¹ Nulumo nonttarusso mwaha wo Ninive. Eliivuru yo woniheriya Naum, n'elcosita. ² Apwiya Muluku tho hatje ni olupatha; Apwiya anaalupatha ni ari oviruwa; Apwiya anawalupatha awananiaaya, ni Ayena anassunka oviruwa waya wa awananiaaya. ³ Apwiya opitja oviruwa ni okuru tjinene. Ayena khankela waakhalela emani awanani aya. Apwiya anapanka ephiro aya mapuro anakuvia wenyeenyatja ni wa anaphuvu, ni mahutte aya nthupi om'mettoni waya. ⁴ Yena n'nomaaliha epahari ni nawum'miha; Yena nawum'miha myoloko tjoteene. Basa ri owotjia atja, hata ni Carmelo; ethuto tjo Libano tjineera tjinyaalaka. ⁵ Myaako tjinathukumela oholo Winyu, ni mwala tjinatothuaa; ethaya enamwenyeenya wa riyari winyu, we khueeli, etuniya ni athu oteene yaale ankhala. ⁶ Tipani n'hala weemela oholo wo mapuro aviruwalen'nyu? Tipani nkela ovilela oviruwa Winyu? Oviruwa winyu onkhala manaka mooro, ni mwala n'yo tjinaapwessakatjiya ni Yena. ⁷ Pwiya phooreera, mapuro owimpitha wo mahuku ossanka; Yena phooreera wa yaale anathyawenla. ⁸ Phimaana, Ayena anawamalamaliha Awananin'nyu, yakwanyulaka wo watjarihela maatji; Ayena anawoomolaniha mpaka mwiipiphini. ⁹ N'nuupuwelani wompheela Pwiya? Yena namalamaliha yoteene yeela; mahuviho khankela okhumenla tho. ¹⁰ Kontha, ayena ankela ovarihatjiya toko mapuro anthukumanihiya mwiiwa; ankela waahaala eviinyu aya; ankela opahakatjiya ni mooro, toko mikhutta tjo wum'ma. ¹¹ Haavo ikumiherale oholowinyu, Ninive, nuupuwela tjera tjithu tjoonanara wa Pwiya, haavo enkhumakhumale mupuwelelo onanara? ¹² Apwiya ahimyale tjo: "Pooti okhala wiira ayena thoolipessa ni owintjiva, anaahala okwanyuliya; apoovo aya khan'hala okhalatho. Maasi we Juda: ni manan'na tjuuhuvihalyaaka, akinoohuvihatho. ¹³ Vano vaa kinaahala okwanyula ankhili ohilika arinaaya athua ale ni wee; kinaakuattula tja etapha tjaya". ¹⁴ Pwiya ahovaha nuulumo mwaha wawaa, Ninive: Khaninkhumenla tho nloko ni ntjina na. Kinaahala waapwessakatja attontto yinsathiye m'manupani wa amuluku en'nyu ohikhala. Kinaahala waathipela mahiye aya, kontha oohiloka". ¹⁵ Onawoona, watjulo mwaako tjiri metto wa yoole nowiiha moolumo oreera, nohimia nrettele! Mpanke essukuhulu tjinyu, Juda, ni waasunke anatiri aa, kontha ntakhali khan'hala wuuweelatho; yena nkela omalamalihiya.