¹ Yanna la?, guenda runi cre ca nga ora nanna nu za'ca ca ni ca'bezanu gaca. Ndi nga ni chi huíni ra cadi rihuíni gaxti. ² Purti sicarí ca bixhoze gola nu que lanu bi'ni' cre ca. ³ Guendaruni cré di ru cá laanu guiene nu de que guidxilayú di guyá ni purti zacá bidii xtiidxa Diuxi gaca ni, ne za ca' ca ni rihuíni ca cadi guyá di cani de cani que rihuíni. ⁴ Runi modo guendaruni cre ni bidii Abel nga jmá biula'dxi Diuxi que ni bidii Caín la'. Ne ngué bi'ni laabe hombre ni runi jneeza. Diuxi guní jneeza de laabe pur ca'ni' bidiibe la', ne pue guendaruni cre di la? Abel de yanna riete ru modo bi'ni' cre be Diuxi necape ma guti be. ⁵ Ne laca runi guenda runi cre di nga gundiisa Diuxi Enoc ne yené be la ibá ti zaca que ñati. Que nidxeladi cabe laabe purti Diuxi yené laabe. Ante che'be que la?, biete de que biula'dxi Diuxi ni bi'ni be que. ⁶ Nga runi, sin guendaruni cre la? que zanda di chu'ladxi Diuxi ni guni nuu. Purti napa xidé de que tutisi gueeda ra nuu Diuxi la? guni cre ca de que Laabe nabani be ne laabe zucabi be ca ni guyubi laabe. ⁷ Runi guenda runi cre di nga Noe, ora bidi ti diidxa nandxó' ra nu de ca ni chi gaca, laa ne xtalepe guenda ruzuuba diidxa ne guenda riá' bi'zá tu barcu tu gulaa binni lidxi. Ra bi'ni be ndi la?, biiyabe ne guní be modo cuché binni guidxilayú ne beda ugandabe guiula'dxi Diuxi modo pe bi'ni cre be. ⁸ Runi guenda runi cre di nga Abraham, ora guní ne Diuxi la' la?, bizuuba diidxa ne biree de ra nuu que ne guyé guidxi ra chi gudii be la. ⁹ Biré zee, sin ga'na pa raa ché. Runi guenda runi cre que nga Abraham bibani ndani guidxi ni gudxi be lá que casi tobi ni zaa de zitu. Laabe bibani be ndani carpa ne Isaac ne Jocob, ne laaca gucuáca ni bidii xtiidxa Diuxi di. ¹⁰ Laabe biyadxibe jmá che'rica, guiidxi ni guyáa ne zu'huá chachui, purti naca ni ti guiidxi ni bizaa ne ni bicuí Diuxi. ¹¹ Ne laca pur guenda runi cre di, ora Sara ca dxii naca ti guná ni que zanda gapa xiiñi la? Abraham gucuá xtipa para gapa xiiñi. Beda izaaca ndi ca dxii izaa ma na gola be, que nu chee né di'be Diuxi, ni gudxi laabe de que zapa be ti xiiñi be. ¹² Ngue runi, de hombre ni ma bilaa ñati di bedagale cani naca ca casi GUIRAA BELEGUÍ NI RI'CÁ IBÁ NE CASI GUIRAA YUXI XTI NISADÓ, DE NIN QUE ZANDA IGABA CA. ¹³ Lu guenda runi cre di guiraa cabe guti cabe sin que ni cá cabe ni bidii xtiidxa Diuxi laacabe. Huaxa pe, gudiidi si de biiya ne bigapa diuxe lacabe de zitu la?, laacabe guní cabe de que zeda cabe de xti guidxi ne zeda diidi si cabe ndani ni. ¹⁴ Purti cani guiní za'ca' la? ri huini ca de que cuyubi ca xquidxi ca. ¹⁵ Pa nu caa ique cabe guidxi ra biree cabe que la?, ñanda ca nibigueta cabe raqué. ¹⁶ Peru cadi nga di nga gucala'dxi cabe ya, lacabe gucala'dxi cabe ti guidxi jmá galán, ne tobi ni nuu ibá. Ne pur nga, Diuxi que rituí luu di de gaca Diuxi xtii cabe, ti Laabe ma naguixhe chahui be ti guidxi para laaca. ¹⁷ Runi guenda runi cre di nga Abraham, bi'ini xneza, ora bidiibe Diuxi xiiñi be Isaac. Tobi lucha xiiñi be bidii be para gati, ni gucuá ca xtiidxa be. ¹⁸ Abraham nga gucuá ca diidxa di: "DE ISAAC NGA CHI GUINIÉ NIA CA XIIÑI LU." ¹⁹ Abraham nanna de que Diuxi zanda guindiisa Isaac de lade guetu, za cá zanda guiní nu ni casi ñaca biasa be dede lade guetu ne bigueta gucuábe laa. ²⁰ Ne laca pur guenda runi cre di nga, de que cani chi gaca, casi Isaac ora gulú ndaya Jacob ne Esaú. ²¹ Runi guenda runi cre di nga ora Jacob ma cayati la? gulú ndaya cada tobi de ca xiiñi José. Jacob bisisaca Diuxi, neca ma zucá si luu bastón xti. ²² Runi guenda runi cre di nga ora ma yaca chi gati José la? guní de ora chi guiré ca xiiñi Israel de ndani Egipto, ne gudxi be laca xi guniné ca' ca dxitaladi be. ²³ Runi guenda runi cre di nga, ora gule Moisés la? bicachi ca bixhoze la chona beu purti biiya cabe laabe casi ti badu huini izaa sicarú. Laacabe que nidxiibi di cabe ni guní xha ique guidxi que. ²⁴ Runi guenda runi cre xti Moisés ndi nga, ora ma binisi la? que ni ná dibe ñaca xiiñigaana Faraón laabe. ²⁵ Laga, guliibe tiidi né be ra nagaana xquidxi Diuxi, ne cadi ñeche né di be de ca guenda ru chee que pur ti ratu si. ²⁶ Laabe guní ique be de que tiidi be guenda nagaana pur nanda be Cristu nga jmá risaca que cani risaca xti Egipto. Laabe biyadxiibe ni chi tixe Diuxi laabe pur ni chi gunibe. ²⁷ Runi guenda runi cre di nga biree Moisés de Egipto. Que ni dxiibi di be xiana xti xaique guidxi que purti nána be nuu ne Diuxi laabe neca cadi cayuuya be la. ²⁸ Pur guenda runi cre xtibe que gupa be pascua que ne biné' be rini irá ra puerta ti xa ni ruxuxe ca badu lugola que la?, cadi guniná di xti ca binni Israel. ²⁹ Pur guenda runi cre que nga gudiidi cabe nisadó xiñaa que ne yendá cabe guidxi ra nabiidxi. Ora ca Egipciu gucaladxi ca ñuni' ca ndi la? guubi ni laaca. ³⁰ Runi guenda runi cre di biaba ca lindaa xti Jericó, gudiidi si de bidii cabe ni gadxe vuelta. ³¹ Runi guenda runi cre di Rahab gunna ni riu' né tuticasi hombre que ñati né cani que ruzuuba diidxa, ti laabe gucuabe ne ti guendaratadxi ladxidó cani ca na gundáchi laabe. ³² Xi ru zanda guinié ya? Ziadxa ru tiempu naa para güe nia laatu de: Gedeón, Barac, Sansón, Jefté, David, Samuel ne de ca profeta. ³³ Runi guenda runi cre xti cabe la? bini xtii cabe guidxi roo, biquiixe cabe ni bíni xtobi laabe ne gucuá cabe ni gudxi Diuxi laacabe zacácabe. Bicuéza cabe rua' ca león, ³⁴ bisuí cabe xtipa xti guii, bilá cabe de espada na duuxhu', bianda cabe de guiraa guendahuará, bidale xtipa xti cabe lu ra gudiinde cabe ne bini ganá cabe ca dxu' ni zaa de xti guidxi. ³⁵ Ca guná que gucuáca ca binni liidxi ca ni ma guti. Xcadxi la? bidiiñe ca, ne que ni ná' di ca ni lá' ca ti nanna ca de que jmá galán gad gatica ne ibani né ca Diuxi. ³⁶ Xcadxi la? biiya Diuxi pa dxandí ni laca ora guxidxi tuxa laaca, ne ora guidiiñe ca ne doo guiba ne guidaguyoo ca. ³⁷ Bidxaa ca guie'. Bigacabe laca chupa galaa. Gutica ne espada. Gucu ca guidi ladi dendxu ne chivu. Gulee cabe laaca, bixhii cabe laaca ne bini ná cabe laaca. ³⁸ Cadi para ibani di cabe ndani gudxilayú. Guzaa renda cabe ndani ra nabiidxi ne ra que rindani gaxti, lade dani, ndani cueva ne ndani guiru yu'. ³⁹ Neca pe guiraa binni di biesieche ca Diuxi pur guendaruni cre xti ca que la?, que ni cá di'ca ca ni gudxibe laaca zudibe laaca. ⁴⁰ Diuxi ma gudixhe ique guni xixa ni jmá sicarú para laanu, ti pa que laanu la? que ñee di ni laacabe jneeza.