الإصحاح 2
1
يَاوْلَادِي، نَكْتَبْ لْكُمْ هَادْ الْشِّي بَاشْ مَاتَدَّنْبُوشْ. وإِلَا دْنَبْ وَاحَدْ مَنْكُمْ يْلِيقْ تَعَّرْفُوا بَلِّي عَنْدْنَا لِيَشْفَعْ فِينَا عَنْدْ الْأَبْ، يَسُوعْ الْمَسِيحْ الْصَّالِحْ.
2
لِي هُوَ مَاتْ كْفَّارَة لَدْنُوْبْنَا، وْمَاشِي بَرْكْ دْنُوْبْنَا حْنَا بَصَّحْ لْڤَاعْ دْنُوبْ الْبَشَرِيَّةْ.
3
وَحْنَا نْبَيْنُو بَلِّي نَعَّرْفُوهْ إِلَا حْفَظْنَا الْوْصَايَا نْتَاعَهْ.
4
وْلِي يْڤُولْ «أَنَا عْرَفْتَهْ» وْمَحْفَظْشْ كْلَامَهْ، هَادَا يْتْسَمَّا كَدَّابْ وْمَافِيهْشْ الْحَقْ.
5
وْهَدَاكْ لِي يَحْفَظْ كْلَامَهْ بَالْحَقْ تْبَانْ وْتَكْمَّلْ فِيه مْحَبَّةْ الله.
6
وْلِي يْڤُولْ: بَلِّي رَاهْ ثَابَتْ فِيهْ لَازَمْ يْعِيشْ كِيمَا الْمَسِيحْ كَانْ يْعِيشْ.
7
يَاخُوْتِي، مَارَانِيشْ نَكْتَبْ لِيْكُمْ وْصِيَّة جْدِيْدَة، بَصَّحْ وْصِيَّة قْدِيمَة وْكَانَتْ عَنْدْكُمْ مَنْ الَلّوَلْ. لَوْصِيَّة لَقْدِيمَة هِيَ الْكَلْمَة الْلِّي سْمَعْتُوهَا مَنْ الْلَّوَلْ.
8
وْتَانِي وْصِيَّة جْدِيدَة نَكْتَبْ لْكُمْ، وْالْلِّي هُوَ حَقْ فِيه هُوَ وْفِيكُمْ: الْظُلْمَةْ خْلَاصَتْ، وْالْنُّورْ نْتَاعْ الْصَّحْ رَاهْ ضْوَا.
9
وْلِي يْڤُولْ رَاهْ عَايَشْ فَالْنُّورْ وْهُوَ يَكْرَهْ خُوهْ، هَدَاكْ مَزَالْ رَاهْ عَايَشْ فَالْظلْمَة حْتَّى لْدَّرْوَكْ.
10
وْالْلِّي يَبْغِي خُوهْ هَدَاكْ رَاهْ عَايَشْ فَالْنُّورْ وْمَافِيهْشْ خَطِيَّةْ.
11
وْالْلِّي يَكْرَهْ خُوْهْ هَدَاكْ رَاهْ فَالْظْلَامْ وْيْتْمَشَّى فَالْظَلْمَة، وْمَا يَعْرَفْشْ وِينْ رَاهْ غَادِي، عْلَى خَاطَرْ الْظَّلْمَة عْمَاتْ عَيْنِيهْ.
12
نَكْتَبْ لِيكُمْ يَاوْلَادِي، عْلَى خَاطَرْ دْنُوْبْكُمْ غْفَرْهَا لْكُمْ عْلَى جَالْ إِسْمَهْ.
13
نَكْتَبْ لِيكُمْ يَاشْوَابِينْ، عْلَى خَاطَرْ رَاكُمْ عْرَفْتُو الْلِّي كَانْ مَنْ الْلَوَلْ. نَكْتَبْ لِيِكُمْ يَاصْغَارْ، عْلَى خَاطَرْ غْلَبْتُو الْشَرِيرْ. نَكْتَبْ لِيكُمْ يَاشَاشْرَة عْلَى خَاطَرْ عْرَفْتُو الْأَبْ.
14
كْتَبْتْ لْكُمْ يَاشْوَابِينْ، عْلَى خَاطَرْ عْرَفْتُو الْلِّي كَانْ مَنْ الْلَّوَلْ. كْتَبْتْ لْكُمْ يَاصْغَارْ عْلَى خَاطَرْ رَاكُمْ أَقْوِيَاءْ وْكَلْمَةْ الله ثَابْتَ فِيْكُمْ، وَنْتُمَا غْلَبْتُو الْشِّيْطَانْ.
15
مَاتَبْغُوشْ هَادْ الْعَالَمْ وْالْمَادِيَّاتْ الْلِّي كَايْنَة فِيهْ. عْلَى خَاطَرْ إِلَا بْغَا وَاحَدْ الْعَالَمْ مَاعَنْدَهْشْ مْحَبَةْ الله فِيْهْ.
16
عْلَى خَاطَرْ الْدْنْيَا مْعَمْرَةْ غِيْرْ شَهْوةَ نْتَاعْ الْجَسَدْ، وْلِيْ يَعْجَبْ الْعِيْنْ وْيَفْسَدْهَا، وْالْمَعِيْشَةْ لْبَعِيْدَةْ عْلَى رّْبِيْ، وْهَذَا مَاشِيْ مَنْ عَنْدْ الله بَصَحْ مَنْ عَنْدْ الْعَالَمْ.
17
وَالدَنْيَا وْشَهْوَتْهَا غَادِيْ يَفْنَاوْ، بَصَحْ لِيْدِيْرْ مَشِيْئَةْ الله هَذَاكْ غَادِيْ يْعِيْشْ لْلَبْدَا.
18
هَدِيْ هِيَ الَساعَةْ الْأَخِيْرَةْ يَاوْلَادِيْ. وْكِيْمَا سْمَعْتُوْ بْلِيْ عْدُوْ الْمَسِيْحْ غَادِيْ يْجِيْ، وْدَرْوَكْ رَاهْ صَارْ لَلْمَسِيْحْ عَدْيَانْ بْزَافْ. وْمَنْهَا نْعَرْفُوْا بَلِيْ قْرِيْبَةْ تْجِيْ الْسَاعَةْ الْأَخِيْرَةْ.
19
وْهَدُوْ خَرْجُوْا مَنَا حْنَا، بَصَحْ مَاكَانُوشْ مَنَا، عْلَخَاطَرْ لُوْكَانْ كَانُوْا مَنَا حْنَا لَابْقَاو مْعَنَا. بْصَحْ هَكَا بَاشْ يْبَانُوْ بَلِيْ مَارَّاهُمْشْ ڤَاعْ مَنْا حْنَا.
20
بَصَحْ نْتُمْ الْقُدُوْسْ دْهَنْكُمْ وْعَارْفِيْنْ كُلْشِي.
21
مَاكْتَبْتْشْ لْكُمْ زَعْمَا عْلَخَاطَرْ مَاتْعَرْفُوشْ الْحَقْ، لَا لَا، بَصَحْ كْتَبْتْ لْكُمْ عْلَخَاطَرْ رَّاكُمْ تْعَرّْفُوْا الْحَقْ، وْبَلِيْ الْكْذَبْ عَمْرَهْ مَاكَانْ حَقْ.
22
شْكُونْ هُوَ الْكَذَابْ، غِيْرْ هَدَاكْ لِيَنْكَرْ يَسُوعْ الْمَسِيْحْ؟ هَذَا هُوَ عْدُو الْمَسِيْحْ، لِيْ يَنْكَرْ الْأَب ْواْلإبِنْ.
23
ڤَاعْ لِيَنْكَرْ الْإِبْنْ هَذَاكْ مَاعَنْدَهْشْ تَانِيْ اْلْأَبْ، وْلِيْ يَعْتَرَفْ بْالإِبْنْ هَذَاكْ عَنْدَهْ الْأَبْ تَانِيْ.
24
وَلِيْ سْمَعْتُوْه نْتُمْ مَنْ الْلَوَلْ خَلُوهْ ثَابَتْ فِيْكُمْ. إِلَا ثْبَتْ فِيْكُمْ لِّيْ سْمَعْتُوهْ مَنْ الْلَوَلْ، مَلَا غَادِيْ نْتُمْ تَانِيْ تْكُونُوْ ثَابْتِيْنْ فْي الْإِبْنْ وْالْأَبْ.
25
وْهَدَا هُوَ الْوَعْدْ لِّيْ هُوَ وْعَدْنَا بِهْ: لَحْيَاةْ لْلَبْدَا.
26
كْتَبْتْ لِيْكُمْ هَدْ الْشِيْ عْلَى الْنَاسْ لِيْ يْخَدْعُوْا فِيْكُمْ.
27
بَصَحْ نْتَُمَ الْْمْسْحَ لِّيْ دِيْتُوْهَا مَنْ عَنْدَهْ هِيَ ثَابْتَةْ فِيْكُمْ، وْمَارَّاكُمْشْ مَحْتَاجِيْنْ بَاشْ يْعَلَمْكُمْ وَاحَدْ، بْصَحْ هَدْ الْمَسْحَ هِيَ لِعَلْمْتْلْكُمْ كُلْ شِيْ، وْهِيَ الْحَقْ وْمَاتَكْذَبْشْ. كِيْمَا عَلْمَتْلْكُمْ ثَبْتُوْا فِيْه.
أبناء الله
28
وْدَرْوَكْ يَاوْلَادِيْ، ثْبْتُوْا فِيْه حْتَى إِلَا بَانْ تْكُونْ عَنْدْنَا فِيْه الْثِقَةْ، وْمَانْحَشْمُوشْ نْهَارْ كِيْ يْجِيْ.
29
إِلَا عْرّْفْتُوْ بَلِيْ هُوَ الْحَقْ، مَلَا دِيْرُوْا فِيْ بَالْكُمْ بَلِيْ لِّيْ يْدِيْرْ الْحَقْ هُوْ مَوْلُوْدْ مَنَهْ.