الإصحاح 9
1
وَاشْ أَنَايَا مَاشِي رَسُولْ؟ وَاشْ أَنَايَا مَاشِي حُرْ؟ مَا شَفْتَشْ يَسُوعْ رَبْنَا؟ نْتُمَا اَلْغَلَةْ الْخَدْمَةْ تَاعِي فَالرَبْ؟.
2
إلاَ مَا كُنْتَشْ رَسُولْ لَلنَاسْ لَخْرِينْ رَانِي رَسُولْ لِيكُمْ نْتُمْ، بَصَحْ نْتُمَا اَلْلِي تْبَيْنُو بَلِي أَنَايَا رَسُولْ فَالرَبْ.
3
وهَادَا هُوَ لْبَيَانْ لِهَادُوكْ اَلْلِي مَايْحَسْبُونِيشْ.
4
وَاشْ مَا عَنْدْنَاشْ الحَقْ نَاكْلُو ونْشَرْبُو؟.
5
وَاشْ مَا عَنْدْنَاشْ اَلْحَقْ نَتْزَوْجُو أُخْتْ مُوْمِنَة بَاشْ تَمْشِي مْعَنَا فَالسْفَرْ، كِيمَا يْدِيرُو اَلرُسُلْ لَخْرِينْ وُخُوتْ رَبْنَا يَسُوعْ وصَفَا؟.
6
ولَا غِيرْ أَنَايَا وبَرْنَابَا اَلْلِي خَاصْنَا نْكَسْبُو رْزَقْنَا مَنْ خَدْمَة يَدِينَا؟
7
كَاشْ وَاحَدْ دْخَلْ لْلعَسْكَرْ ويْخَلَصْ مَنْ جِيبَهْ؟ وكَاشْ وَاحَدْ غْرَسْ اَلدَالِيَةْ ومَا كْلاَشْ مَنْ غَلاَتْهَا؟ ولَا كَاشْ وَاحَدْ سْرَاحْ لَغْنَمْ ومَا شْرَبْشْ مَنْ حْلِيبْهَا؟.
8
وَاشْ تْخَمَمْ بَلِي أنَايَا نَتْكَلَمْ فَالصْوَالَحْ هَادِ مَنْ رَاسِي؟ وَاشْ اَلشَرْعْ مَا يْقُولْشْ؟ يْقُولْ كِيفْ كِيفْ فِي هَادْ اَلصْوَالَحْ؟
9
مَكْتُوبْ فَشَرْعْ مُوسَى:" مَا تْدِيرْشْ الْكَمَامَةْ عْلَى فَمْ اَلْفَرْدْ وهُوَ يَدْرَسْ فَالْغَلَة". وَاشْ الله يْهَتَمْ بَالثِيرَانْ.
10
وَلاَ يْقُولْ هَادْ اَلشِي عْلَى جَالْنَا حْنَايَا؟ إِيهْ تَكْتَبْ عْلَى جَالْنَا. خَاصْ اَلْلِي يَحْرَثْ وَالْلِي يَدْرَسْ يْكُونْ عَنْدْهُمْ اَلرَجَا بَلِي كُلْ وَاحَدْ يَدِي حَقْ.
11
إلاَ كُنَا حْنَا زْرَعْنَا فِيكُمْ اَلصْوَالَحْ اَلرُوحِيَةْ، عْلاَهْ بَزَافْ عْلِينَا إلاَ حْصَدْنَا مَنْكُمْ اَلصْوَالَحْ اَلْمَادِيَةْ.
12
كَايَنْ وَحَدْ خْرِينْ عَنْدْهُمْ الْحَقْ فِيكُمْ، مَاشِي حْنَا اَلْلُوْلَى مَنْهُمْ؟ وحْنَا مَا طْلَبْنَاشْ هَادْ اَلْحَقْ، وصْبَرْنَا عْلَى كُلْشِي بَاشْ مَا نْكُونُوشْ عَثْرَةْ لِلإِنْجِيلْ الْمَسِيحْ.
13
مَا تْعَرْفُوشْ بَلِي هَادُوكْ اَلْلِي كَانُوا يْخَدْمُوا فْبِيتْ الله، وهَادُوكْ اَلْلِي كَانُو يْخَدْمُو فَالْمَذْبَحْ كَانُو يَدُو حَقْهُمْ مَنْ هَادَاكْ اَلشِي لِيْمَدُوهْ فَالْمَذْبَحْ.
14
هَاكَا خْبَرْ رَبِي بَاشْ حَتَى اَلْلِي يْخَبْرُو بَالْإِنْجِيلْ إِعِيشُو مَنْ اَلْإِنْجِيلْ.
15
وابَصَحْ أنَا عُمْرِي مَا سْتَافَدْتْ مَنْ هَادْ اَلصْوَالَحْ، ومَا كْتَبْتْ هَادْ اَلشِي بَاشْ نَطْلَبْ حَاجَة، خِيرْ لِي نْمُوتْ و لاَ يَحْرَمْنِي حَدْ مَنْ هَادْ اَلْإِفْتِخَارْ.
16
كِي نْخَبَرْ بَالْإِنْجِيلْ عْلاَهْ نَفْتَخَرْ، هَادَشِي وَاجَبْ عْلِيَ، ويَا وِيلِي لُوكَانْ مَا نْخَبَرْشْ بَالْإِنْجِيلْ!.
17
لُوكَانْ كُنْتْ نْدِيرْ هَادْ الْخِدْمَة بْخَاطْرِي نَسْتَاهَلْ خْلاَصْ عْلِيهَا، ولَكِنْ رَاهِي مَسْؤُولِيَة أَئْتَمَنِي عْلِيهَا رَبِي.
18
وَاشْ هِيَ الْخَلْصَة تَاعِي؟ هِيَ نْخَبَرْ بَالْإِنْجِيلْ بْلاَ خْلاَصْ، وبْلاَ مَا نَطْلَبْ الْحَقْ تَاعِي اَلْلِي مَدَهْ لِي الْإِنْجِيلْ فْخَدْمَتِي.
19
وأنَا حُرْ مَانِيشْ عَبْدْ لْحَدْ، ولَكِنْ وَلِيتْ عَبْدْ لْكُلْ وَاحَدْ بَاشْ نَرْبَحْ بَزَافْ اَلنَاسْ.
20
ووَلِيتْ عَنْدْ الْيَهُودْ كِيمَا يَهُودِي بَاشْ نَرْبَحْهُمْ، ووَلِيتْ عَنْدْ اَلنَاسْ اَلْلِي تَحْتْ اَلشَرْعْ كِيمَا انَا تَحْتْ اَلشَرْعْ بَاشْ نَرْبَحْهُمْ.
21
وعَنْدْ اَلْلِي مَا عَنْدْهُمْ شَرْعْ كِيمَا مَا عَنْدِيشْ اَلشَرْعْ بَاشْ نَرْبَحْهُمْ، والشَرْعْ تَاعِي مَنْ عَنْدْ الله وَانَا تَحْتْ شَرْعْ الْمَسِيحْ.
22
ووَلِيتْ عَنْدْ اَلضْعَافْ فَالْإِيمَانْ كِيمَا هُمَا بَاشْ نَرْبَحْهُمْ، ووَلِيتْ لْڤاعْ اَلنَاسْ كُلْ حَاجَة بَاشْ نَسْلَكْ وَحْدِينْ مَنْهُمْ كِمَا كَانْ الْحَالْ.
23
وهَادْ اَلشِي نْدِيرَهْ عْلَى جَالْ الْإِنْجِيلْ بَاشْ نْشَارَكْ فَالْبَرَكَاتْ تَاعَهْ.
24
مَا تْعَرْفُوشْ بَلِي اَلْلِي يَتْسَابْقُو فَالْجَرْيْ ڤَاعْ يَجْرُوا، وبَصَحْ وَاحَدْ مَنْهُمْ غَادِي يَرْبَحْ الْجَائِزَة؟ جْرُوا نْتُمَا ثَانِي بَاشْ تْرَبْحُو!.
25
ورَاهْ ڤَاعْ اَلْلِي يَتْسَابْقُو، يَدَرْبُو مْلِيحْ بَاشْ يْجِيبُوا الْمِيدَالِيَاتْ اَلْلِي يَفْنَاوْ ولَكِنْ تَعْنَا مَاتَفْنَاشْ.
26
وهَكَا، رَانِي مَانَجْرِيشْ بْلاَمَا نَعْرَفْ الْمَقْصُودْ، ومَا نَضْرَبْشْ كِمَا هَادَاكْ اَلْلِي يَضْرَبْ فَالَهْوَا،
27
ورَانِي نَقْهَرْ الْجَسَدْ تَاعِي ونَغْلَبْهَا بَاشْ مَانَخْسَرْشْ رُوحِي بَعْدْ مَا خْبَرْتْ اَلنَاسْ لَخْرِينْ بَالْإِنْجِيلْ.