¹ Ecitati yootjaria ephome! Eri yootjarya nu wootha ni tjithu tjowin'nyiya. Kuta nihuku yaapankaka awanane aaya. ² Maasi ohaavo onyakula wo ekopo ni onyakula wo wattakya erootha, meettelo okhavalo ni ekarowaage tjaya tjituphatuhaka. ³ Ahaavo miyaweettiha ekhavalo awana, ekatana tjo wonieela, mavaka owaarya, owunkumanyiherya athu okhua, eruthu tjuulupale. Khiivo emalelo wo ruthu. Yaale yaawanana ahokwakwathuwela wa tjulu waya. ⁴ Eniirania nlattu miteko tjokhuilo wa nluvi, mwaneene enyanka, nthumiha elapo, nlattu wo luva wawe, anam'mutjini mwaha wo nyanka tjawe. ⁵ "Nkaweha, Mi akinopheela we" ala phimoolumo aPwiya Anakhotto "Kinaahala wuuvunyera esaia eyo winthowa ni kinaahala owoonatjiiha elapo tjoteene, ehaya tja wo mamwene. ⁶ Kinawuuvonyera tjoonanara tjaa ni kinkowuwiiha ni ntanyifu; kinkowupanka wee nthu wa athu oteene owuuweha. ⁷ Ni onkowirania wiira yoole nkela wuuweha naahala wuuthyawa: "Ninive hokwanyuliya. Tipani nkela owunlela?" Kinkomphuanya vai nthu nkela wuumaaliha?" ⁸ Ninive, kireke eiira wee onthuuphuanela woovirikana ni Tebas, yeele etekiye wakhiviru ni muro Nilo, yaarina maatji omuurerya, yaarina maatji mentji toko ekikitjero ni epahari toko muuru? ⁹ Etiopia ni Egito yaari ekuru tja, ekuru tjoohimalela; Pute ni Libia, naathu owaatanana. ¹⁰ Hata tjom'mo, Tebas ahokussiya, yena ahothukeliya, anamwane awe yaahinvakatjeriya m'maparapaarani wo phiro tjoteene; awanani aya yaahopankela mwaavi wa alopwana oreerela, ni alopwana aya oteene yahothukiya nuu nyolo. ¹¹ Hata ni we onkela okhala ohapaliya. Onkomananiha wimpitha ni okela orweela nthiawelo waawananaka awanania. ¹² Elipihero tjoteene tjikela okhala toko miri tjo miiwa: tjakela otathiya, tjinkoomorela mwaano wa yoole nokhuura. ¹³ On'noona, athu ari wariyari waa athiyana: mikhora tjo nlaponi waa tjihothukatjiya wa awanania; mooro ohaapahakatja eyuuma tjinthukeliaya n'yo. ¹⁴ Warike maatji ni winsathi wo wiira wavireliyaka; mwintjere olipiheriya; nkele n'mwaapuni ni n'nyakele essuwaalyu; nthenkatje eforma yo tijolo. ¹⁵ Mooro onkela wuupaha vaavale ni ekatana enkela wuukwanyula vaavale. Yena nkela wuukhura ntoko makettentte oyevatja tjinkhuuraaya tjoteene. Mwintjenranie toko makettentte oyevatja, toko anatjope entji. ¹⁶ We ohowintjenra anakusiyante tjinene wovirikana ni ethontto tjo wiirimu; maasi ankhala toko makettentte oyevatja: ayena anatupha tupha vathi ni phuvavelaka ottayi. ¹⁷ Akhulualen'nyu ari entji wowavikana anatjope ni ahooleli n'nyu anakhotto ari toko nihutte nomakettentte, ankhala wa cirini, wa nihuku noririya. Ntjuwa nakhumaka, anakhuma khuma ni khaavo notjuwela nipuro nikelenlyaaya. ¹⁸ Mwene oAssiria, amakamputji n'nyu anaaruparupa, anawooritin'nyu anaamumula. Apoovo en'nyu ari ovavariaatjela m'mwaakoni ni khaavo nthu opheela waathukumaniha. ¹⁹ Khuuvo ovoniya omakhuatta aya. Makhuatta aya ahokhala otepa. oteene yaale yin'wale ehapari mwaha wa waa ankowoopa ekuphi nlattu wa waa. Tipani thyawale tjonyala tjawe?