¹ La kay stojol te ay mach´a tulan k´opo ta banti yawil te beluk k´ax ch´ultesbil sok la yalbey te juk tul ch´ul abatetik: ba-anik sok malaik te juk wax yilimba te Diose¨. ² Te sbabial ch´ul abat bajt´ sok la smal lok´el ta balumilal te yawil ilimba-e; bayal stuil sok chajp´ix xkúxula-a te k´ael chamel tal ta stojolik te anst-winike ja´te mach´atik yich´obeyik smarka te x-ibantik sba chambalam, sok te mach´a la yich´ik ta muk´te slok´ombaile. ³ Te xchebal ch´ul abat la smal lok´el te yawil ilimba ta bay muk´ul ja´. Jich k´atbu te bit´il xch´ich´el tul anst-winik te lajemix-e, sok spisil te beluk kuxul ta muk´ul ja´e lajik. ⁴ Te yoxebal ch´ul abat la smal lok´el te yawil ilimba ta jaetik sok te bay slok´ib jaetik; jich k´atbu ta ch´ich´. ⁵ La kaiy stojol te ch´ul abat yu´un te jaetike la yal:¨Ja´at te toj awot´an atukele sok te atalel ayat ta namey, Te Ch´ultesbilat melel Ja´ la awayix chajp´anwane. ⁶ Jich te bit´il la smalbeyik xch´ich´el te ch´unjeletik sok te alwanejetik, jich la awak´bey yuch´ik ch´ich´; yu´unix jich ya sk´an yich´ik pasbela. ⁷ La kay stojol te bay chik´jibal milbil majt´anil yu´un te kajwaltike jich la yal: ¨Jich, Kajwal Dios te spisil ya x-u awu´une, te ya away ajwalinel ta spisil te beluk aye, te bit´il away chajp´anwaneje ja´ te smelelil sok te toje.¨ ⁸ Te xchanebal ch´ul abat la smal lok´el te beluk ay ta yawil te ilimba-e ta banti ay te k´a-ale, sok la yalbey mantal te ya xchik´ spisil te anst-winik sok te sk´a-ale. ⁹ Jich la yich´ik chik´el yu´un te k´ax tulan te k´a-ale, jich la sbolk´opteyik sbiil te Diose, Te ay yu´el yak´el spisil te woklajele. Jaukmeto ma la sujt yot´anik sok ma la yalbeyik yutsilal. ¹⁰ Te sjoebal ch´ul abat la smal lok´el te yawil ilimba te bay muk´ul snaktijib te x-ibantik sba chambalam, la smuk ta ijk´ k´inal te bay yak ta ajwalinele. ¹¹ La yutik te Dios te ay ta ch´ulchane ja yu´un te sk´uxul k´ael chamele sok ma la sk´an sujtik yot´anik yu´un te beluk la spasike. ¹² Te swakebal ch´ul abat la smal lok´el te yawil ilimba te bay muk´ ja, te Eufrates. Takej te yalel jich ju´ yu´unik xchap´anel sbe te muk ajwaliletik te ya xtalik ta bay slok´ib k´a-ale. ¹³ La jkil o-xeb espiritu te ilabil sba-e jichik yilel te bit´il pork´ok te yakik lok´eltel ta bay ye te muk´ul chan te ya xlok´tel k´ak´ ta ye-e (Dragon) sok ta ye te x-ibantik sba chambalam (Bestia) sok nix te lotil alwanej. ¹⁴ Jaik in to ja espiritu yu´un te pukujetik te ya spasik seyaetik te chajpnax ta ilele. Yakik ta bael te banti ay te muk´ul ajwalile yu´un te balumilale jich me junax ya xk´ot ta spisilik te k´alal ya sta sk´alelal kerajel yu´un te Dios te spisil ya x-u yu´une. ¹⁵ (¨¡Ilawilik! ¡Jich me ya xtalon te bit´il elek´e! Binax me yuts´il te mach´a wik´il sit, sok te slapoj sk´uik yu´un me ma t´analuk ya yich ilel te bit´il ay te sbak´etale.¨) ¹⁶ Junax me ya kik´tik bael le ta bay lum Armagedón sbiil ta hebreo k´op. ¹⁷ Jich te sjukebal Ch´ul abat la smal lok´el te yawil ilmba ta bay ik´. Ta patil ay k´op te tulan lok´tel ta bay sna te kajwaltik (templo) te ay ta smuk´ul snaktijib, jich la yal: ¨¡k´otix ta pasel!¨ ¹⁸ Jach lemlajanel te tsantsewal, ay bi yak ta bul sk´op, ay chawuk sok tulan nijk´el te nijk´ele k´ax tulan yip mayuk jich k´axem ta stojol te anst-winik te jayeb k´a-al kuxul ta balumile. K´ax-emto smuk´ul k´ax te nijk´ele. ¹⁹ Te muk´ul lume la yich´ x-atel ta ox chajp´, sok te lumetik yu´un te muk´ul pam lumetike jinik ko-el. Ta patil te Diose tal ta yot´an te Babilonia te mero muk´e, sok te Ja´ la yak´bey yuch´ te kopa te nojel ta vino te pasbil ta tulan yilimba. ²⁰ Spisil ch´i lum te ay ta yolil muk´ul ja-e tubik be le-a sok te witstikile ma chikanuk bay bajt´. ²¹ Into k´inal te xch´enul bate, jich yalal te bit´il jun majt´anil, koiktel ta bay ch´ulchan ta sba te ants-winik. Jich la sbolk´opteyik te Dios yu´un te swokolil te bate, melel te woklajele mero la xi-ik.