¹ Ita, ti uleg ket nasirsirib ngem kadagiti dadduma a naunget nga ayup iti daga nga inaramid ni Yahweh a Dios. Kinunana iti babai, "Agpayso kadi a kinuna ti Dios a, 'Saankayo a mangmangan manipud iti aniaman a kayo iti minuyongan?"' ² Kinuna ti babai iti uleg, "Mabalinmi a kanen ti bunga manipud kadagiti kayo iti minuyongan, ³ ngem maipapan iti bunga ti kayo nga adda iti tengnga ti minuyongan, kinuna ti Dios, 'Saanyo a mabalin a kanen daytoy, wenno sagiden, ta no aramidenyo dayta, mataykayo."' ⁴ Kinuna ti uleg iti babai, “Saan, saankayo a matay. ⁵ Ta ammo ti Dios nga iti aldaw a kanenyo daytoy, malukatan dagiti matayo, ket agbalinkayonto a kas iti Dios, nga ammona ti naimbag ken dakes." ⁶ Ket idi nakita ti babai a ti kayo ket nasayaat nga kanen, ken makaay-ayo daytoy iti mata, ken ti kayo ket makapaawis a mangpasirib iti tao, nangala ti babai kadagiti bungana, ket kinnanna daytoy. Ken inikkanna met ti asawana a kaduana, ket kinnanna daytoy. ⁷ Agpada a nalukatan dagiti matada, ken naamirisda a lamo-lamoda. Nangdaitda kadagiti bulbulong ti igos ket nangaramidda iti pangabbongda kadagiti bagbagida. ⁸ Nanggegda ti pannagna ni Yahweh a Dios iti minuyongan iti kalammiisan ti aldaw, isu a naglemmeng ti lalaki ken ti asawana manipud iti presensia ti Dios, kadagiti kakay-kaywan iti minuyongan. ⁹ Immawag ni Yahweh a Dios iti lalaki ket kinunana kenkuana, "Sadino ti ayanmo?" ¹⁰ Kinuna ti lalaki, "Nanggegko nga addaka iti minuyongan, ket nagbutengak, gapu ta lamo-lamoak. Isu't gapuna a naglemmengak." ¹¹ Kinuna ti Dios, "Siasino ti nangibaga kenka a lamo-lamoka? Nanganka kadi manipud iti kayo nga imbilinko a saanmo a mabalin a kanen?" ¹² Kinuna ti lalaki, "Ti babai nga intedmo a makaduak, inikkannak iti bunga manipud iti kayo, ket kinnanko." ¹³ Kinuna ni Yahweh a Dios iti babai, "Ania daytoy nga inaramidmo?" Kinuna ti babai, "Sinulisognak ti uleg, ket nanganak." ¹⁴ Kinuna ni Yahweh a Dios iti uleg, "Gapu ta inaramidmo daytoy, mailunodka kadagiti amin a dingwen ken kadagiti amin a naunget nga ayup iti daga. Aguyaska babaen iti tianmo, ken tapokto ti kanem iti amin nga aldaw ti panagbiagmo. ¹⁵ Mangikabilak iti pagginnuraanyo iti babai, ken iti nagbaetanyo a bukel ken ti bukelna. Sugatennanto ti ulom, ken sugatemto ti mukodna." ¹⁶ Kinunana met iti babai, "Paaduek iti kasta unay ti rigat iti panaganakmo; iti nakaro a rigat, ipasngaymo dagiti annakmo. Ti tarigagaymonto ket para iti asawam, ngem iturayannakanto." ¹⁷ Kinunana kenni Adan, "Gapu ta dimngegka iti timek ti asawam, ken nanganka manipud iti kayo, maipapan iti imbilinko kenka, a kunak, 'Saanka a mabalin a mangan manipud iti daytoy,' mailunod ti daga gapu kenka; mangankanto manipud iti nagrigatam iti amin nga aldaw ti panagbiagmo. ¹⁸ Mangpataudto daytoy kadagiti sisiit ken kalkalunay a mulmula para kenka, ket kanemto dagiti mula iti talon. ¹⁹ Babaen iti ling-et iti rupam, mangankanto iti tinapay aginggana nga agsublika iti daga, ta daytoy ti naggapuam. Gapu ta tapokka, ket agsublikanto met laeng iti tapok." ²⁰ Pinanaganan ti lalaki ti asawana nga Eva gapu ta isuna ti ina dagiti amin nga agbibiag a banbanag. ²¹ Nangaramid ni Yahweh a Dios kadagiti badbado a lalat para kenni Adan ken iti asawana ket kinawesanna ida. ²² Kinuna ni Yahweh a Dios, "Ita, nagbalin a kasla kadatayo ti lalaki, ammona ti naimbag ken dakes. Isu nga ita, masapul a saanen isuna a mapalubusan a mangigaw-at iti imana a mangala manipud iti kayo ti biag, kanenna daytoy, ket agbiag iti agnanayon." ²³ Isu a pinapanaw isuna ni Yahweh a Dios manipud iti minuyongan ti Eden, tapno talonenna ti daga nga isu iti nakaalaanna. ²⁴ Pinapanaw ngarud ti Dios ti lalaki iti minuyongan, ket nangikabil isuna iti kerubim iti daya ti minuyongan ti Eden, ken umap-apoy a kampilan nga agrikrikos, tapno mabantayan ti dalan nga agturong iti kayo ti biag.