¹ Wüx landoj marangüw meawan ag ayaj, wüx lapateay ajcüy ag a teat natang nenajiüt Asuero, tam wüx omeats nej Vasti at leaw tarang nej wüx. Quiaj nej tam wüx omeats ag a poch andeac wüx leaw aliüc mien apmarang wüx ombas nej. ² Quiaj ag a monench leaw arangüw minajiüt teat natang nenajiüt tasajüw nej: "mayambüw netsayay ombasüw monüx müjchiw nej. ³ Jondot ag a teat natang nenajiüt mandiüm mayac noic noic natang tiül meawan cambaj, atquiaj macanchich meawan netsayay ombas monüx mayac nieng acül mintajüw monajiüt naw tiül Susa. Iich majaw nejiw Hegai, ag nerang mi najiüt, nieng ajlüy wüx majaw monüx at müüch nejiw najmboc angan mayacüw wüx ombasüw nejiw. ⁴ Ndoj ag apmixom wüx ombas nej najneaj mijaw ayaj iich marang natang ingow Vasti." Ag a teat natang nenajiüt najneaj majaw ag nandearac quiaj, ndoj atquiaj tarang. ⁵ Tiül ag a cambaj Susa alqüiaj nop judío minüt nej Mardoqueo micual nej Jair, micual Simei micual Cis, Benjamita nej. ⁶ Nej lamajier nüt ajwan tiül Jerusalén maqüieb alacas nipilan, aquiejpüw alacas monjüy maqüieb Jeconías, natang nenajiüt ocueaj Judá, ag Nabucodonosor, natang nenajiüt ocueaj Babilonia, taquieb nejiw namb marangüw mos. ⁷ Nej tengüial matangüüch Hadasa, ayaj, Ester, micual micoj nej, cos ag a nüx quiaj ngoma jiür mi teat nej at mimüm nej. Ag a nüx quiaj netsayay ombas at najneaj timbas nej. Mardoqueo tatangüüch atnej majier micual nej. ⁸ Wüx ag a andeac teat natang nenajiüt at minawiig nej tajiquicheran, xeyay monüx taquiebaranüw mam andüy tiül ag a netsayay ombas iüm quiero Susa. Meawan ag a monüx quiaj tayacaranoj teowix Hegai. Atmien Ester taquierabmam tiül ag a netsayay ombas iüm nieng acül ag a natang nenajiüt at tayacüch teowix Hegai, nejaw wüx meawan monüx. ⁹ Nej tandiüm xeyay ag a nüx. Quiaj tüüch nej üet nej at tüüch ijmboc angan ombas nej najenmien. Ndoj tüüch nej ayaíwmonbeol nej nawüw tiül ag a netsayay ombas iüm atmien tayac nejiw tiül ag a netsayay iüm ocueaj monüx nej maqüieb mi monbeol nej. ¹⁰ Ester gno naw masaj nejinguin nguiane naw at Jane acualats nej, cos Mardoqueo atquiaj aquiach nej wüx mandeac. ¹¹ Meawan nüt Mardoqueo ajlayay ajüy quiaj teombas ag a netsayay pajchien, quiaj mien tüeng iüm nieng acüliw monüx, atquiaj nej majaw nguineay tengüial mamongoch Ester. ¹² Wüx tatüch nganüy mamongoj nop nop nejlüy teat natang nenajiüt, mayariw marangüw atnej asoiquiw meawan monüx, meawan monüx leaw larriedaranoj netam mapalüchiw noic neat müjdiw matsayay ombasüw nejiw, pinawan neat apmayacüch wüx ombasüw nejiw mi aceite mirra, al pinawan neat apmayacüch najmboc angan at namb teombasüw nejiw. ¹³ Wüx nop nüx mam niüng ajlüy teat natang nenajiüt, leaw nej andiüem matün mayar naw tiül nieng acüliw monüx apmünd, atquiaj majlüy namb andüy tiül ag a netsayay ombas iüm. ¹⁴ Nej tajmel wüx laamb ajmel nüt, ümban arraw tandilil andüy tiül alinoic iüm ocueaj monüx, at teamajiür nej Saazgaz, nerang mi najiüt teat natang nenajiüt, najlüy wüx majaw minajtaj natang nenajiüt, Ester ngome apmandilil mandüy niüng ajlüy teat natang nenajiüt at a ndot taxom majaw najneaj wüx ombas nej ndoj mandiüm mandilil mapaj nej alinomb. ¹⁵ Nganüy wüx tatüch nej Ester mamong (micual Abihail, micoj Mardoqueo, ag ayaj tatangüüch nej atnej majier micual nej) namb niüng ajlüy teat natang nenajiüt, nej ngome tatün nicüajin ag mien lamüch nej Hegai nerang mi najiüt teat natang, ag ayaj najlüy wüx majaw monüx. Nganüy, Ester taxom monajneaj wüx ombas meawan leaw teamajawüw nej. ¹⁶ Ester taquierab mam nieng ajlüy natang nenajiüt Asuero tiül gajpawüw caaw, ag ayaj mi caaw Tebet, amb ayaíw neat tatow arang natang nenajiüt. ¹⁷ Teat natang nenajiüt xeyay tandiüm Ester ngome atnej tandiüm ajcüw al acas monüx at nej taxom monajneaj teombas ag natang nenajiüt, ngome atnej ajcüw al acas monüx, quiaj tayac iquial omal nej, ndoj tüüch nej marang natang nenajiüt ingow Vasti. ¹⁸ Teat natang nenajiüt tarang noic nadam monet müüch meawan mi monrang najiüt nej, "mi nangosnüt Ester", at tajneaj quiriw ag ajmiec tomien tiül nimix mine cambaj. Atmien tajiquich ajneaj omeats teat natang nenajiüt müüch nejiw. ¹⁹ Nganüy, wüx ag a monüx lacanchiejon alinomb, Mardoqueo alchetem teombeay mi iüm teat natang nenajiüt. ²⁰ Ester ngo naw masaj nejingüin Jane acualats nej tingua ngün mi cambaj nej, atnej aquiach nej wüx Mardoqueo. Nej tanaamb tandüüb mam atnej aquiach nej Mardoqueo, atnej tarang wüx aliün maqüieb nej. ²¹ Tiül mien ag a nüt quiaj, Mardoqueo wüxmien alien chetem teombeay mi iüm teat natang nenajiüt, ijpüw mimonrang najiüt teat natang nenajiüt, Bigtán maqüieb Teres, ajcüw ayaj monjier nieng ajmeleran, tajcüyiw at tandiümüw mambiyaw teat natang nenajiüt Asuero. ²² Wüx tangüiay Mardoqueo nguineay tengüial mandeacüw, taamb masaj müm natang nenajiüt Ester, Ester tasaj teat natang nenajiüt wüx minüt Mardoqueo. ²³ Tambüw mayambüw ombas at majawüw sitiül naleaing ndoj tarrondüch oniquiaw acá ijpüw monxey quiaj cos naleaing atquiaj apiengüw. Quiaj mien nieng ajlüy teat natang nenajiüt tayacüw tiül nawiig nasoic crónicas meawan leaw tajlüy ag a nüt quiaj.