¹ Lata titaxtulh uma, puxku Asuero walilh Amán xkgawasa Hamedata wa Agagueo, chu mapuxkuwilh xlakatinkan putum mapakhsinanin tiku xtawilakgolh. putum lakskujnin tiku xtawilakgolh nak xmalakcha ² puxku xtatsokgostonikgoy chu xtakilhputanikgoy Aman, la puxku xmapakgsinanit nalhawakgoy. Chu wa Mardoqueo ni xtakilhputaniy chu ni xtatsokgostani. ³ Chuna cho xlakskujnin puxku tiku xtawilanalh nak xmalakcha puxku wanikgilh Mardoqueo: ¿Wan chu wix ni makgantaxtiya xlimapakgsin puxku? ⁴ xlakan chuna xwanikgoy chali chali, chu xla nixlhaway tuku xlimapakgsinankanit. Chuna chu xlakan tachiwinankgolh Amán xlakata uma Mardoqueo xpalakata naliakxilhkgoy parxla chuna la ama natamakgxtakga, xpalakata Mardoqueo xkawaninit pi xla judio. ⁵ Lata Amán akxilhi pi Mordoqueo ni xtakilhputaniy chu ni xtatsokgostani, Amán lusitsilh. ⁶ Xla lakapastaklhi watiya namakgni Mardoqueo, wa xpalakata kskujni puxku xmakatsininit niku xpulataman Mardoqueo. Amán xkamasputunkgoy amakgolh judios, xpulataman Mardoqueo, wa ama nikuma xtapakgsini puxku Asuero. ⁷ Nak xapulana papa (talilakgapasa Nisán) xli akgkutiy xlimapakgsin puxku Asuero, xlakan makgosokgolh liakxilhnin, wa uma makgosokgolh liakxilhnin Amán, lhan talakpuwan xpalakata chali chali chu papa, lakgchalh liakxilhnin xli akgkutiy papa (papa xla Adar) ⁸ Chuna cho Amán wanilh puxku Asuero: wi akgtum pulataman nikuma tapakgsiniyan xlikalanka min mapakgsin. Xlimapakgsinankgan nixtachuna la amakgapitsin pulataman, chu ni kgaxmatkgoy xlimapakgsin puxku, wa uma xpalakata ni lhan nakamakgxtajkgan. ⁹ Par chuna lakgatiy puxku, kamastalh talakaskin kakamakgnika, chu akit nak xokgoy ajkgaw mil talentos xa plata nak xmakankan amakgolh tiku lakgayakgolh namakikgoyy xoro puxku. ¹⁰ Chuna chu xla tiyal xtamakganu nikuma xkgalhi xtamakata chu maxkilh Amán xkgawasa Hamedata wa Agagueo, tiku nixkatalalin judio. ¹¹ Puxku wanilh Amán: Min tumin taspitniparayan chu min pulataman, Wix lhan nalaklhawaya lata wix lakaskina. ¹² Chuna cho xlakgtsokgnanin puxku kamastojkga xli ajkgututu kilhtamaku xapulana papa, chu tsojka akgtum talajkaxlan nikuma xwan putum lata Aman xkamapakgsinit mapakgsinanin nak xkachikinin puxku, amakgolh tiku xmapakgsinankgoy nak jakachikinin, putum pulataman nak xtachiwinankan chu nak xtatsokgnaninkan. Tsojka nak xtukuni puxku Asuero chu litamakatalh. ¹³ Limapakgsinin kamaxkika putum pulatam nak xlimapakgsin puxku, xpalakata nakamasputukan judios, putum maski laktsujku chu lajkgolon, laktsukaman chu lakpuskatin, nak akgtum kilhtamaku, ama ajkgututu kilhtamaku xla ajkgaw papa (ama papa xla Adar) chu xwatakamakgamakglhtikan tuku xlakan. ¹⁴ Akgtum copia xla xtalajkaxlan mapakgsin lhawaka nak kachikin. Nak kachikinin putum latamanin katsikgolh pi natakaxkgoy xpalakata ama kilhtamaku. ¹⁵ Putum makatsinanin tokgoson taxtukgolh xpalakata namakatsininankgoy xlimapakgsin puxku. Mapakgsin na mastaka nak Susa. Puxku chu Amán wakgolh xkuchukan, wata xkachikin Susa nitanks xkatsikgoy tuku xtitaxtuma.