الإصحاح 12
1
فِيمَا يَخُصْ الْمَوَاهِبْ اَلرُوحِيَة، رَانِي مَا بْغِيتْشْ يَا الْخُوتْ تْكُونُو مَا تْعَارْفُوهُمْشْ.
2
ورَاكُمْ تْعَرْفُو كِيفَاشْ كُنْتُو مَنْ اَلشُعُوبْ اَلْلِي مَا يْعَبْدُوشْ الله، كُنْتُو تْعَبْدُو الْأَصْنَامْ ومَجْرُورِينْ مُورَاهُمْ.
3
بْغِيتْكُمْ تْعَرْفُو بَلِي مَاكَاشْ وَاحَدْ وهُوَ يَتْكَلَمْ بَالرُوحْ اَلْقُدُسْ يْقُولْ : يَسُوعْ مَلْعُونْ، ومَكَاشْ وَاحَدْ يَقْدَرْ يْقُولْ: يَسُوعْ هُوَ رَبْ، مَنْ غِيرْ أَرُوحْ الْقُدُسْ.
4
رَاهْ كَايَنْ بَزَافْ مَنْ الْمَوَاهِبْ اَلرُوحِيَةْ، بَصَحْ إِيجُوا مَنْ رُوحْ وَاحَدْ.
5
وكَايَنْ بَزَافْ مَنْ الْمَسْؤُلِيَاتْ، ولَكِنْ اَلرَبْ وَاحَدْ.
6
وكَايْنِينْ بَزَافْ مَنْ الْخَدَمَاتْ، وبَصَحْ الله وَاحَدْ، هُوَ اَلْلِي يْعَاوَنْ اَلنَاسْ بَاشْ كُلْ وَاحَدْ يْدِيرْ خَدَمْتَهْ.
7
وبَصَحْ كُلْ وَاحَدْ يْمَدْلَهْ اَلرُوحْ الْقُدُوسْ بَاشْ يْبَيَنْ الْمَوْهِبَة اَلْلِي تَنْفَعْ.
8
وهَكَا وَاحَدْ مَدْلَهْ بَالرُوحْ كْلاَمْ الْحِكْمَة، ووَاحَدْ لَخَرْ كْلاَمْ الْمَعْرِفَة، وڤَاعْ مَنْ رُوحْ وَاحَدْ.
9
وبْنَفْسْ اَلرُوحْ مَدْ لْوَاحَدْ الْإِيمَانْ، ولْوَاحَدْ اَخَرْ مَوْهِبَة تَاعْ اَلشِفَاءْ بْنَفْسْ اَلرُوحْ.
10
ولْوَاحَدْ أَخَرْ مَدْلَهْ الْقُوَة بَاشْ يْدِيرْ الْمُعْجِزَاتْ، ولاَخَرْ اَلنُبُوَة، ولاَخَرْ يْمَيَزْ الْأَرْوَاحْ، ولاَخَرْ يَتْكَلَمْ بْلُغَاتْ مَخْتَلْفَة، ولاَخَرْ الَتَرْجَمَة لْهَادِيكْ اَللُغَاتْ.
11
وهَادْ اَلصْوَالَحْ ڤَاعْ يْدِيرْهُمْ رُوحْ وَاحَدْ، ويْمَدْهَا لِكُلْ وَاحَدْ كِيمَا بْغَا هُوَ.
12
وكِمَا الْجَسَدْ وَاحَدْ وُفِيهْ بَزَافْ تَاعْ الْأَطْرَافْ، وهَادْ الْأَطْرَافْ بَزَافْ وبَصَحْ مَتَحْدِينْ، رَاهْ هَكَا حَتَى الْمَسِيحْ.
13
ڤَاعْ تَغْطَسْنَا بَرُوحْ وَاحَدْ بَاشْ نْوَلُوا جَسَدْ وَاحَدْ، سِوَا يَهُودْ وَلاَ يُونَانِيِينْ، عَبِيدْ وَلاَ أَحْرَارْ، كُلْنَا تْسَقِينَا بْرُوحْ وَاحْدَ.
14
وَالْجَسَدْ رَاهْ مَاشِي طَرَفْ وَاحَدْ، ولَكِنْ عَنْدْهْ بَزَافْ تَاعْ مْفَاصَلْ .
15
إلاَ قَالْ الْكَرْعْ "أَنَا مَاشِي يَدْ، أَنَا مَاشِي مَنْ الْجَسَدْ"، وَاشْ هَادَا يَعْنِي بَلِي هِيَ مَاشِي مَنْ الْجَسَدْ؟.
16
ولاَ قَالَتْ الَوْذَنْ: " أَنَا مَاشِي عِينْ، أَنَا مَاشِي مَنْ الْجَسَدْ"، وَاشْ هَادْ يَعْنِي بَلِي هِيَ مَاشِي مَنْ الْجَسَدْ؟.
17
إِلاَ كَانْ الْجَسَدْ ڤَاعْ عِينْ، وِينْ هُوَ اَلسَمْعْ؟ وِإلاَ ڤَاعْ اَلسَمْعْ، وِينْ هُوَ اَلشَمْ؟.
18
ولَكِنْ الله دَارْ كُلْ الَمْفَاصَلْ فَالْجَسَدْ كِمَا بْغَا هُوَ.
19
ولُو كَانْ كَانُو قَالْ مَنْ مْفَاصَلْ وَاحَدْ، وِينْ هُوَ الْجَسَدْ؟.
20
مْفَاصَلْ بَزَافْ، ولَكِنْ جَسَدْ وَاحَدْ.
21
وعْلَى هَادَشِي مَا تَقْدَرْشْ تْقُولْ الْعِينْ لَلْيَدْ:" أَنَا مَا نَحْتَاجَكْشْ!". وَلاَ الرَاسْ يْقُولْ لَرَجْلِينْ:" أَنَا مَانَحْتَاجْكُمْشْ!".
22
وبَزْيَادَة عْلَى هَادْ الشِي الَمْفَاصَلْ تَاعْ الْجَسَدْ اَلْلِي يْبَانُو ضْعَافْ، رَاهُمْ مْهَمِينْ.
23
ولَمْفَاصَلْ تَاعْ الْجَسَدْ اَلْلِي نْحَسْبُوهُمْ مَاعَنْدْهُمْشْ قِيمَة، نْمَدُولْهُمْ قِيمَة كْثَرْ، ولَمْفَاصَلْ اَلْلِي مَايْبَانُوشْ نَتْهَلاَوْ فِيهُمْ بَزَافْ.
24
أمَا الَمْفَاصَلْ اَلْلِي بَايْنِينْ مَرَاهُمْشْ مَحْتَاجِينْ لْهَادْ اَلشِي، ولَكِنْ الله دَارْهُمْ فَي الْجَسَدْ ويَهْتَمْ حَتَى بَالَمْفَاصَلْ اَلْلِي مَاعَنْدْهُمْشْ قِيمَة.
25
بَاشْ مَا يْكُونْشْ اَلتَفْرِيقْ فَالْجَسَدْ، ولَكِنْ يْكُونْ اهْتِمَامْ كِيفْ كِيفْ فْالَمْفَاصَلْ لْبَعْضِيَاتْهُمْ.
26
وَلاَ كَانْ طَرَفْ وَاحَدْ يَتْعَذَبْ، رَاهْ ڤَاعْ لَمْفَاصَلْ لَخْرِينْ يَتْعَذْبُو مْعَاهْ، وَلاَ طَرَفْ وَاحَدْ مَدُولَهْ قِيمَة، رَاهْ ڤَاعْ لَمْفَاصَلْ لَخْرِينْ يْفَرْحُو مْعَاهْ.
27
ونْتُمْ رَاكُمْ جَسَدْ الْمَسِيحْ، وكُلْ وَاحَدْ مَنْكُمْ طَرَفْ فِيهَا.
28
والله حَطْ كُلْ وَاحَدْ فَبْلاَصْتَهْ فَالْكَنِيسَة، اَلرُسُلْ اَللَوْلِينْ، وَالْأَنْبِيَاءْ اَلثَانْيِينْ، وُالَمْعَلْمِينْ هُمْ اَلثَالْثِينْ، ومَنْ بَعْدْ اَلْلِي يْدِيرُو الْمُعْجِزَاتْ، ومَنْ بَعْدْ اَلْلِي عَنْدْهُمْ مَوَاِهْب شِفَاءْ، وَاَلْلِي يْعَاوْنُو، والْمَسْؤُولِينْ عْلَى الْخَدَمَاتْ، والْلِي يَتْكَلْمُوا بْلُغَاتْ مُخْتَلِفَة.
29
وَاشْ ڤَاعْ رَاهُمْ رُسُلْ؟ وَلاَ ڤَاعْ رَاهُمْ أَنْبِيَاءْ؟ وَلاَ ڤَاعْ رَاهُمْ مُعَلِمِينْ؟ وَلاَ ڤَاعْ يْدِيرُو مُعْجِزَاتْ؟.
30
وَاشْ عَنْدْهُمْ ڤَاعْ مَوَاهِبْ شِفَاءْ؟ وَلاَ ڤَاعْ رَاهُمْ يَتْكَلْمُوا بْلُغَاتْ؟ وَلاَ ڤَاعْ رَاهُمْ يَتَرَجْمُو؟.
31
وبَصَحْ بْغَاوْ بَزَافْ الْمَوَاهِبْ الَمْلِيحَة، وَأنَا نْبَيَنَلْكُمْ اَلطْرِيقْ الَمْخَيْرَةْ.