فَوْضَى فَالْمْدِينَة، وُهُمَا يَهُودْ،
21
وُيْبَشْرُوا بَعْوَايَدْ مَاشِي حَقْ عْلِينَا نَقَبْلُوهَا وَلاَ نْطَبْقُوهَا، حْنَا رُومَانِيِينْ".
22
ونَاضْ ڤَاعْ الْغَاشِي عْلِيهُمْ، الْحُكَامْ ڤَطْعُوا قَشْهُمْ وُأَمْرُوا بَاشْ يَضَرْبُوهُمْ بَالعْصَا.
23
جَلْدُوهُمْ بَزَافْ وُدَارُهُمْ فَالْحَبْسْ، وُ وَصَاوْ عَسَاسْ الْحَبْسْ يْعَسْهُومْ كِيمَا لاَزَمْ.
24
وُهُوَ طَبَقْ الأَوَامَرْ كِيمَا لاَزَمْ، دَارْهُمْ فَالْحَبْسْ وُرْبَطْهُمْ مَنْ كَرْعِيهُمْ.
25
وُفِي نَصْ الْلِيلْ كَانْ بُولُسْ وُسِيلاَ يْصَلُوا وُيْسَبْحُوا الله، وُالْمْحَبْسِيَا يَسَمْعُهُمْ.
26
وُفِي غَفْلَة ضَرْبَتْ زْلَزْلَة كْبِيرَة حَتَى تْزَعْزَعْ سَاسْ الْحَبْسْ، وُتَفْتْحَتْ ڤَاعْ الْبِبَانْ تَعْ الْحَبْسْ، وُتْحَلَتْ قْيُودْ ڤَاعْ الْمَحْبُوسِينْ.
27
وُكِي نَاضْ مَنْ اَلنُومْ عَسَاسْ الْحَبْسْ، وُشَافْ الْبِبَانْ مَفْتُوحِينْ، أَرْفَدْ سِيفَه وُبْغَى يَقْتَلْ رُوحَهْ، كَانْ حَاسَبْ بَلِي الْمَحْبُوسِينْ هَرْبُوا.
28
عَيَطْلَهْ بُولُسْ بْصُوتْ عَالِي وُڤَالْ:"مَا دِرْشْ فرُوحَكْ هَدْ الْشِي! رَنَا ڤَاعْ هْنَا!".
29
اَلْعَسَاسْ طْلَبْ اَلْضُو، وُ أَدْخَلْ وُهُوَ يَتَرْعَدْ مَالْخُوفْ، طَاحْ ڤُدَمْ بُولُس وُسِيلاَ.
30
وَخْرَجْهُمْ مَنْ تَمْ وُڤَالْ: يَا سِيدِي وَاشْ لاَزَمْ أَنْدِيرْ بَاشْ أَنَالْ لَسْلاَكْ؟"
31
ڤَالُوا لَهْ: " أَمَنْ بَالْرَّبْ يَسُوعْ تْنَالْ لَسْلاَكْ أَنْتَ وَأَهْلْ دَارَكْ".
32
وُبَشْرُوا لَهْ هُوَ وَأَهْلْ دَارَهْ أَلِي كَانُوا مْعَاهْ بْكَلِمَة اَلرَّبْ.
33
الْعَسَاسْ أَدَاهُمْ فِي دِيكْ اَلسَاعَة تَعْ الْلِيلْ وُنَقَى جْرُوحْهُمْ وُتْغَطَسْ هُوَ وَأَهْلْ دَارَهْ.
34
وَعْرَضْ بُولُسْ وُسِيلاَ يَاكْلُوا فِي دَارَهْ. وُفْرَحْ بَزَافْ مَعَ ڤَاعْ أَهْلْ دَارَهْ مَلِي أَمْنُوا بَالله.
35
وُكِي طْلَعْ اَلنْهَارْ، الْحُكَامْ بَعْثُوا عَسْكَرْبَاشْ يْقُولُوا لَلْعَسَاسْ:" يَطْلَڤْ بُولُسْ وُ سِيلاَ".
36
الْعَسَاسْ خَبَرْ بُولُس بَالأَمْرْ ڤَالَهْ: " الْحُكَامْ رَاسْلُوا أَمْرْ بَاشْ نَطْلَڤْكُمْ، وُضُورْكْ رُوحُوا فِي سَلاَم".
37
وُڤَالْ لْهُمْ بُولُسْ: " ضَرْبُونَا ڤُدَمْ الْنَّاسْ بْلَى مَا يْحَاكْمُونَا، وَحْنَا رُومَانِيِينْ، وُدَخْلُونَا الْحَبْسْ. وُضُورْكْ يَطَرْدُونَا فَالْسَرْ؟ لاَ! يْجِيوْ هُمَا وُيْخَرْجُونَا".
38
وُالْجَلاَدِينْ أَدَاوْ هَدَاكْ لَكْلاَمْ لَلْحُكَامْ، وُخَافُوا كِي عَرْفُوا بَلِي هُمَا رُومَانِيِينْ.
39
وُجَاوْ طَلْبُوا اَلسْمَاحْ مَنْهُمْ وُ طَلْڤُهُمْ وُڤَالُولْهُمْ يَخْرْجُوا مَنْ الْمْدِينَة.
40
خَرْجُوا مَالْحَبْسْ وُدَخْلُوا لْدَارْ عَنْدْ لِيدِيَّة، قَبْلُوا الإِخْوَة شَجْعُوهُمْ وُخَرْجُوا مَلْ الْمْدِينَة.