¹ Jich yu'un te ch'ul abat la yak'bon kil muk'ul ja' jich bit'il te cristal te xlemet nax sok sak nax te ja ya yak' kuxinele. Le' yak ta lok'el tel ta bay muk'ul naktijibal yu'un Dios sok te alal chije. ² sok okin beel ta yolil te calle yu'un te muk' lume. Ta jujumejch' sti'il te ja'e le aya te te' te ja ya yak' lajchayeb (12) sit yu'un te kuxinele melel ya yak' sit jujun u. Te ya'benal te te'e ja xpoxil te muk'ul lumetike. ³ Mayukix mach'a le'a te ya x-ak'ot bael ta ch'ayel. Te smuk'ul naktijibal te Dios sok te alal chij le' me ayika ta bay muk'ul lum sok te abatetik yu'une ya me yich'ik ta muk'. ⁴ Ja me ya yilbeyik te sit-yelawe sok ta stibaik ts'ibubil te sbiile. ⁵ Ma me ayukix xan ajk'ubal; Ma me xtuun jkuntikix te yawil k'ajk'etike sok te xojobal te k'aale melel ja sakubenix k'inal yu'un te xojobil te jkajwaltik Dios. Sok sbajt'el k'inal ya x-ajwalinik. ⁶ Te ch'uul abat la yalbon: " Ja ini k'op to ja smelil sok ma' spax lot. Te jkajwaltik, te ja Dios yu'un te alwanejetik te ja ta swenta la yak'beyik yipal, la stikuntel te ch'ul abat swenta yu'un tal yak' ilel ta stojolik te abatetik yu'une te bila nopol ya xk'ot ta pasele". ⁷ "¡Ilawil! ¡Le' me nopol ya xtalon! Binax yutsil te mach'a ya xch'uun te bek ts'ibubil jilel ta jun te ya xk'ot ta pasele". ⁸ Jo'on, Juan, te la jkaiy stojole sok la jkil spisil into. k'alal la jkaiy stojole sok la jkile, la jkejan ba koel ta yich'el ta muk' te ch'ul abat, te ch'ul abat te mach'a la yak'bon kil in to. ⁹ La yalbon : "¡ Ma xa pas jich! melel pajal yabatotik te Diose, sok te awermanotak te alwanejetike, sok te mach'a ya xch'uun te bek ts'ibubil ta june. ¡ Ich'ame ta muk' te Diose !". ¹⁰ La yalbon: Ma me xa mak te bek ts'ibubil jilel, melel le nopolix ya xk'ot ta pasel. ¹¹ Te mach'a ma toj te yat'ele, aka me spas xan te bek ma tojuk ta pasele. Te mach'a ch'aluben yu'un te bek ilabil sbae, aka me xch'altesba xan. Te mach'a toj te yat'ele, aka me spa xan te bek toje. Te mach'a ch'ultesbile, akame yich' ch'uultesel xan". ¹² ¡Ilawil! Le me nopolix ya xtalon. Jkich'o me tel ta majt'aniletike, yu'un jich me ya tojbey ta jujutul te bek la spasike. ¹³ Jo'on me te Alfa sok te Omega, te sjajch'ibal sok slajibal, te sbabial sok slajibal. ¹⁴ Binax yutsil te mach'a ya xch'uunbeyik smantal yu'un jich me ya stak' slobeyik te sit te te' yu'un te kuxinele sok te ya stak' x-och bael ta stinael te muk'ul lume. ¹⁵ Yan te ts'ietike, te mach'a ts'ilwanejetike, te mach'a ya spasik mulile, te mach'a ya xmilwanike, te mach'a ya yich'ik ta muk' te lok'ombailetike, sok spisil te mach'a ya sk'anik sok ya spasik te lote ya me xilik ta bay spat te ti'naele. ¹⁶ Jo'on, Jesús, la jtikunbael te jch'uul abat yu'un ya yak'bat ana' stojol spisil ini k'op to te ja ta swenta te ch'uunjeletike. Jo'on te yisim sok sts'umbalon te muk' ajwalil David, jo'on te ek' te mero xlementnaxe te ya xlok'tel ta sakubelan k'inal ¹⁷ Te Espíritu sok te mach'a ya xnujp'in sok te alal chije jich ya yal:"¡La!" spisil te mach'a ya yaiy stojol aka yal-uk: "¡La'!" te mach'a ya yaiy takin-ti'il, aka me taluk, sok te mach'a ya sk'an xtale, smajt'an ya x-akbot te ja' yu'un te kuxinele. ¹⁸ Ya jkalbeiy ta jamal te mach'a ya yaiy stojol te beluk ts'ibubil jilel ta june: Teme ay mach'a ya yak'bey sjuy te beluk ts'ibubil jilele, te Diose ya me yak'bey te ya xtal ta stojol te jayeb chajb' wokolile te ts'ibubil jilel ta june. ¹⁹ Teme ay mach'a ya sk'ejbey tebuk te bila ts'ibubil jilel ta bay june, janix jich ya xlok'esot yu'un Dios, ma ba ya x-ak'bot slo' te sit te te' swenta yu'un kuxinel sok ma ba ya x-och ta mu'kul ch'ul lum te ja ts'ibubil sk'oplal ta bay te june. ²⁰ Te mach'a ya yalbat spisil into: "¡ Jich! nopol ya xtalon ". ¡ Jichuk! ¡ La' kawal Jesús! ²¹ Te yut'sil yot'an te kawaltik Jesús ayuk ta atojolik. Jichuk.