¹ Ta ora to, ay jtul winik te ay ta chamel te Lázaro sbiile. Te ay to Betania, te bay ch'in slumal te María sok te Marta te xwixe. ² Te María, ja te la smalbey ta yakan te kajwaltik te beluk x-uk'etnax bujts' (mirra) sok te la stakintesbey ta stsotsil sjole, ja sbaokil te Lázaro te ay ta chamele. ³ Ta xcha tulul te wixiletike la stikun beyik alel te Jesús: "Kajwal, ilawil, te mach'a ja' k'anoj ta awot'ane ay ta chamel." ⁴ K'alal la yaiy stojol te Jesuse, la yal: "Ja' te chamel to ma swenta-uk lajel, swenta yu'un te ya yich' ilel yust'ilal te Diose, jich ya yich' ich'el ta muk' te snich'an te Diose. ⁵ Te Jesús k'ux ta yot'an te Marta sok te xwixe sok te Lázaroe. ⁶ Jich yu'un te k'alal la yaiy stojol te ay ta chamel te Lázaroe, jil xan che k'aal te Jesús te banti oye. ⁷ Ta patil, la yalbey te nopojeletik yu'une, "kunik ta Judea ta yan buelta." ⁸ Te nopojeletik la sutik, "Rabí (maestro), ta ora to yak slebelat te Judioetik te ya ch'ojat ta ch'ene, ¿bistuk te ya ok'an xbaat le yan buelta?" ⁹ Te Jesús la sut: ¿yu'unbal ma' lajcheyebuk ora yich'oj te jun k'ale? Teme ay mach'a ya xbe-en ta k'aleltik, ma xk'och'in yokan, melel ya yil te sakil k'inal yu'un te balumilale. ¹⁰ jaukmeto, te mach'a ya xbe-en ta ajk'ubale, ya xk'-och'in yakan stukel, melel ma sakuben k'inal ta stojol. ¹¹ Jich la xchol to, sok ta patil la yalbey yayik: "Te joytik Lázaro wayalix, jaukmeto ya xbo-on yu'un ya jti jajch'el ." ¹² Te nopojeletik la yalik ta stojol, "kajwal teme wayalixe, yu'un ya xlekub. ¹³ In te jich la yalbey sk'oplal te Jesuse yu'un lajemixa-a, jaukmeto la sk'uyik te yu'un och swayele. ¹⁴ Jich te Jesús jamal la yalbey yaiyik, "Te Lázaroe lajemix. ¹⁵ Binax jkot'an yu'un, te lek ayatike te mayukon lea jich me ya och'uunik. Kunik ta yilel." ¹⁶ Tomás, te ya yalbeyik la olal (Dídimo), la yalbey te joy tay nopojel, "kuniku-uk te jootike yu'un m pajal ya xlajotik sok te Jesuse." ¹⁷ Te k'alal tal te Jesuse, xchanebalix k'aal smuk'el te Lazaroe. ¹⁸ Te Betania nopol ay ta Jerusalén, jo'eb slajunwinik xanix ta kum snajt'il. ¹⁹ Tsobol te Judioetik talik ta smuk' tesbel k'inal yaiy te Marta sok te María yu'un te laj te sbankile. ²⁰ K'alal la yaiy stojol te Marta te tal te Jesús lok'beel ta stael; jauk te María nakal jilel ta snaj. ²¹ Te Marta la yalbey te Jesús, "Kajwal, te leuk ayot atoe, ma' laj te bankil jichuke. ²² Jich yu'un ya jna stojol chikan beluk ya ak"anbey te Diose, ya yak' bat." ²³ Albot yu'un te Jesús, "Te abankile ya xcha kuxtel." ²⁴ Te Martae la sut, '"Ya jna' te ya xcha kuxtel te k ála ya sta yorail te cha kuxel ta slajibal k áal. ²⁵ Te Jesús la yalbey, " jo'on te cha kuxel sok te kuxinel; te mach'a ya xch'unone, manchuk me lajem ya xkuxin; ²⁶ chikan machá te kuxul sok te ya xch'uunone mayuk bin ora ya xlaj. ¿Ya bal ach'un to?" ²⁷ Jich la sutbey, "yak kajwal, ya jch'un te jaat te Cristoe, te snich'an te diose, te ya xtal ta balumilale." ²⁸ Te k'alal la yal to, ba yik'tel ta muken te xwix María la yalbey: "Te maestroe le ay to yak me yik'belat. ²⁹ K'alal la yaiy stojol to, jach' ta ora jich ba yil. ³⁰ Te jesús mato be k'oem ta bay ch'in slumalik le to aya te banti taot yu'un te Martae. ³¹ Jich te Judioetik te ay ta snae te yakik yak'bel smuk'ul yot'an la yilik te jach tel lok'el te María, la snuj tsik tel; yu'un la skuyik te ya xbat ta ak'el ta bay te mukenale. ³² Te María k'ot te ba ay te Jesús la yil la skejan sba ta stojol sok la yalbey: " kajwal, te leuk ayata to-e, ma' laj te bankil jichuke." ³³ Te Jesús la yil te yak ta ok'ele, sok te Judio-etike joinbil tel yu'une janix jich yakik ta ok'elu-uk, chajp'nax la yila-a ta Espiritu sok la ya-an yot'an yu'un. ³⁴ Jich la yal: "¿Banti la awak'ik? la yalbeyik "Kajwal la sok ilawil." ³⁵ Te Jesuse ok. ³⁶ Jich yu'un te Judio-etike la yalik: iilawilik abyal sk'ano ta yot'an te Lázaro-e." ³⁷ Jaukmeto ay cha-ox tul la yalik: ¿Me jauk in winik to te la sjambey sit tul masite, maba ju-uk yu'un spasel te manchuk laj te winik to-e?" ³⁸ Ta yan buelta te Jesús, bayl la smel yot'an, bajt' te banti ay te mukenale. Jaukmeto yutil ch'en te smukenale makbil st'i ta chen. ³⁹ Te Jesús la yal: "K'ejaik lok'el te ch'ene." Marta, te xwix te Lázaro, te lajemixe, la yalbey te Jesús:"Kajwal, yakix ta k'ael te sbak'etale melel xchanebalix k'aal te slajele." ⁴⁰ Te Jesús la sutbey: "¿Maba jauk la jkalbat teme ya ach'uune, ya ata ilel te yutsilal te Diose? ⁴¹ Jich la sk'ejik bael te ch'ene, te Jesús la stoy mo-el sit jich la yal: "Jtat, ya jkalbat wokol yu'un te la awaybon stojol te jk'ope. ⁴² Jna-o stojol te yananix awayon stojola-e: jaukmeto ta swenta te ants-winik te joineje la kalbey yaiy to, jich me ya xch'uunika-a te ja' la tikunontele. ⁴³ Te k'alal la yal jich to-e, k'opo tulan: "¡Lázaro, la lok'tel!" ⁴⁴ Te aelmele lok'tel, te yakan sok te sk'abe chukul ta xetlikal pak', sok te sit yelawe mukul ta pak'.Te Jesús la yalbey: "Tilaik sok aka bajt'uk." ⁴⁵ Jich yu'un te Judioetik te joinbil yu'un te María la yiliku-uk te beluk la spas te Jesuse, la xch'uuniku-uk; ⁴⁶ jaukmeto ay cha-ox tul bajt'ik te ba-ay te fariseoetik jich la yalbey yaiy spisil te beluk la spas te Jesuse. ⁴⁷ Jich te wolwanej sacerdote-etik sok te fariseo-etik la stsob sbaik ta muk'ul tsoble sok la yalik: ¿Beluk me ya jpastik? Te winik to yak ta spael seyailetik. ⁴⁸ Te me jich ya kijtay tik to spisil me ya xba ch'uunik: te Rommano-etik yame xtal spojbotik, te banti ayotike sok nix ta spamal te jlumaltike. ⁴⁹ Jaukmeto, ay tul winik te le aya-e ja' te Caifás, ja'muk sacerdote te ochem yat'ela-e, jich la ya: "Te jaexe xujt' mayuk bi anaik. ⁵⁰ Te jaexe yu'un bal ma anaik te ja'lek ya xk'ootika-e te tul nax winik ya xlaj ta swenta te jlumaltike ja' wokol teme ja'laj spisil te jlumaltike." ⁵¹ Ja'into te beluk la yale ma jichu-uk nax lok'tel ta yot'an; ja' yu'un te ochem yat'el ta muk sacerdote te jawilabí, la xchol te ya xla te Jesús yu'un te slumale. ⁵² Ma jauk noix yu'un te slumale, ta swenta spisil te yal snich'an Dios te pujk'emik te ya yich'ik tsobel och'el ta tsob nax. ⁵³ Jich k'ax tel sk'alel la xchapik te bit'il ya xlaj te Jesuse. ⁵⁴ Mayuk bin ora te Jesús beenxan ta yolilal te Judioetike, la yutey jilel te bay k'inal aye bajt' ta nopol takin jochol k'inal, ta jun ch'in lum te Efraín sbiile. Le jil soka-a te nopojeletik yu'une. ⁵⁵ Nopolix yorail te sk'in pascua yu'un te Judioetik, sok bayal te mach'atik le' sk'inalika-e moik bael ta bay Jerusalén ne-elajik bael mato ayuk-a te k'in yu'un te pascua melel ba yak' sabaik ta utstesel. ⁵⁶ Yakik ta sle-el te Jesuse, sok yakik ta jech sjok'ibel sbaik te k'alal ayik ta sna-a te kajwaltike (templo): "¿Beluk ja nopik te jaexe? ¿Ma bal xtal yil akuyik te k'ine?" ⁵⁷ Te wolwanej sacerdote-etik sok te fariseo-etik la yalik mantal teme ay mach'a ya yalik yu'un jich ya xba stsakiktel.