¹ Wa pogtu tamakxtumit xla xkatxkin Israel tamakxtumikgolh nak Silo. Wa tikaxtlawkgolh chiki xla lhakgat xla tamakxtumit anta cho agchipkgolh tiyat nak xlakatinkan. ² Xwiku akgtujun xlitalakgapasni nak xlakgstipan tachixkuitat xla Israel wanti ni axkamagpitzinkan xtatainkan. ³ Josué wanilh xtachixkuitat Israel: " ¿A nantla nakgalhkgalhiyatit nalitnuyatit nak tiyat tu WA PUCHINA, WA XDIOS kan ti xalakpulna , wantu ka maxkin?'' ⁴ Kalaksaktit kgalhtutu lakchixkuin la akgatnu xlitalakgapasni, cho kit nak kamalkgachay. Wa nataxtukgoy cho liwna na ukxilhkgoy tiyat xha xpekgextu cho xalkgalhju. Wa natsojkgoy pogtu tu nakiukxilhkgoy tu xtatainkan cho alistalna nakilagtaspitpalkgoy. ⁵ Wa xlakán pulaktujún na mapaptzikgoy. Judá anta natamkgaxtakga nak xpulataman nak xpakgalhjú, cho xchik José anta natamkgaxtakga nak xpulataman nak xa xpekgextu. ⁶ Wixinin nalagtsojkiyatit pulataman, pulaktujun natlawayatit cho unu nakilitniyatit talagtzojkin. Akit nak makan liputsan nak xlakatin ki PUCHINA kan. ⁷ Wa levitas nitu kgalhekgoy pagtsu nak milagstipankan, am wa xtatainkan, wa xwen xla xpalkachuwina, xla PUCHINA. Gad, Rubén cho itat xlitalakgapasni Manasés makgamaglhtinkgolha xlitatainkan, tlakg pakganacha nak Jordán. Wa uyma xtatain Moisés, kskujni PUCHINA, kamxkilh". ⁸ Wancho lakchixkuin taykgolh cho ankgolh. Josué kalimapagsil wanti tikilagtsogkinkgolh xla tiyat, kawnilh: "Kapintit nak xpekegxtu cho nak xalkgajú tiyat cho katsojtit akgtúm talagtsojkin, cho nakilagtampalyatit. Kit nak makan liputsan mimpalkatakan uynu nak xlakatin PUCHINA nak Silo. ⁹ Wa lakchixkuin ankgolh cho tlawankgolh xa xpekgextu cho xalkgajú tiyat cho tsojkgolh akgtúm talagtsojkin nak akgtum takgasmilh xla xkatxkinkan, pulakgtujun tlawakgolh. Kalagputlhkgatiltit kachikinin la akgatnu tapapitsin. Wancho xlakan tilagtaspitpalkgolh Josué, anta ni makxtum xwilhkgolh nak Silo. ¹⁰ Wancho Josué makalh liputsan xpalkatakan, nak Silo nak xlakatin PUCHINA. Anta cho Josué tikamagpitsinilh tiyat xtachixkuwitat Israel, chatunu kamxkika pakgtsu tiyat. ¹¹ Wa xtiyat xlitalakgapasni Benjamin ti kamaxkika akgatnu xlitalilalkgapsni. Wa xpultamankan xlax tiyatkan tu xkaliyawkanit anta xtatakgsa nak xlakgstipankan xkilhtsukutkan Judá cho xkilhtsukutkan José. ¹² Anta nak xkilhpan xpekgextu, wa xtakilhpastuka anta ninta tzukuy Jordán, wa xtakilhpastukat xtawkay nak xkilhtun nak xpekgextu Jericó, cho awan tawkalh nak sipi anta ninta tzankgay chichini. Anta cho kichalh nak xakaskakni tiyat xla Bet-avén. ¹³ Wa xtakilhpastukat xtitaxtuy xlilhman xpakgalhjú, anta ninta kilkaplhnit Betel. Wancho xtakilhpastukat taktatilhalh ninta wi Atarot-Adar, anta titaxtulh nak kakiwitna ninta wi xpakgalhjú Bet-Horón. ¹⁴ Wancho xtakilhpastukat lakatunung titaxtulh: nak xpaxtun ninta tsankgay chichiní takgalhjulh nak xpakgalhjú, titum lagchalh nak sipi nak xlakatin Bet-Horón. Wa uyma takilhpastukat kikgalhsputli nak Quiriat-Baal, akgtum kachikin wantu xlitay xwan xlitalakgapasní Judá. Anta sputli xtakilhpastukat, nak xkilhpan ninta tzankgay chichiní. ¹⁵ Nak xkilhpan xpakgalhjú, lu anta kitsukulh nak xkilhtin Quirit-jearim. wa xtakilhpstukat anta ama nak Efrón, anta ninta xwi tlanka tapuwaxni xla chuchut xla Neftoa. ¹⁶ Wa xkilpastukat taktalh anta ninta xwi xkilhpan, wantu xwi xalagpatu nak xakaxtum xla Ben-Hinom, wantu tlag makgat la nak xpegextu xakaxtum xla Refaim. Wancho takgalhjul nak xakaxtum Hinom, nak xpakgalhjú xa kalkapan jebuseos, cho taktatilalh nak En-Rogel. ¹⁷ Tawkalh nak xpegextu, kichalh nak En-Semes, cho anta kilhtzukupa cho alh nak Geliot, wancho xtalkgaxtojwi anta ninta laktawkakan nak xla Adumín. Wancho takgalhjupalcha anta ninta wi chiwix xla Bohán, xkgawsa Rubén. ¹⁸ Titaxtulh anta nak xpekgextu nak xha wastat xla Bet-arabá cho taktacha nak Arabá. ¹⁹ Wa xtakilhpastukat titaxtulh nak xha wastat xpekgextu xla Bet-hogla. wa xtakilhpastukat kgalhsputli nak xpekgextu xkilhtsukut pupuna xha skgokgola, anta nak xpakgalhju Jordán. Wa uyma xtakilhpastukni wa nak xpakgalhjú. ²⁰ Wa Jordán makilhstukli nak xlipulhni chichiní .Wa uyma xtatai wa, xlitalakgapasni Benjamin, cho kamaxkika chatunu xlitalkgapsni, xwi takilhpastukni cho takilhpastukni, xli kilhpalhman. ²¹ Lawku cho xkachikin xwan xlitalakgapasni Benjamín, chuna nantla xlitalilakgapasni xwan: Jericó, Bet Hogla, Emec Casis, ²² Bet Arabá, Zemaraim, Betel, ²³ Avim, Pará, Ofra, ²⁴ Quefar Haamoni, Ofni cho Geba. Agkutuy kachikin xwen, xawa xwan laktsu xkachikin. ²⁵ Nax wilkgolh xkaxkin Gabaón, Ramá, Beerot, ²⁶ Mizpa, Cafira, Mozah, ²⁷ Requem, Irpeel, Tarala, ²⁸ Zela, Elef, Jebús (watiya Jerusalén), Guibeá cho Quiriat. Xwilkgolh agkutati kachikin, cho xtapaks laktsu xkachikin. Wa uyma xtatain xwan Benjamín wa xla xlitatalkgapsni.