الإصحاح 14
1
وُفِي إِيقُونِيَة دْخَلْ بُولُسْ وُبَرْنَابَا مَجْمَعْ الْيَهُودْ وُتْكَلْمُوا، حَتَّى اَمَنْ كْثِيرْ مَنْ الْيَهُودْ وُالْيُونَانِيِّينْ.
2
بَصَحْ لِيهُودْ أَلْلِي مَأَمْنُوشْ غَارُّوا وُفَسْدُوا عْقُولْ الْنَاسْ عْلَى الإِخْوَة.
3
وُفَوْتُوا وَقْتْ طْوِيلْ تَمَّا يْبْشْرُوا بْكُلْ جُرْأَة بَالرَّبْ أَلْلِي كَانْ يَشْهَدْ لِكَلْمَة نِعْمَتَهْ، بَالْمُعْجِزَاتْ وُ الْعْجَايَبْ ألْلِي كَانْ يْدِيرْهُمْ بْيَدِيهُمْ.
4
وُنَاسْ لَمْدِينَة تْقَاسْمُوا فَالرَايْ، أَلْلِي كَانُوا مْعَ لِيْهُودْ وُأَلْلِي كَانُوا مْعَ الرَّسُولَيْن.
5
وُكِي بْغَاوْ الْأُمَمْ وُالْيَهُودْ وُرِيَاسْهُمْ يْبَهْدْلُوا الْرَّسُولَيْنْ وُ يَرَجْمُوهُمْ،
7
لْحَڤْهُمْ لَخْبَرْ وُهَرْبُوا لَمْدِينَة لِيكَأُّونِيَّة: لِسْتِرَة وُدَرْبَة، وُلَمْدُونْ لَڤْرِيبَة.
6
وُكَانُوا تَّمَ يْبَشْرُوا. فِي لِسْتِرَة وُدَرْبَة
8
وُكَانْ وَاحَدْ مَنْ لِسْتْرَة رَاجَلْ عْرَجْ الْكَرْعِينْ مَلِي نْزَادْ ،عَمْرَهْ مَا مْشَى.
9
وُكَانْ يَسْمَعْ كْلاَمْ بُولُسْ، شَافْ فِيهْ، وُحَسْ بَلِي عَنْدَهْ إِيمَانْ بَاشْ يَبْرَى،
10
ڤَالَهْ بْصُوتْ عَالِي: "نُوضْ وَوْڤَفْ عْلَى كَرْعِيكْ!". تَم تَمْ نَاضْ وُمْشَى
11
وُكِي شَافُوا النَّاسْ أَلْلِي دَارَهْ بُولُسْ، ڤَالُوا بَعْيَاطْ بْلُغَة لِيكأُّونْيَّة: "هَادُوا أَلِهَة تْشَبْهُوا بَالنَّاسْ وُهَوْدُوا عَنْدْنَا".
12
وُكَانُوا يْسَمُوا بَرْنَابَا "زَفْسَ" وُبُولُس "هَرْمَسَ" خَاطَرْ هُوَ أَلْلِي كَانْ يَهْدَرْ.
13
وُجَا كَاهَنْ زَفْسَ ، أَلْلِي كَانْ فَالْدَخْلَة تَاعْ لَمْدِينَة، جَابْ مْعَاهْ فْرَادْ وُوَرْدْ هُوَ وَ النَّاسْ أَلْلِي كَانُوا مْعَاهْ، وُبْغَاوْ يْقَدْمُوهُمْ ذْبِيحَة لَرَّسُولَيْنْ.
14
كِي سَمْعُوا بَرْنَابَا وُبُولُسْ، قَطْعُوا لْقَشْ تَاعْهُمْ وُرَاحُوا لَنَّاسْ يْعَيْطُوا
15
وُ ڤَالُوا: "يَا رْجَالْ، شَا رَاكُمْ أَدِيرُوا؟ حْنَا غِيرْ نَّاسْ ضْعَافْ كِي نْتُمَ، رَنَى نْبَشْرُكُمْ بَاشْ تْخَلِيوْ هَادْ الْخُرَافَاتْ وُتْرَجْعُوا لْلإِلَهْ اَلْحِيْ أَلْلِي خْلَقْ اَلسْمَا وُالْلَرْضْ وُالَبْحَرْ وُكُلْ مَا فِيهُمْ،
16
أَلْلِي خَلَى الْأُمَمْ مَالزْمَانْ يَمْشِيوْ كِي بْغَاوْ.
17
وُهُوَ مَاخَلاَشْ رُوحَهْ بْلَى شَاهَدْ، وُ هُوَ مَازَالْ يْدِيرْ الْخِيرْ: يَعْطِينَا الْنُو مَالْسْمَا وُيَثْمَرْ عْلِينَا فِي كُلْ وَقْتْ، وُيْعَمَرْ ڤْلُوبْنَا بَالْفَرْحْ".
18
وُبَكْلاَمْهُمْ هَادَ قَنْعُوا الْنَاسْ وُمَا ذَبْحُولْهُمْشْ
19
مَنْ بَعْدْ جَاوْ يَهُودْ مَنْ أَنْطَاكِيَة وُإِيقُونِيَة وُهَيْجُوا الْنَاسْ، وُرَجْمُوا بُولُس وُجَرُوهْ بَرَى لَمْدِينَة، ظَانِينْ بَلِي مَاتْ.
20
وُكِي دَارُوا عْلِيهْ الْتَلاَمِيذْ ، نَاضْ وُدْخَلْ لَمْدِينَة، وُفَالْغَدْ رَاحْ مْعَ بَرنَابَا أَلْدَرْبَة
21
وُ بَشْرُوا فِي دِيكْ لَمْدِينَة وُتْلَمْذُوا بَزَافْ مَنْ الْمُومْنِينْ. مَنْ بَعْدْ رَاجْعُوا اَللِسْتِرَة وُإِيقُونِيَّة وَأَنْطَاكِيَة،
22
وُكَانُوا يْعَلْمُوا التَلاَمِيذْ بَاشْ يَثْبْتُوا فَالْإِيمَانْ، يْشَجْعُوهُمْ بَلِي بْضِيقْ كْبِيرْ وُبْصُعُبَاتْ نَدَخْلُوا لْمَلَكُوتْ الله.
23
وُخَيْرُوا لْهُمْ شْيُوخْ لْكُلْ الْكَنِيسَة، مَنْ بَعْدْ مَا فَوْتُوا وَقْتْ فَالْصْلاَةْ وُالصْيَامْ وُوَدْعُوهُمْ لَرَّب أَلْلِي أَمْنُوا بِيهْ.
24
وُكِي فَاتُوا مَنْ بِيسِيدِيَّة لْبَمْفِيلِيَّة.
25
وُبَشْرُوا بَالْكَلِمَة فِي بَرْجَة، هَوْدُوا لْأَتَالِيَة.
26
وُمَنْ تَمْ سَافْرُوا لْأَنْطَاكْيَة مَالَبْحَرْ، وِينْ كَانُوا الْمُومْنِينْ أَلْلِي سَلْمُوهُمْ لَنِعْمَة الله بَاشْ يْكَمْلُوا الْخَدْمَة أَلْلِي بْدَاوْهَا.
27
كِي وَصْلُوا عَرْضُوا ڤَاعْ الْكَنٍيسَة وُجَمْعُوا، حْكَاوْ لْهُمْ الْشِي أَلِي دَارَهْ الله مْعَاهُمْ، بَلِي فْتَحْ بَابْ الإِيمَانْ قُدَامْ الأُمَمْ.
28
وُفَوْتُوا تَمَ وَقْتْ مَاشِي قْلِيلْ مْعَ الْتَلاَمِيذْ.