¹ Nagdaliasat ni Abraham manipud sadiay a nagturong iti daga ti Negeb iti nagbaetan ti Kades ken Sur. Isuna ket gangganaet nga agnanaed iti Gerar. ² Kastoy ti imbaga ni Abraham maipapan kenni Sara nga asawana, "Isuna ket kabsatko a babai." Isu a nangibaon ni Abimelek nga ari ti Gerar kadagiti soldadona ket innalada ni Sara. ³ Ngem immay ti Dios kenni Abimelek iti rabii babaen iti tagtagainep ket kinunana kenkuana, "Kitaem, kaiyarigam ti natay a tao gapu iti babai nga innalam ta asawa isuna ti maysa a lalaki." ⁴ Ita, saan pay nga immasideg ni Abimelek kenkuana ket kinunana, "Apo, papatayem kadi uray ti nalinteg a nasion? ⁵ Saan kadi nga isuna a mismo ti nangibaga kaniak, 'Isuna ket kabsatko a babai'? Uray isuna a mismo ket kinunana nga 'Isuna ket kabsatko a lalaki.' Naaramidko daytoy a nadalus ti pusok ken awan basol kadagiti imak." ⁶ Kalpasanna, kinuna ti Dios kenkuana iti tagtagainepna. "Wen ammok met nga inaramidmo daytoy a nadalus ti pusom ket inlisika met iti panagbasolmo kaniak. Isu a saanko nga impalubos a sagidem isuna. ⁷ Ngarud, isublim ti asawa ti lalaki, ta maysa isuna a profeta. Ikararagannakanto ket agbiagkanto. Ngem no saanmo nga isubli ti babai, ammoem a sika ken amin a kukuam ket awan duadua a matayto." ⁸ Nasapa a bimmangon ni Abimelek iti agsapa ket inayabanna amin dagiti adipenna. Imbagana amin dagitoy a banag kadakuada ket nakaro ti buteng dagiti lallaki. ⁹ Kalpasanna ket pinaayaban ni Abimelek ni Abraham ket kinunana kenkuana, "Ania daytoy nga inaramidmo kadakami? Kasano a nakabasolak kenka, ta inyegmo kaniak ken iti pagariak ti dakkel a basol? Inaramidmo kaniak ti saan a rumbeng." ¹⁰ Kinuna ni Abimelek kenni Abraham, "Ania ti nangiduron kenka a mangaramid iti daytoy a banag?" ¹¹ Kinuna ni Abraham, "Gapu ta impagarupko, 'Sigurado nga awan ti panagbuteng iti Dios iti daytoy a lugar ket patayendak gapu iti asawak.' ¹² Malaksid iti dayta, pudno a kabsatko isuna, ta anak isuna ti amak ngem saan nga anak ti inak; ket nagbalin isuna nga asawak." ¹³ Idi imbaga ti Dios a panawak ti pagtaengan ti amak tapno agdaliasat manipud iti maysa a lugar nga agturong iti maysa a lugar, kinunak kenkuana, 'Masapul nga ipakitam kaniak ti kinapudnom a kas asawak: Iti tunggal lugar a papananta, kastoy ti ibagam maipapan kaniak, "Isu ket kabsatko a lalaki.'" ¹⁴ Kalpasanna, nangala ni Abimelek iti karnero, kalakian a baka, lalaki ken babai a tagabu ket intedna dagitoy kenni Abraham. Kalpasanna, insublina kenkuana ni Sara nga asawana. ¹⁵ Kinuna ni Abimelek, "Kitaem, adda iti sangngoanam ti dagak. Aggianka iti sadinoman a kayatmo." ¹⁶ Kenni Sara kinunana, "Kitaem, inikkak ti kabsatmo iti sangaribu a pidaso ti pirak. Daytoy ti mangabbong iti aniaman a panaglabsing kenka iti imatang ti amin a kaduam, ken iti sangoanan ti amin, naan-anayka a napalinteg." ¹⁷ Kalpasanna, nagkararag ni Abraham iti Dios ket pinaimbag ti Dios ni Abimelek, ti asawana ken dagiti babbai a tagabuna isu a naaddaanda iti kabaelan nga aganak. ¹⁸ Ta pinagbalin ni Yahweh a baog dagiti babbai iti pagtaengan ni Abimelec, gapu kenni Sara nga asawa ni Abraham.