الإصحاح 10
1
يَاخُوتِي بْغِيتْكُمْ تْعَرْفُوا بَلِي جْدُودْنَا ڤَاعْ كَانُو تَحْتْ اَلسْحَابَة، وڤَاعْ قَطْعُو الَبْحَرْ.
2
وڤَاعْ تْغَطْسُو فَالسْحَابَة وفْالَبْحَرْ لِتَبْعُو مُوسَى.
3
وڤَاعْ كْلاَوْ مَاكْلَة رُوحِيَة وَحْدَة،
4
وڤَاعْ شَرْبُو شْرَابْ رُوحِي وَاحَدْ، كَانُو يْشَرْبُو مَنْ وَاحَدْ أَصَخْرَة أرُوحِيَة كَانَتْ مْعَاهُمْ، وهَادْ اَلصَخْرَة كَانَتْ الْمَسِيحْ.
5
هَكَاكْ، الله مَكَانَشْ فَرْحَانْ بَزَافْ مَنْهُمْ، وتْقَتْلُو فَي الصَحْرَا.
6
وهَادْ اَلصْوَالَحْ صْرَاتْ مِثَالْ لِينَا، بَاشْ حَتَى حْنَا مَا نَتْشَهَاوْشْ الَشَرْ كِمَا تْشَهَاوَهْ هُمَا،
7
مَا تْعَبْدُوشْ الْأَصْنَامْ كِمَا دَارُو وَحْدِينْ مَنْهُمْ، كِيمَا مَكْتُوبْ فَكْتَابْ الله: "جْلَسْ اَلشَعْبْ بَاشْ يَاكُلْ ويَشْرَبْ، ومَنْ بَعْدْ نَاضُو يْلَعْبُو".
8
ومَا نْفَسْدُوشْ كِمَا فَسْدُو وَحْدِينْ مَنْهُمْ، وفَنْهَارْ وَاحَدْ مَاتُو ثْلاَثَ وعَشْرِينْ أَلْفْ وَاحَدْ،
9
ومَانْجَرْبُوشْ الْمَسِيحْ كِمَا جَرْبُوهْ وَحْدِينْ مَنْهُمْ ، وهَلْكُوهُمْ الْأَفَاعِي.
10
ومَانْدَمَدْمُوشْ كِماَ دَمَدْمُو وَحْدِينْ مَنْهُمْ، وهْلَكْهُمْ مَلاَك ْالْمُوتْ.
11
وهَادْ اَلصْوَالَحْ ڤَاعْ صْرَاتْ لِيهُمْ بَاشْ تْكُونْ مِثَالْ، وتْكَتْبَاتْ لِينَا حْنَا اَلْلِي نْعِيشُو فْهَادْ اَلزْمَانْ بَاشْ تْنَبَهْنَا.
12
اَلْلِي يَحْسَبْ رُوحَهْ وَاقَفْ، يْرَدْ بَالَهْ يْطِيحْ.
13
وُفِينْ مَا تْجَرَبْتُو، خَاصْكُمْ تْعَرْفُو بَلِي بْنَادَمْ يْفُوتْ فْهَادْ اَلتَجَارِبْ، وبَصَحْ الله أَمِينْ، ومَاغَادِيشْ يْخَلِيكُمْ تَتْجَرْبُو كْثَرْ مَنْ جَهْدْكُمْ وغَادِي يْدِيرْ لِيكُمْ مْعَ التَجْرِبَة حَلْ بَاشْ تْقَدْرُو تْصَبْرُو.
14
عْلَى هَادْ اَلشِي يَا حْبَابِي، بَعْدُو عْلَى عِبَادَة الْأَصْنَامْ.
15
رَانِي نَتْكَلَمْ كِيمَا نَتْكَلَمْ لَلْحُكَمَاء، ونْتُمْ حَكْمُو فْهَادَشِي اَلْلِي نْقُولْ.
16
كَاسْ الْبَرَكَة اَلْلِي نْبَارْكُوهَا، مَاشِي هُوَ اَلشَرِكَة فْي دَمْ الْمَسِيحْ؟ الْخُبْزْ اَلْلِي نْقَطْعُوهْ، مَاشِي هُوَ اَلشَرِكَة فْي جَسَدْ الْمَسِيحْ.
17
حْنَا بَزَافْ ولَكِنْ خُبْزَة وَحْدَة، حْنَا كُلْنَا جَسَدْ وَاحَدْ، كُلْنَا نْشَارْكُو فْخُبْزَة وَحْدَة.
18
شُوفُو شَعْبْ إِسْرَائِيلْ، مَاشِي اَلْلِي يَاكْلُو اَلذَبَائِحْ، هُمْ اَلْلِي يْشَارْكُو فْخِدْمَة الله فَالْمَذْبَحْ؟.
19
وَاشْ نْقُولْ؟ اَلذَبِيحَة تَاعْ اَلصَنَمْ عَنْدْهَا قِيمَةْ ولاَ اَلصَنَمْ هُوَ اَلْلِي عَنْدَهْ قِيمَة؟
20
لاَ! بَصَحْ اَلْلِي يْذَبْحُوهْ اَلنَاسْ لِمَيْعَبْدُوشْ الله، هُوَ مَذْبُوحْ لَلشَيَاطِينْ مَاشِي لله. ومَا بْغِيتْكُمْشْ نْتُمْ تْشَارْكُو مْعَ الشَيَاطِينْ.
21
مَاتْقَدْرُوشْ تْشَرْبُو مَنْ كَاسْ اَلرَبْ وكَاسْ اَلشَيَاطِينْ. ومَا تْقَدْرُوشْ تْشَارْكُو فْمَايْدَةْ اَلرَبْ ومَايْدَةْ اَلشَيَاطِينْ.
22
وَاشْ بْغِينَا نَتْسَبْبُو فَالْغِيرَة تَاعْ اَلرَبْ؟ وَاشْ حْنَا قَاوْيِينْ مَنُو؟.
23
كُلْشِي حْلاَلْ ولَكِنْ مَاشِي كُلْشِي يَنْفَعْ. "كُلْشِي حْلاَلْ ولَكِنْ مَاشِي كُلْشِي يَبْنِي".
24
وحَتَى وَاحَدْ مَا خَاصَهْ يَطْلَبْ الْخِيرْ غِيرْ لْرُوحَهْ، ولَكِنْ خَاصَهْ يَطْلَبْ الْخِيرْ لْغِيرَهْ.
25
كُلْ مَايَتْبَاعْ فَسُوقْ اللْحَمْ كُولُوهْ بْلاَمَا تْسَقْسِيوْ بَاشْ تْرَيْحُو الْبَالْ تَاعْكُمْ.
26
لِأَنُو "اَلاَرْضْ وڤَاعْ لِي فِيهَا هُوَ لَرَبْ".
27
وِإلاَ عْرَضْ عْلِيكُمْ وَاحَدْ مَاشِي مُوْمِنْ وقْبَلْتُو بَاشْ تَمْشِيوْ عَنْدَهْ، كُولُو مَنْ كُلْشِي لِيْمَدَلْكُمْ بْلاَمَا تْسَوْلُو بَاشْ تْرَيْحُو بَالْكُمْ.
28
وبَصَحْ لِي يْقُولَكْ "هَادْ اَلذَبِيحَة رَاهَا تَاعْ الْأَصْنَامْ"، مَا تَكْلُوشْ مَنْهَا، عْلَجَالْ كْلاَمَهْ وتْرَيَحْ بَالَكْ."لْأَنُو كُلْشِي فَالاَرْضْ لْرَبِي".
29
مَا نَقْصَدْشْ بَالَكْ نْتَ، بَصَحْ بَالْ لْلاَخَرْ. عْلاَشْ اَلْبَالْ تَاعْ وَاحَدْ أَخَرْ يَحْكَمْ عْلَى اَلْحُرِيَة تَاعِي؟.
30
كِي تَاكُلْ شْكُرْ الله عْلَى كُلْشِي، عْلاَشْ يْلُومْنِي وَاحَدْ أَخَرْ عْلَى حَاجَة شْكَرْتْ الله عْلِيهَا؟.
31
كِي تَاكْلُو ولاَ تْشَرْبُو ولاَ تْدِيرُو أَيِ حَاجَة، دِيرُو كُلْشِي بَاشْ تْمَدُو اَلْعَزْ لله.
32
مَا تْكُونُوشْ سْبَابْ فَالذُنُوبْ، لاَ لْيَهُودْ ولاَ لْيُونَانِيِينْ ولاَ كَنِيسَة الله.
33
دِيرُو كِيمَا أنَا نْسَيِي نَرْضَي ڤَاعْ اَلنَاسْ فْكُلْشِي، ومَا نْقَلَبْشْ عْلَى مَصْلَحْتِي ولَكِنْ عْلَى مَصْلَحَة بْزَافْ اَلنَاسْ بَاشْ يْسَلْكُو.