¹ Nluku aahomuupuwela Noe, niinama tjooteene tjaarinaawe nkalawani. Nluku aahokurussa ephyoo, nimaatji yaahantja ovukuwa. ² Muro tjuulupale tjovathi nimikhora tjowiirimu tjaahotthukiya, epula yaahaamussa. ³ Maatji yeera arwaaka. Anavirale mahuku emiya wohanssiini, maatji yaahovukuwa tjinene. ⁴ Ekalawa yaaheemela mweeri wonsaapa, nihuku nonakhumi nasaapa, nmamyaakoni tjo Ararate. ⁵ Maatji yeera avukuwaka npaka mweeri wonakhuumi. Nihuku nowantjera womweeri wonakhuumi, milootho tjomwaako tjaahokhumela. ⁶ Waamalela mahuku arupayini, Noe aahotthukula etjanela yaapankalyaawe ⁷ ni aahon'hiya nakhuku, aarwaa noohokolyaa, npaka maatji wuumalyaaya. ⁸ Vano, aahoruma ekhuntta wiira awehe maatji yakhala wiira yaahomala vathi, ⁹ massi ekhuntta khayoonale nipuro noomorela. Vano, yaahohokoleela wa Noe nkalawani, kontha maatji nanlelo yaanaamirya etthaya. Yena aahotaphula ntatanawe, aahovarenla ni aahowhela npaani mokalawa. ¹⁰ Yena aahanriiha mahuku saapa ni aahorumatho ekhuntta. ¹¹ Ekhuntta yaahokolyaale otjootjilo, ni yaahowa enawapale omalakuni ntaakhuru nikithi. ¹² Noe aahotjuwela wiira maatji ahovukuwa. Yena aahaanriihatho mahuku saapa ni aahorumatho ekhuntta. Ni khihokoleelaletho wa Noe. ¹³ Nihuku nowantjera omweeri woopatjera mwaakha weettaka emiya namotja, maatji yaahomala vathi. Noe aahoweha ota wokalawa ni aahoona wiira maatji yaahomala. ¹⁴ Mweeri wonamiili, mahuku yeettaka siriini nasaapa, etthaya yaahokhala yowuuma. ¹⁵ Nluku aahomwiirela Noe: ¹⁶ Okhume nkalawani, naamwaaraa, asaanaa naasaara asaanaa. ¹⁷ Okumihe enama tjooteene, enuni nitjooeene tjinkhala vathi, wiira tjiyaranatjeke. ¹⁸ Vano, Noe aahokhuma naasaanaawe, amwaarawe naasaara asaanaawe. ¹⁹ Mihuwo tjooteene tjikumi: enuni, niinama tjooteene, phanka asimutjyaawe tjihiyalyaaya ekalawa. ²⁰ Noe aahaateka alteer waaPwiya. Yena aahokussa enama tjooreera ni enuni tjooreera wiira avahe waltaare. ²¹ Apwiya wahaatjivela ni yaahiira wanrimani: Akinaakulelatho otakhaliha etthaya mwaha wapinaatamu, wanookhalaru tjowuupuwela tjootakhala tjeeyareelo, akinaakulelatho okwanhulatja, phanka tjivaralyaaka. ²² Etthaya yiira ekhalaka, waala noohepha, oririya nooviha, eyiita niilimwe, othana noohiyu khun'mala.