¹ .-Te k'alal yak ta k'axel ba'el ate Jesus, la yil tul winik te masit k'alal to ta sbejk'ijb. ² .-Te nopojeletik yu'une la sjojk'ibeyik: "Rabi, ¿mach'a la yay mulwej, ja bali winik to o ja bal te sme state, yu'un te masit bejk'ae?" ³ .-Te Jesus la sjak': "ma ja'uk te winike, sok ma ja'uk la yay mulwej te sme state swenta nax yu'un ya xchiknaj ta ilel te yat'el Dios ta stojol. ⁴ .-Te jo'otike ya me sk'an ya jpasbeytik yat'el te mach'a la stikunontele yu'un sak to te k'inale. melel yakix me ta ijk'ubel te k'inale k'alal mayuk mach'a ya xju x-at'eja. ⁵ .-Jich bit'il te ayon to ta balumilale, jo'on te xojobil yu'un te balumile" ⁶ .-Jich yu'un te k'alal jich la yaltilan te Jesuse, la stubtey te lume, la spas ajch'al sok te yalel sti'e sok la sjaxbey ajch'al ta sit te ma site. ⁷ .-Jich la yalbey: " ba'an, poca asit ta bay yawil ja' yu'un siloe' (Te siloe' ta k'asesbil ja jich ya yal 'tikumbitel')". Jich yu'un bajt' te winike, sok la sap te site sok ya yilix k'inala te k'alal sujt' bele. ⁸ .-Jich yu'un te spat xujk' te winike sok te mach'atik yilojik te bit'il masit ta snelalto'e. Masit ta snelalto'e, jich yakalik ta yalel: "¿Mabal ja'uki winik to te ya snajk'ansba ta k'ambajeje? ⁹ .-Ay cha'oxtul te jich la yalik: "Ja ki meto". sok ay yantik te jich la yalik: "ma ja'uk, janax te pajal sok yilele". Jich la yal te winike: "Jo'on me" ¹⁰ .-Jich la yalbeyik: "jich yu'un, ¿bit'il jama te asite?" ¹¹ .-Ja jich la sutbey: "Tul winik te Jesus sbi'ile la spas ajch'al sok la sjaxbon ta jsit sok la yalbon: 'ba'an ta bay siloe' sok poka tel te asite'. Jich, bo'on sok la jsap te jsite sok jich la jkil te k'inale. ¹² .-Jich la yalbeyik: "¿Banti ay te winike?" Jich la sut: "ma jna banti aye". ¹³ La yik'ikbel ta stojol te fariseoetike te winik te masita'e. ¹⁴ .-Ja'uk meto, sk'alelal k'ux ot'anil te k'alal la spas ajch'al te Jesus sok te la sjambey sit te ma site. ¹⁵ .-Jich yu'un, yambu'elta, te fariseoetike la sjojk'ibeyik te bit'il Jam te site. Jich la yalbey: "Ja la yak'bon ajch'al ta jsit, la jsap te jsite sok jich ya stak' skilix te k'inale". ¹⁶ .-Ay cha'oxtul te fariseoetike te jich la yal: "Ja'i winik to maja'uk yu'un Dios melel ma sk'ej te sk'alelal k'ux ot'anile". Sok ay yantik te jich la yalik: "¿Bit'il ya xu yu'un spasel señal tul winik te mulawile?" Jich ma junuk yot'an sba'ik yu'un. ¹⁷ .-Jich yu'un la xcha sjojk'ibeyik yambu'eta te masite: "Bi xi'at yu'un te mach'a la sjamb'at te asite?" Te masit winike la yal: "Ja jun alwanej". ¹⁸ .-Jich yu'un te judioetike ma xch'un yot'anik te ja te masit winike sok te bit'il jam te site, ja to te k'alal la yik'beyiktel te sme stat te mach'a jam te site. ¹⁹ .-Jich la sjojk'ibeyik te sme state: "¿Jabal anich'an ito te ya awal te masit bejk'aje? ¿Bit'il aya te ya sta'ix ilele?" ²⁰ .-Jich yu'un te sme state la sut beyik: "ya jnatik te ja jnich'antik to'e sok te masit bejk'aje. ²¹ .-Bit'il aya te ya yilix k'inale, te jo'otike ma jnatik, mach'a la sjambey te site, ma jnatik mach'ae. Jojk'ibeya awayik stukel. Melel ayix xch'iel awile. Ak'a k'opajuk stukel" ²² .-Te sme state ja jich la yaltilanik to ta skaj te ya xi'ik te judi'oetike. Melel te judi'oetike chajbanbilikix yu'un teme ay mach'a ya yal te ja Cristo te Jesuse, te ya yich'ik lok'esel ta bay sinagoga. ²³ .-Ja yu'un, te sme state la yalik: "Ja Jun muk'ul winikix. Jojk'i beya'ik stukel" ²⁴ .-Ja jich ta xchebal bu'elta, la yik'iktel te winik masita'e sok jich la yalbeyik: "Albeya wokol Dios. Te jo'otike ya jnatik te mulawil te winik to'e". ²⁵ .-Jich yu'un te winike la sjak': "Te jo'one ma jna teme mulawile. Ja nax ya jna: te ma sitona'e, ta ora to ya jkilix te k'inale". ²⁶ .-Jich yu'un la yalbeyik: "¿Bek la spasbat? ¿Bit'il la sjambat te asite? ²⁷ .-Ja jich la yalbey: "¡La jkalbatikix awayik, sok ma la wayikstojol! ¿Bistuk awunik te ya ak'an awayiksto xane? ¿o yu'un bal ya ak'anik te ya xk'atbujex ta nopojeletik yu'une? ²⁸ .-Jajch' yutik te winike sok la yalik: "Te ja'ate yu'unbal nopojelat yu'un, yan te jo'otike ja nopojelotik yu'un te Moises. ²⁹ .-Na'otik stojol te Dios k'opaj sok te Moises, ja'uk meto majnatik te bay talem me to'e". ³⁰ .-Te winike la sjak'bey sok la yal: chajb nax ya jkay, te bit'il ma anaik te bay taleme, ja'uk meto ja la sjambon te jsite. ³¹ .-Te jo'otike na'otik stojol te Dios ma yaybestojol sk'op te mulawiletike, ja'uk meto teme ay mach'a xi te Jesus sok teme ya spasbey te sk'anjel yot'ane, ya x-aybotstojol sk'op stukel. ³² .-Jich bit'il te k'alal chiknoj te' balumilale mayuk ba xchiknaj ta ayestojol te ay mach'a ya sjambey sit te masit k'alal to ta sbejk'ijibtele. ³³ .-Ja'i winik to te yunuk manchuk ja yu'un te Diose, mayukbi xu yu'un spasel". ³⁴ .-La sjak'beyik sok jich la yalbeyik: "Te ja'ate bejk'ajat ta swenta mulil, ¿sok yakat ta nojbesbelotika te jo'otike?" Jich yu'un la steniklok'el. ³⁵ .-Te Jesus la yaystojol te la yich' lok'el tenel ta bay sinagoga, te k'alal la sta'e jich la yalbey: "¿yabal ach'u'un te snich'an te winik?" ³⁶ .-Ja jich la sjak sok la yal: "¿Mach'a, kajwal, yu'un jich ya stak' jch'uuna?" ³⁷ .-Te Jesuse la yalbey: "Ay awilojix, sok ja te mach'a yakat ta k'op soke". ³⁸ .-Te winike la yal: "Kajwal, ya jch'uun", sok ya skich' ta muk' ³⁹ .-Te Jesus la yal: "Ja talon yu'un ta yich'el ta k'op te balumilale, ta swenta te mach'a ma yil k'inal ya stak yil k'inal sok ta stojol te mach'a ya yil k'inal ya me yich' makbel sit". ⁴⁰ .-Ay cha'oxtul te fariseoetik te sjokinojika'e, la yayikstojol te beluk la yal sok la sjojk'ibeyik: ¿Te jo'otik yu'unbal masitotik?" ⁴¹ .-Te Jesus la yalbey yayik: "Te yu'unuk masitatike, mayuk amulik te jichuke, ja-uk meto ya awalik: 'Te jo'otike ya jkiltik k'inal; jich yu'un ay te amulike.