¹ te k'alal jich la yalik te jo'otik ya xbootik ta Italia. Ja ya yak'ik te Pablo sok chaoxtul chukeletik te ja' kanantebil yu'un te wolwanej te ja' sbiil Julio, te ja kananetik yu'un Augusta. ² Te jo'otike mo-otik ta barco k'alalto ta Adramitena, te k'alal nopol ya xlok'ixtela ta spisil te ja' yu'un Asia. Jich ochotik ta mar. Aristarco te talem ta Tesalonica ta Macedonia la Sjoinotikbael. ³ Ta yan k'aal ko-otik ta barco ta banti muk'ul pam lum yu'un Sidon, banti te Julio te la xk'uxtey te Pablo sok la yak'bey te sjotak yu'un ya x-ak'bot kanantayel. ⁴ Te jich le-a botik ta mar jich k'axotik ta pam lum yu'un Chipre, nopol ta pam lum te juybil ta ja', yu'un te ik' la skontroinotik. ⁵ Te k'alal yakotik ta kaxelbe-el k'un k'un ta barco te banti ja' te nopol ay ta Cilicia sok Panfila, k'o-otik ta Mira, ja pam lum yu'un te Licia. ⁶ Te muk'ul wolwanej yu'un te kananetik la sta jun barco ta Alejandria te ya xbajt' ta Italia. Ja' ya yak'otikbael le-a. ⁷ Te k'alal K'unax K'axotikbael ta barco bayal ka'al jich wokol k'otik ta nopol Gnido, te ik'e ma la yak'botik jt'untikbe-el te be: jich bo-otik ta banti mejch'te kanantebil te Creta, ta mejch' yu'un Salmon. ⁸ Te jo'otik k'axotikbe-el ta mejch' ta wokoltik, ja to te k'otik ta pam lum te ja sbiil Buenos Puertos te nopol ay ta banti muk'ul pam lum yu'un Lasea. ⁹ Te jo'otike bayal k'a-al la jkich'tik, sok te ska'lel te skomel we-elil yu'un te Judioetik k'axika-a, jich ma stak' xbotik ta barco. Jich komotik te Pablo. ¹⁰ Jich albotik: "winiketik, ya jkil te jo'one te banti nojpotik te ya xbotik bayal ya xwoklajotik sok ya xch'ayotik, ma jauk nax te jkijk'atstik sok te barco, sok nix te jkuxineltik". ¹¹ Jauk meto te wolwanej yu'un te kananetik la yich' ta muk' te mach'a yak ta stijel te barco sok te yajwal, te spisil te beluk yak k'oel ta pasel la yal te Pablo. ¹² ta skaj te banti ya x-ainik te barco ma lekuk ya xk'ax le-a te k'alal sk'alel sik. Bayal la yalik jich te mach'atik ayik ta barco te yakuk xlok'ikbe-el, te yakuk stak' te xk'otik ta banti muk'ul pam lum yu'un Fenice, yu'un le-uk ya xk'axa te yorail sik. Te Fenice, ja te banti ya stak' xk'otik te barco te ay ya Creta, te le ay bela te banti slok'jib smalel k'a-al. ¹³ Te k'alal jach'tel te ik' te banti sakubtel te k'inal k'unax jach'tel, te mach'atik ayik ta barco la snopik te ay yu'unik te beluk ya xtu-un. Jich la stuyik mo-el jich bajtik' ta Creta, nopol ta ts'e-el. ¹⁴ Jich k'ax jun cheuk k'a-al tal ik' sok ja-al te ja sbiil ik' yu'un slajib slok'jib k'a-al, jach' ta tael ta jtojoltik te ya xtal k'alalto ta pam lum, ¹⁵ Te k'alal la yich' makel te barco ma stak' te tojnax xbo-otik, la k'aktik te yik'otikbe-el jich botik ik'el. ¹⁶ Jich bo-otik ik'el ta spisil te banti kanantebil yu'unik te tsail pam lum te ja sbiil Cauda; wokoltiknax ju ku'untik te kajtijib te pasbil ta te te ya skoltayotik ta ch'ayel ta ja. ¹⁷ Te k'alal moikbel, la stu'untesik ch'ajanetik te ya xchukika te smak'il sjol te barcoe. Ja ya xi-ik te me ya xilotik ta banti yawil takin lum ta Sirte, jich la skoltayik koel te tak'in te alnax jich bo-otik ta ik'el. ¹⁸ K'axemtoxan la yutsinotik te ik' sok te ja-al, jich yu'un ta yan k'a-al te mach'atik ayik ta barco jach xch'ojik koel te beluk xkuchoj. ¹⁹ Ta yoxebal k'a-al te mach'atik ayik ta barco la xch'ojik mo-el ta yak'lal te at'jibaliletik yu'un te barco janax la stu-untesik te sk'abik. ²⁰ K'alal te k'a-ale sok te ek'etik ma xtilik ta stojolik bayal k'a-al, jich te tulan ik' sok ja-al yato xul ta jtojoltik, maba jnopotikix te jo-otik yato xkolotik. ²¹ Te k'alal mayukix swe-elika. Te pabloe la stejk'ansba ta yolil te mach'atik ayik ta barco jich la yal:"winiketik, te ja-atike ya skán te lajuk awayonik stojol, te manchuk lok'otiktel ta banti Creta, jich ma ataik te uts'inel sok te ch'ayel. ²² Jauk meto ya jkalbatik te ayuk awipik, yu'un ma xch'ay ni tuluk te mach'a kuxilik awolilik, janax ya xch'ay te barco ²³ Yu'un te k'alal och te ajk'ubal tul ch'ul abat yu'un te Diose te ja yu'unonix, sok te jkich'oj ta muk', te ch'ul abat tejk'aj ta jtojol. ²⁴ Jich la yal: ''ma xiwat, Pablo. Te ja-ate ya me xba-at ta stojol te Cesar, sok ilawil, te Diose ta xk'uxul yot'an, ja yak'ojbotik ta pisiltik te mach'atik sjoinejat ta barco. ²⁵ Jauk meto, winiketik, ak'a wipik, yu'un te jo'on ja jch'une te Dios, ja jich ya spastaj te bit'il albilon. ²⁶ Yu'un te jo'otike ya sk'an te xk'otikk ta jun pam lum. ²⁷ Te k'alal jul te chan lajuneb (14) ajk'ubal, te k'alal yakotik ta ik'elbe-el ta banti mar Adriátrico, nopol staix olil ajk'ubal te mach'atik ayik ta barco la snopik te ayik ta nopol jun pam lum. ²⁸ Jaik la yilik ta lek sok la sbisik tab (20) te snajt'il k'ax jun chebuk ora la xcha yilik ta yan buelta la sbisik jolajuneb (15) te snajt'il. ²⁹ Jaik yakalik ta xiwel yu'un teme la jlokbatik ta ch'enetik, jich la sk'oesik chaneb alal tak'inetik ta k'alalto ta yajk'lal te barco la sk'oponik Dios yu'un te yakuk sakub ora te k'inal ³⁰ Te mach'atik ayik ta barco yakalik sle-el yakuk stak' yijteyik te barco jich koiktel ta tsail barkoetik ta banti mar, ja ya sk'anik te yakuk stak'xch'ojik te aliknax te tak'inetik k'alal to ta yajk'lal. ³¹ Te pabloe la yalbey te wolwanej yu'un te kananetik sok te kananetik: " Te winiketikto yakuk xilik ta barco, te ja-atik ma stak' xkolatik''. ³² Jauk meto ta kananetik la sbojik te ch'ajanetik yu'un te tsail barkoetik jich jach' ta ba-el. ³³ Te k'alal yak ta sakubeltel te k'inal, te Pablo la yaltilebey te yakuk xwe-ik. Jich la yal: ''Jaito ja xchan lajunebal k'a-al te yakatik smaliel sok te ma xweatik; te ja-atik mayuk bi awayojik. ³⁴ Jich ya jk'anbatik te yakuk ja tsakik ja we-elik, ja yu'un te ya stak' xkuxinatika-a. Jich yu'un ni tuluk ya xch'ay ko-el stsotsil ja jolik''. ³⁵ Te k'alal la yal jich to, la tsak te kaxlan waj la yalbey wokol te Diose ta sit te yantik. Jich la xet' te kaxlan waj jach ta swe-el. ³⁶ Jich, spisilik la yich'ik yip yot'anik sok la tsakik swe-elik. ³⁷ Te jo'otik ja waklajuneb xchanlajun winik (276) te ayotik ta barko. ³⁸ Te k'alal nojix xch'utika, la ts'ujtesbeyix tebuk te yijk'ats te barko te k'alal la xch'ojik ko-el te trigoe. ³⁹ Te k'alal sakub k'inal, ma snabesbaik te lume, jauk meto la yilik sti ja' sok muk' nax, la ya-anik te me ya stak' yik'be-el le-a te barcoe. ⁴⁰ Jich la sbojik te ch'ajanetik la yijteyik ta yutil mar. janix jich la stilik te ch'ajanetik sok te stijibal te barkoe sok la stilik mo-el te pak' ta ik'; jich bajtik' ta ti ja'. ⁴¹ jauk meto k'otik te banti ay ch'eb te bayal yip jae, jich kojt'aj te barkoe. sok kajtsaj te sni te barko le jila ma la stak' stijsba, jauk meto jach' ta xet'elbel ta skaj yu'un te ya xlokot te yip te ja' ⁴² Te beluk xchapoj te kananetik ja te ya smilik te mach'atik chukbilike yu'un jich ni tuluk ya stak' yaybel nuxel sok ya xlok' ta anel ⁴³ Jaukme meto te wolwanej yu'un te kananetik ya sk'an ya skoltay te Pablo, jich la skom te beluk snopoj ya spas; jich la yalbey mantal te mach'atik ya xuik yu'un nuxel te xwilik ko-el ta ne-el ta banti sti-il barko jich ya xkotik ta lum. ⁴⁴ Jich te winiketik te jilik ya st'unikbe-el, cha-oxtul ta ch'ujte sok cha-oxtul ta yantik nax te beluk ay ta barco. Jich k'ot ta pasel te spisilik lek k'otik ta lum.