¹ Jich yu´un ya jkalbeyex, kermanotak ta swenta te xk´uxul yot´an te Diose, ak´beyaik te abak´etalik jauk me kuxul smajt´an, ch´ultesbiluk, sok nix te lek yot´an yu´un te Diose. Ja´ jich ya sk´an yich ich´el ta muk´. ² Ma me pajaluk awot´anik sok te mach´atik ay ta balumilale, sok yanubukme te yach´il snopjibal awu´unike. Pasaik to yu´un me jich ya anaik te beluk leke, te ay yuts´ile, sok te sk´anjel yot´an te Diose. ³ Jich ya jkalbeyex, ta yuts´il yot´an te jich la yak´one, ta apisilik manchuk me ay mach´a ya snop te ja´ lek´ ya skuy te snopjibal yu´un te bit´il yane. Jaukmeto tu´untesaik te snopjibal awu´unike jich te bit´il la yak´beyex ta tulul jtul te Diose, jich nix te bit´il smuk´ul xch´unjel yot´ane. ⁴ Te jo´otike bayal ta chap te beluk ay ta jbak´etaltike, jaukmeto ya yan tika-a te yatele. ⁵ Janix jichu-uk teme bayal tsobolotik junax jbak´etaltik ta stojol te Cristoe, sok ta tulu tul junax ya xk´ootik sok te yantike. ⁶ Te jo´otike ya yan tika-a te majt´anil ak´bilotike ja´ jich te bit´il yuts´il yot´an yak´obotike. Te me ay mach´a ak´bil smat´anin te alwaneje, aka me spas jich te bit´il smuk´ul te xch´unjel yot´ane. ⁷ Teme ay mach´a ak´ot te abatinel, aka me spas. ⁸ Teme ay mach´a ak´bot smat´anin te ya sbijteswane, ak´beyame sbijteswan. Te me ja´ ay mach´a smajt´an te ya xtak´uwanej ak´beyaik xtak´uwan. Te me ja´smajt´an te ya yak te beluk ay yu´une, aka me yak´ bayal. Te me ja´ smajt´an te ya yak ilel xk´uxul ot´anile, aka me spas sok bujts´ yot´an. ⁹ Jich te sk´uxul ot´anile manchuk me cha lam. Ilayaik te beluk ma lekuke; ja´ me at´unik te beluk leke. ¹⁰ Stalel k´uxuk me awayabaik te awermanobaike, jech k´ux awayabaik sok te yantike. Sok jech ich´a baik ta muk´ ta tulul jtul. ¹¹ Sok ja me xbajt´ ta awot´an, ma me xch´ajubex; sok te espiritue lea k´axem to xan jich me ya yabatinat te Kajwaltike. ¹² Binuk nax me awot´anik smaliyel te beluk ya awich´ik patil te jaexe. Yakuk me ts´ika awu´unik te beluk ma lekuk ya xtale. K´oponaik me te kajwaltike. ¹³ Akbeyaik te beluk ya xtu´un yu´un te ch´unjeletike. Le-aik te bit´il ya awak´ik ilel te junax awot´anik ya awik´ik ochel te mach´a ya xk´o yilate. ¹⁴ K´anbeyaik bendision te mach´a ya snuts´exe, ch´ultesbeyaik te xkuxinele sok ma abolk´opteyik. ¹⁵ Binuk nax awot´an sok te mach´atik binax yot´anike; ok´anik sok te mach´atik yak ta ok´ele. ¹⁶ Junuk nax te snopjibal awu´un sok te yane. Ma anop te atoyaba-e ya sk´an te ya join te anst- winik te pek´el yak´osba-e. Ma akuy te bij spisil te beluk ya anope. ¹⁷ Ma x-apakoltey te mach´a bila ma lekuk ya spasbexe. Pasaik te beluk lek ta stojol spisil te ants-winike. ¹⁸ Teme ya xu´ awu´unike ayuk me lamal k´inal awayik sok te yantike. ¹⁹ Ma x-apakoltey te jaexe, k´uxex ta jkot´an ja x-awak´beyik ta swenta yilimba te Diose. Jich te bit´il ts´ibubile: ¨JO´ON AY TA JWENTA YAK´EL SPAKOL, JA YA KAKBEY STOJ¨, jich ya yal te kajwaltike. ²⁰ ¨JAUKMETO TEME AY TA WINAL TE AWAKONTRO-E, AK´BEYA SWE-EL. SOK TEME YAK TA TAKIN TI-ILE, AK´BEYAME JA YUCH´. TE ME LA PAS SPISIL IN TO, YA ME ATSOBEY K´AJKAL AK´AL TA SJOL¨. ²¹ Ma x-awak´ sts´alat te beluk ma lekuke, ja´ me atsal te beluk ma lekuk ta swenta te beluk leke.