¹ .-Wakeb xan k'aal sk'an sta a te k'in Pascua, te Jesus bajt' ta Betania, te banti ay te Lazaro, ja te mach'a ch'akuxesot. ² .-Jich yu'un la spasbeyik swe'el te Jesus, te Marta yakta abtinel, yan te Lazaro ja nakal ta we'el sok te Jesus. ³ .-Te Maria la yich'tel jteb ma oliluk litro perfume te mayuk bi kapibil soke te nardo sbiile, te mero uts stojole, la smalbey ta yakan te Jesus, soj la stakintesbey ta stsotsil sjol. Noj ta yik' perfume te nae. ⁴ .-Judas Iscariote, te ja tul nopojel yu'un ja te mach'a ya yak'ta k'abal te Jesus la yal: ⁵ .-"¿Bistuk mala yich chonel ta jo'lajunwinik (300) denario-tak'in te perfume yu'un jich ya yich ak'beyel te mach'atik mebaetike?". ⁶ .-Te bit'il jich la yal, ma nix yu'un a te ya snabey yobolil sba te mebaetike, ja yu'un te ja elek': melel ja yich'oj te yawil tak'in sok ja ya snak' lok'el te beluk ya x-oche. ⁷ .-Te Jesus jich la yalbey: "Aka spas; melel ja sk'ejojbon yu'un te bi ora ya xmuk'one. ⁸ .-Melel te mabaetike spisil ora ayta awalilik; yan te joone, ma spisiluk ora le' ya joinex". ⁹ .-Ay bayal Judioetik te la yaiyik stojol te le'aya te Jesus, jich talik ta yilel, ma jauk nax yu'un te Jesus, ja ba yilik-uk te Lazaro te cha'kuxemix tel ta yolil te ailmeletik yu'un te Jesus. ¹⁰ .-Ja yu'un te wolwanej sacerdoteetik la xchajb sbaik, yu'un ya sk'an smilik-uk te Lazaro; ¹¹ .-Melel ja ta swenta te bayal judioetik lok'ik bael ta stojolik sok ja ba xch'uunik te Jesus. ¹² .-Ta yan k'aal bayal mach'atik talik ta ilk'in. Te k'alal la yayik stojol te ya stal te Jesus ta Jerusalen, ¹³ .-Jich yu'un la sbojik tel yabenal ch'ibetik sok ba staik tel ta be te Jesus, sok ja yalik ta aw: "¡HOSANNA! BINAX YUTSIL TE MACH'A YA STAL TA SBIIL TE KAWALTIK, TE AJWALIL YU'UN TE ISRAEL". ¹⁴ .-Te Jesus la sta kojt' burro. La skajtibin bael; jich te bit'il ts'ibubil jilel: ¹⁵ .-"MA ME XIWAT, LUM YU'UN SION; ILAWIL, YAK TA TAEL TE AJWALIL AWUUNE, KAJAL TA CH'IN BURRO". ¹⁶ .-Te nopojeletik yu'une ma ba k'ot ta yot'anik ta sneelal; jauk meto te k'alal ak'otix ta ilel yutsilal te Jesus, jul ta sjolik te jich nix ts'ibubil jilel sk'oplale sok te jich nix k'ot ta pasel ta stojole. ¹⁷ .-Te mach'atik sjokinejik te Jesus, te k'alal la yik lok'el tel ta mukenal te Lazaro sok te la xcha'kuxes tele, jaik nix te ba xcholbeyik sk'oplal te bila la yilike. ¹⁸ .-Ja ta swenta te lok' staik te Jesus te ants-winiketike, melel yayojikistojola te beluk señailetik la spase. ¹⁹ .-Jich te fariseoetik kaj yalbey sbaik, "ilawilik, mayuk bi ya stak' jpastikis; ilawilik, spisil te lume bajt'ikix ta stojol te Jesus". ²⁰ .-Ay griegoetik te koemik ta yich'el ta muk' Dios ta yorail k'in. ²¹ .-Te griegoetike ba sk'oponik te Felipe, te Felipe ja smulal te Besaida te ay ta sk'inal te Galilea, jich la sjok'ibeyik: "Talik, ya k'antik kiltik te Jesus". ²² .-Jich te Felipe ba yalbey te Andres; Jich bajt'ik xchebalik, ba yalbeyik te Jesus. ²³ .-La yal te Jesus: "k'otix yorail te ya yich' ich'el ta muk' te snich'an te winik. ²⁴ .-Jamal ya kalbeyex, te me ma ba ya xch'ay koel te bij sit trigo ta lume sok te me ma ba ya xlaje, ya me sjil stukeli yan te me ya xlaje ya me yak' bayal sit. ²⁵ .-Te mach'a ja xan ya sk'an te skuxinele ya me xch'ay te xkuxlejale ; yan te mach'a ma xkuxin te bit'il ay te balumilale ya me staj xkuxinel sbajt'el k'inal. ²⁶ .-Teme ay mach'a ya skan ya yak' sba ta abat kuun, aka me stsaklinon bael, sok te banti ayonoke, le me ayuka te jkabate. Teme ay mach'a ya yak' sba ta abatinel kuun, ya me yich ich'el ta muk' yu'un te jtate. ²⁷ .-Ta ora to bayal ayonta mel-ot'an: ¿Beluk ya stak' kal yu'un? ¿Jtat, koltayawon ta ora to, xionbal? Jauk me to ja talemon yu'un. ²⁸ .-Jtat, aka me ta ich'el ta muk' te abiile". Ay mach'a k'opojtel ta chulchan sok jich la yal, "La kak'atix ta ich'el ta muk' sok ya me kak'at xan ta ich'el ta muk' ". ²⁹ .-Te mach'atik le ayika te la yaiyik stojol te k'ope la chawul. Sok ay mach'a la yalik: "Ja ch'ul abat te k'opnot yu'une". ³⁰ .-La yal te Jesus, "Ma jookon ta jwenta te tal te k'ope, ja ta a wentaik te k'opoje. ³¹ .-La staix yorail te ya x-och ta ich'el ta k'op te mach'atik ayik ta balumilale; la staix yorail te ya yich' lok'esel te ajwalil yu'un te balumilale. ³² .-Te k'alal ya kich' jachel tel moel ta balumilal, ya me kik' tel ta stojol spisil ants-winiketik". ³³ .-Ja la yal yu'un te ya yak' ta nael te bi lajelil ya yaiy. ³⁴ .-Jich la yalik te ants-winiketike, "kaiyojtik stojol te bit'il ya yal te mantalile te sbajt'el k'inal kuxul te Cristo. ¿Bistuk te jich ya awal, te snich'an te winik. Ya me sk'an te ya yich' jachel tel moele? ¿mach'a te snich'an te winik?" ³⁵ .-Te Jesus jich la yalbeiy yaiyik, "Ma ba jalix ka'al te le ay ta atojolik te sakil k'inale. Ja yu'un beenanik-me te jayeb xan k'aal ja wich'ojik te sakil k'inale, swenta yu'un ma ba chamuk nax ya a wayik te k'alal ya stal te ik'inale. Te mach'a ya xbeen ta ik'inal na sna te bay ya sbajt'. ³⁶ .-Te bit'il ayex to ta bay te sakil k'inal, ch'uunaik me yu'un jich yal-snich'an ya xk'oex te sakil k'inale". k'alal laj yot'an ta k'op te Jesus bajt' snak' sba lok'el. ³⁷ .-Manchuk bayal ta chajp seña-iletik la spas te Jesus ta stojolik, ma ba la xch'unik ³⁸ .-Swenta yu'un jich ya xkot ta pasel te bek yaloj te alwanej Isaias, te jich la yal, "KAWAL, ¿MACH'A XCH'UUNEJIX TE BEK YA YOJISTOJOL TA TOJOLTIKE? ¿SOK MACH'A AK'BOTIX YIL YUEL TE KAWALTIKE?". ³⁹ .-Ja ta swenta te ma juyunik xch'uunel, melel te Isaias yich nix la yal jilel, ⁴⁰ .-"LA SK'ATP'UN TA MASIT, SOK LA YAK' TULANAJUK YOT'ANIK; TE JICHUKE YA STAK' YILIK SOK TE SITIKE SOK YA SK'OT TA YOT'ANIK TE JICHUKE, LA SUJT'ESIK YOT'ANIKSOK TE DIOS LA SIAMANTESBEY XCHAMELIK TE JICHUKE". ⁴¹ .-Jich la yal te Jesus te Isaias yu'un yilojbey yutsilal te Jesus sok janix te la xcholbey sk'oplale. ⁴² .-Ay bayal ajwaliletik te la xch'uunik te Jesus; Jauk meto mala sk'an yal sbaik skaj te la xi'ik te fariseoetike, ja swenta yu'un te manchuk ya yich'ik la lok'eseltel ta bay sinagoga. ⁴³ .-Ja la sk'anik xan te ya yach'ik ich'el ta muk' yu'un te ants-winiketike, ja ma la smulanik te yakuk yich'ik lektesbel sk'oplalik yu'un te Dios. ⁴⁴ .-Te Jesus tulan k'opoj jich la yal,"Te mach'a ya xch'uunone, ma jtukeluk nax ya xch'uunon, ja ya xch'uun-uk te mach'a la stikunon te le, ⁴⁵ .-Sok te mach'a ya yilone, ja ya yil-uk te mach'a la stikunontele ". ⁴⁶ .-Te joone jich talon te bit'il te sakil k'inal yu'un te balumilale, swenta yu'un spisil te mach'a ya xch'uunon ma x-ain ta ik'inal. ⁴⁷ .-Te me ay mach'a ya yaiybon stojol te k'ope jauk me to ma ya sch'uun spasel, ma jookon ya likbey smul; Melel ma jauk talemon yu'un te ya likbey smul ants-winiketike, ja ta lon yu'un te ya koltey te mach'atik ayik ta balumilale. ⁴⁸ .-Teme ay mach'a te ma sk'anone sok te me ma yich'bon te k'ope, ay me mach'a ya yich likbel smul yu'un: Ja te k'op te bek kaloje ja me ya yich' likbey smul yu'un ta slajibal k'aal. ⁴⁹ .-Melel ma jtukeluk nax te k'opojone, ja te jtat te la stikumontel koele, te mach'a la yak'bon te mantaliletike sok te bek ya sk'an kal sok te bit'il ya sk'an sk'opojone. ⁵⁰ .-Sok jnaoj te mantaliletike ja kuxinel sbajt'el k'inal; Jich yu'un te bek ya kale janix jich te bit'il la yalobontel te jtate jich ya kal".