¹ Patil la jkay stojol te ay tsobol ants-winiketik te ayik ta ch'ulchan te tulan yakalik ta k'op; te jich la yalike: ''Aleluya. Stukel nax ay kolel ta swenta te Dios jku'untike, ay yutsilal sok ja ay bayal yu'el stukel. ² Swenta yu'un te smelelil sok te toj te xchajp'anel yu'une, melel ja la yich'ix likbel smul te mulawiletik te ayik ta Babilonia te jich k'oemik te bit'il mulawil-ants te la sboltes ta smulwej te spamal balumilale. Te Diose la yak'beyix stoj te la smalbey xch'ich'el te abatetik yu'une.'' ³ Cha'k'opojik xan:''¡Aleluya!, jich sbajt'el k'inal xtomet ta moel te xchailel te muk'ul lume.'' ⁴ Te chane'scha'winik (24) ta tul te mamaletik sok te chankojt' (4) te bintik kuxatik la skejan sbaik sok la slajin sbaik ta stojol te Dios te ja nakal ta bay te muk'ul naktijibal. Jich yakalik yalel: ''Jichuk. ¡Aleluya!'' ⁵ Jich yu'un la jkay stojol jun k'op te le' tal ta bay muk'ul naktijibal, te jich ya yale: ''Ich'aik me ta muk te Dios jku'untike, spisil te abatetik yu'une sok te mach'atik xi'ojike, jaex te mayuk bi ay awu'unike sok te mach'a tulan yat'elike.'' ⁶ Jich yu'un la jkay stojol yan k'op te ja pajal sok te tsobol ants-winiketik te tulan yakalik ta k'op, jich bit'il ya xk'opoj ta tulan te bayal te ja'etike sok sk'op tulan chawuk, te jich yalike: ''¡Aleluya! melel jajch'ix ta ajwalinel te Kajwaltik, te ja Dios te spisil ya xju' yu'une. ⁷ Aka me bujts' najuk kot'antik sok binuk nax me jkot'antik sok aka me jkalbeytik yutsilal te Dios melel la staix yorail te k'in swenta te nujbinel yu'un te alal-chije melel la xchajban sbaix te mach'a ya xnujbin soke.'' ⁸ Melel ja ak'botix slap te lino-pak' te xlem nax sok te sak nax ta ilel'' (Melel te lino-pak' ja seña te bila toj spasojik ta k'inal te mach'atik ch'ultesbilike). ⁹ Te ch'ul abat la yalbon: ''Ts'ibuya ta jun in to: Binax me yutsilik te mach'atik ik'bilik ta we'el ta bay te nujbinel yu'un te alal-chije.'' Sok jich la yalbon xan: ''Ja in to ja smelelil sk'op yu'un Dios.'' ¹⁰ Te jo'one la jpajk'an ba ta yakan te ch'ul abate jauk me to la yalbon: ''¡ma xa pas jich me to!'' melel pajal ayotik ta abatinel sok te ja wermanotak te mach'atik ya xch'uunik sok te ya yalik ta jamal te sk'oplal te Jesuse. Ja me xa lajin aba ta stojol te Dios, melel te sk'oplal te Jesúse jaix te ya x-at'ej ta yot'anik ta swenta te Ch'ul Espíritu.'' ¹¹ Sok la jkil te jamal te ch'ulchane te ay kojt' sakil caballo le'a. Te mach'a kajal le'a ja stalel jun yot'an sok smelelil xk'opoj , xi te sbiile. Yu'un toj ya yay chajbanwanej sok toj ya yaiy tsalaw. ¹² Te site jich yak ta tilel te bit'il k'ajk', sok ay bayal koronaetik ta sjol. Sok ts'ibubil jun biilil te mayuk mach'a ya sna', ja nax ya sna' stukel. ¹³ Slapo jun smuk'ul-sk'u' te mulbil ta ch'ich', te sbiile ja sk'op Dios. ¹⁴ T'umbil yu'un tsobol soldadoetik ta ch'ulchan te kajalik ta sakil caballo, te slapojik lekil lino-pak', te saknaxe sok te mayuk xch'alele. ¹⁵ Te yak ta lok'eltel ta ye jun espada te mero juxbil ye te ya yexnentes te lumetik sok te yaiy ajwalinel sok jawubil-tak'in. Ya me xpech' ta tek'el te yaj-kontro ta swenta te chajbanel yu'un Dios te ja k'ax bayal yuel stukel , jich te bit'il ya yich' pits'el ta tek'el te ts'usube. ¹⁶ Ja ts'ibubil sbiil ta bay te muk'ul-sk'u'e sok ta bay skub: ''Ja Muk' Ajwalil yu'un Spisil te muk' Ajwaliletike sok ja ajwalil yu'un spisil te ajwaliletike.'' ¹⁷ La jkil tul ch'ul abat te tek'el ta bay xojobal te k'aale. Tulan yak ta yawteyel spisil te mutetik te yakalik ta wilel ta sjamalul te ch'ulchan: ''La'ik, tsoba-baik tel ta il k'in yu'un te Diose. ¹⁸ La'ik ta we'el, la' ti'beyaik sbak'etal te muk' ajwaliletik, te sbak'etal wolwanej yu'un te soldadoetike, te sbak'etal te caballoetike sok te mach'atik kajatik le'a sok te sbak'etal spisil ants-winiketik, te abatetik sok te mach'atik kolemik, sok ta muk'bik'it.'' ¹⁹ La jkil te chambalam te xiwantik sbae sok te muk ajwaliletik te ayik ta balumilale sok te tsobol soldadoetik yu'une. Te yakalik ta stsobel sbaik swenta yu'un sjachel kera sok te mach'a kajal ta bay te sakil caballo sok te tsobol soldado yu'unuke. ²⁰ Te chambalam te xiwantik sbae la yich' tsakel sok te lotil chol k'ope ja te la yak'tiley ta ilel señaetik ta stojole. Te swenta te señaetik te la spase ja yu'un la slo'liy spisil te mach'atik la yich'ik te marca yu'un te chambalam te xiwantik sbae sok te la slajin sbaik ta stojol te slok'ombae. Kuxul la yich'ik ch'ojel ochel ta xchebalik ta bay muk' pamal k'ajk' te yak ta tilel sok azufre. ²¹ Te jayeb xan jilik, la yich'ik milel ta espada te yak ta lok'el tel ta bay te ye te mach'a kajal ta caballoe. Spisil te mutetike la slajinik te bak'talil yu'un te mach'atik lajemike.