¹ Jich yu´un, jiche, ta ora to mayukix wokolil ta stojolik te mach´atik ayik ta stojol te Cristo Jesuse. ² Melel te xjach´ibal te Espiritu yu´un kuxinel ta swenta Cristo Jesus, la yak´onix ta kolel yu´un te mulil sok te lajele te ay ta xjachibale. ³ Jich swenta te beluk ma ju yu´un te mantalile ta spasele, melel teb sta-el ta swenta te bak´ete, jich la spas te Diose. Ja la stikun tel te tul snich´an te jich yilel te bit´il mulawil bak´et jich me ya xk´ot ta majt´anil ta swenta te mulile, sok Ja la yak´ix ta k´abal te mulile te ay ta bak´ete. ⁴ Ja jich la spas ta swenta yu´un te beluk ya sk´an te mantalile jich ya xju te xk´ot ta pasel ta jtojoltik, te mach´atik yakotik ta be-el, ma ta swenta´uk bak´et, ja´ukmeto ja ta swenta te Espiritu. ⁵ Te mach´atik kuxatik jich´ bit´il ya sk´an te bak´ete, ja xbajt´ ta yot´anik te beluk yu´un te bak´ete, yan te mach´atik jich kuxatik te bit´il ay te Espiritu, ja xbajt´ ta yot´anik te beluk ya sk´an te Espiritue. ⁶ Te snop´jibal te ay ta bak´ete ya yich' tel lajel, ja´ukmeto te snop´jibal te ay ta Espiritu-e ja kuxinel sok lamal k´inal. ⁷ Ja-ito ja swenta te snop´jibal ay ta bak´ete skontrinoj te Diose, melel ma wentainbil yu´un te smantal te Diose, jich ma xju yu´un spasel. ⁸ Mach´atik ayik ta bak´et ma xju yu´unik lek´ yot´an yu´unik te Diose. ⁹ Ja´akmeto, te Ja´exe mayukatik te bak´et ja ayatik ta swenta Espiritu, te me smelil kuxul te Espiritu yu´un te Diose te atojolik. Ja´ukmeto te ay mach´a ma yich´oj te Espiritu yu´un te Cristoe, ja me to ma ja´uk yu´un. ¹⁰ Teme Cristo ay ta atojolik, ta yan,teme abak´etalik lajem ta swenta te mulile, ja´ukmeto te Espiritu kuxul ta swenta te beluk stojile. ¹¹ Te me ja Espiritu yu´un, te mach´a la sjats´estel te Jesuse ta ba almeletike ay ta atojolike, Ja te mach´a la sjts´estel te Cristo ta ba almeletik ya yak´beyex ja kuxinelik ta bay abak´etalik ta swenta te Espiritu yu´une, te ja kuxul ta atojolike. ¹² Jich´ yu´un, kermanotak, ay jbetik, ja´ukmeto ma ja´uk ta swenta bak´et sok ma xkuxinotik jich´ bit´il te ya sk´an te bak´ete. ¹³ Te me jich xkuxinex te bit´il ya sk´an te bak´ete, te ja-exe yame xlajex, ja´ukmeto te me ja ta swenta te Espiritue, te ja-exe yame awak´ik ta lajel te yat´el te bak´ete, jich´me ya xkuxinex. ¹⁴ Melel spisik te machátik tojtesbilik yu´un te Espiritu yu´un te Diose, ja´ikme yal snich´an te Diose. ¹⁵ Melel te ja´exe ma ja´uk awich´jik te espiritu yu´un te mosoinele te jich ya ximexe. Yan me to, te jaexe ja wichójik te espiritu yu´un te k´atbujatikix ta alnich´an, ja swenta te ya x-awunotik: '¡Abb, Tat!' ¹⁶ Ja nix te Espiritue ya yalbey sk´oplal te espiritutik te ja snich´anotik te Diose. ¹⁷ Te me ja snich´anotike, jich´ yu´un ja nix jich´ ay majt´antik, ja te majt´anil yu´un te Diose. Sok te jo-otike pajalme ay majt´antik sok te Cristo-e, ja swenta te bit´il pajal yak ta k´axel jwokoltik sok, jichme pajal jkich´tik albel kutsilaltik sok. ¹⁸ Ja yu´un te jwokoltik ta ora to ma pajaluk sok te utsilal te yak ta ta-ele te ya kich´tik akbel jkiltike. ¹⁹ Melel te beluk káxel yakotik ta sk´anel yu´un spisil te bitik pasbile ja te yakuk x-abototik jkiltik te bit´il alnich´anotik yu´un te Diose. ²⁰ Melel te bitik pasbile la yich akél ta swenta te beluk ma xju yu´une, ma ta swenta-uk te jich la sk´ane, yu´un jich la sk´an te Diose, te ja la yak te ayuk smalib´ yot´an ²¹ te beluk pasbile te bit´il ya yich kolteyel lok´el ta mosoil yu´un te beluk ma stojile te ya sta te kolel yu´un te utsilal ta swenta te yal snichán te Diose. ²² Melel ya jnatik te spisil te bitik pasbile yak woklajel sok yak ajk´an jich´ bit´il te kolel aljele jich ta ora to. ²³ Ma ja´uknaxabi, melel te jo-otike, te mach´atik kich´ojtik ta sbabialan sit te Espiritue: jich´ te jo-otike yakotik ta ajk´an, ta smaliyel ta jtojoltik te k´atbujele, te kolel yu´un te jbak´etaltike. Jich ta swenta te smalib´otánile la jkich´tikix kolteyel. ²⁴ Ja´ukmeto te beluk smuk´ulinej kot´antike ma to xk´ot ta pasel sok ma to jtatik ta ilel, ¿Mach´a te sokxan smuk´ul yot´an te yak ta smaliyel te beluk yilojixe? ²⁵ Ja´ukmeto te jo-otike ay smuk´ul jkot´antik yu´un te beluk ma to jkilojtike, ja swenta te jo-otike yakotik ta smaliyel sok smalib jku´untik. ²⁶ Ja´nix jich´, te Espiritu janix ya skoltayotik kálal teb´nax jta-iltik. Melel te jo-otike ay majnatik sk´oponel te kajwaltike, ja´ukmeto te Espiritue janix ya skoltayotik ta yalel wokol te swenta bik´itiknax ta k´op. ²⁷ Ja, te ya stsajteybotik jkot´antik, snaoj te beluk ya snop te Espiritue, melel ja ya skoltey ta sk´anel te ch´unjeletike jich´ te bit´il ya sk´an yot´an te Diose. ²⁸ Jo-otik jnaojtik te mach´atik sk´anoj te Diose, spisil te beluk ya xk´ot ta pasele yu´un jlekilaltik, ja te mach´atik ikbiliktel te jich la xchap sok te jich la sk´an yot´an. ²⁹ Melel te mach´atik Ja la snabey sbaik ta sne-elale, Ja yolojbeyix sk´plal te jich pajal ya xk´otik jich´ yilel te bit´il te snich´ane, jich´ me ya xk´ot te bit´il sba nichánil yu´un te yantik yermanotake. ³⁰ Jaíkme te mach´atik jich chapbilixtel sk´oplal, ja´ikme te mach´atik la yik´ixtele. Te mach´atik la yik´ixtele La skolteyix. Te mach´atik la skolteyoxe, La yalbeyix yutsilal. ³¹ ¿Jich´ yu´un beluk me ya jkaltik yu´un spisil in to? te me Dios ja ay ta jwentatike, ¿Mach´a ya xju skontroinotik? ³² Melel Ja, te la yak ta k´abal te snich´ane, jich la yak ta k´abal swenta te ya skoltayotike, ¿Bit´il ma xju yu´un yak´botik jmat´antik ta spisil te bit´ik aye? ³³ ¿Mach´ame ya xju slebey smul te mach´atik tsabilixe yu´un te Diose? melel te Diose ja yal stukel te mach´a skolteye. ³⁴ ¿Mach´a ya xju yak´at ta k´abal? te Cristoe ja laj ta jwentatik, sok te beluk k´ax muk´ sk´oplale, Ja te la yich´ cha kuxestele. Ja yakix ta ajwalinel sok te Diose, te banti ay te yamil te ich´el ta muke, sok ja yak ta k´op ta jwentatik. ³⁵ ¿Mach´a katik ya xju yu´un sk´ejotik lok´el ta sk´uxul yot´an te Cristoe? ¿Woklajel, swokol jkot´antik, nutsel, winal, te t´analotike, te il ot´anteyele, o milel? ³⁶ Jich te bitíl ts´ibubile, 'TA SWENTA TE BEK LEK TA ATOJOLE LAJEMOTIK SPISIL ORA. JICH ILBILOTIK BIT´IL TUNIM CHIJ TE IKBILOTIK TA BA MILJIBALIL'. ³⁷ Ta spisil te bitik aye te jo-otik ju´emix ku´untik tsalaw ta swenta te Mach´a la sk´anotike. ³⁸ Jich yu´un junajemix jkot´an yu´un, te lajele, te kuxinele, te ch´ul abatetike, te ajwaliletike, te bitik ay ta ora to, te bitik ay ta talel, te bitik ay yu-ele, ³⁹ te bitik najt´e, te bitik najt´ ko-eme, bitik yantik pasbile, ma xju yu´unik te ya slok´esotik ta stojel te sk´uxul yotán te Diose, te ja ta swenta te Cristo Jesus te ja jkajwaltik jku´untike.