¹ Waviralyaaya eyaakha piili, Farao aaholoha nttora nimotja. Yena iira neemelale waattamenla oNilo. ² Wowaakuvyaatja emope saapa tjaahorwaa oNilo, tjoophanela ni tjooneneva, tjaalya nkurukuru muro. ³ Tjikhwaawe saapa, tjahorwaa omuro, tjoohiphwanela ni tjoohineneva. Tjeemelale vamotja niimope tjikhwaaya waattamenla omuro. ⁵ Vano, emope tjowootta tjaahokhuua emope tjowiittivala. Vano, Farao aahovuwa. ⁴ Phaahokoleelaawe orupa ni aaholohatho emaara yonayeeli. ⁶ Wowaakuvyaatja, mitathi saapa tjaahophuwa nri n'motja, tjikumi ni tjooreera. Phaaphuwaayatho mitathi saapa, tjowootta ni tjoopahiya niiphyoo. ⁷ Mitathi tjowootta tjaahomirya mitathi tjikumi. Farao aahovuwa, ni naari nttora. ⁸ Orupossenliya, n'nepaawe waari wookutakuthyaa. Yena aahorumiha wiihaniya anamatjuwelatja ooteene owiigiipitu. Farao aahaattonkelatja nttoranawe, massi khaavo aakhwitirale ontaphulela Farao. ⁹ Vano, nkhulupale aanamakawa mapha aahomwiirela Farao: Olelo kinuupuwela mavehwaaka. ¹⁰ Farao aanoorussiya nanantekwaawe, ni okikhalihe namakhalenla enupa yankhulupale, miivano ninkhulupale aatthu. ¹¹ Hi naahaana tjoolohiya ohiyu n'motja, miniyena. Naaholoha khula ntthu nttoranawe, khula nttora nootaphuleliyawaya. ¹² Naari nimwanlopwana, nanteko ankhulupale. Naahonttonkela tjoolohatjihu, ni aahonitaphulela. Yena aahotaphulela wakhula nttora. ¹³ Ni tjihiiranyaa phanka tjaanitaphulenlyaawe. Farao aahokihokolossera ntekwaaka, ni aahontthukiiha nkhaawooyo. ¹⁴ Vano, Farao aahorumiha wiihaniya Jose. Wowaakuvyaatja, aahokumihiya nkalapoosso. Yena aahokassa ekhararitjae, aahowara ekuwo tjikhwaawe ni aahorwaa wa Farao. ¹⁵ Farao aahomwiirela Jose: Kinooloha, massi khaavo ntaphulela. Vano, kihiiwa wuulumeliyaka, wiira wahimeeriyaka nttora onaataphulela. ¹⁶ Jose aahomwaakhula Farao: Akinakhala, massi Nluku naahala waakhulela. ¹⁷ Farao aahomwiirela Jose: Kilohale kinari waattamenla muro Nilo. ¹⁸ Wowaakuvyaatja, emope saapa tjaahorwaa oNilo tjowiittivala ni tjoophwanela, nitjaalya nimuroole. ¹⁹ Vano, tjaahorwaatho emope saapa, tjootteethyaa, ni tjowootta. Kaari kihinoona tjitthu tjoohiphwanela phanka n'nha. ²⁰ Emope tjowootta tjaahokhuura emope tjowantjera tjophwanela ni tjowiitthivala. ²¹ Wakhuuratjalyaaya, khawaatjuwanyaa wiira tjiholya, kontha tjaakhala tjowootta phanka khalayi. Vano, phaavuwaaka. ²² Nttoranaka nikhwaawe, mitathi saapa tjaahuunuwa n'ri n'motja, tjootjara ni tjooreera. ²³ Phaakhumenlaayatho mitathi tjikhwaawe saapa tjiphuwelaka, tjowootta ni tjoopahiya niiphyoo. ²⁴ Mitathi tjowootta tjaahomirya mitathi saapa tjooreera. Kaahaattonkela atjuwelatji, massi khaavo khumenlale ookitaphulela. ²⁵ Jose aahomwiirala Farao: Tjooloha tja Farao tjitthu tjimotjaaru. Nluku yaapheelaawe onpanka aahon'himeerya Farao. ²⁶ Emope saapa tjooreera tjaari eyaakha saapa, nimitathi saapa eyaakha saapa. tjoolohan'nho tjitthu tjimotjaaru. ²⁷ Emope saapa tjowootta tjaawelale eyaakha saapa, i mitathi saapa tjowootta ni tjoopahiya niiphyoo tjin'hala okhala eyaakha saapa tjotala. ²⁸ Eyo phayan'himeeryalyaaka Farao. Nluku enpheelaawe ovara aahon'himeerya Farao. ²⁹ Nkaweha: tjinaahala ovira eyaakha saapa niiyoolya yintji elapo yooteene yowiigiipitu. ³⁰ Tjaviravale eyaakhan'nho, tjinaahala owa eyaakha saapa tjotala, ni etjoolya tjooteene tjinaahala oliyaliya elapo yowiigiipitu, niitala en'hala okhala yintji. ³¹ Atthu khan'hala wuupuwela wiira yaahopatja okhalana eyoolya yintji mwaha wotala en'hala owa, en'hala okhala yuulupale. ³² Oloha wa Farao waahaakuleliya, kontha aathoonheriye ni Nluku, ni Nluku naapanka woohipitja. ³³ Farao anphwanhe nlopwana owiiwananyaa ni ootjuwelatja, ni anvahatjere elapo yowiigiipitu. ³⁴ Farao aathanle atthu, ni yaayo akusse nphantte woneethanu watjoolimiya elapo yowiigiipitu woyaakha saapa tjoyoolya. ³⁵ Atakanihatje etjoolya wotjen'nho eyaakha tjoyoolya yintjin'nho ni tjikhale mwantjina na Farao, wowiira eyoolyeeyo eliye n'mapooma, Ni assunkatje. ³⁶ Eyoolyeeyo enaahala otossa womyaakha tjotala en'hala okhala elapo yowiigiipitu. Weenen'na yeeyo, elapo khin'hala ovoliya etala. ³⁷ Moolumwaayo yaahontjivela Farao naanantekwaawe. ³⁸ Farao aahowiirela anantekwaawe: Ninanphwanha nlopwana phanka ola, nkhala nin'nepa waNluku? ³⁹ Vano, Farao aahomwiirela Jose: Okhala wiira Nluku hoothoonhera tjitthu tjooteenen'nha, khaavo ntjuweliya ni ootjuwelatja phanka we. ⁴⁰ Onaahala ohoolela enupaaka, phanka tjuulumatjalyaa, atthwaaka ooteene anaahala weettiheriya. Massi weehitjeni kin'hala okhala muulupale woovirikana we. ⁴¹ Farao aahomwiirela Jose: Nkaweha, kinawoovaha ohoolela elapo yooteene yowiigiipitu. ⁴² Farao aahaarula anelaawe ni aahon'wariha Jose. Yena aahon'wariha ekuwo tjooreera ni aahon''wariha nkhova wowooru nssikoniwawe. ⁴³ Yena aahon'weliha nkukuttha wonayeeli waarinaawe. Atthu yaaahonkhuwela: Okokhoriye. Farao aahon'hooleliha elapo yooteene yowiigiipitu. ⁴⁴ Farao aahomwiirela Jose MikiFarao, woohikhala otthunawaa, khaavo nkoovussa nata wala n'nha elapo yooteene yowiigiipitu. ⁴⁵ Farao aahonvaha Jose ntjina naZefanete-Peneia. Aahonvaha Asenate wiira akhale amwaarawe, aari mwaana aPotifera, nankuttho olapo yiihaniya Om. Jose aaheettakatja elapo yooteene yowiigiipitu. ⁴⁶ Jose aarina eyaakha talaathiini owathi waarwaalyaawe wa Farao, mwene owiigiipitu. Jose aahokhuma waFarao ni aaheettakatja elapo yooteene yowiigiipitu. ⁴⁷ Eyaakha saapa tjooteene, tjaahoruweriya. ⁴⁸ Yena aahotakaniha etjoolya tjooteene tjaaphwanhiye eyaakha saapa, elapo yowiigiipitu, ni nmapooma aaheessatja etjoolya. Wakhula epooma yaahaavo eyoolya. ⁴⁹ Jose aahossunka eyoolya yintji phanka n'hava woopahari, aahohiya waalikela kntha yaari yintji. ⁵⁰ Jose aarina asaana eeli ni Asenate, mwaana Potifera, nankuttho olapo yiihaniya Om, tjihinaaya ophiya eyaakha tjotala. ⁵¹ Jose mwaamwanawe oomwntjera aahonvaha ntjina naManasses, ni aahiira: Nluku hokiliyaliha mikatjamiho tjooteene ni tjitthu tjooteene yotthoko yaathumwanaka. ⁵² Mwaamwanawe owaakulela aahomwiihana Efraim, ni aahiira: Nluku hokivaha asaana entji. ⁵³ Eyaakah tjaaruweriye eyoolya yintji yaahophiya wuumaleloni. ⁵⁴ Eyaakha saapa tjotala tjaahophiya, phanka Jose tjaahimyalyaawe. Yaahaavo etala elapo tjooteene, massi elapo yooteene yowiigiipitu yaahaavo eyoolya. ⁵⁵ Owakathi elapo yowiigiipitu waaryaaya niitala, atthu yaahokhuwela ventji ohoolo wa Farao mwaha woyoolya. Farao aahowiirela atthwaale: Nrwaatje waJose ni mwavare yeele en'halaawe ohimya. ⁵⁶ Etala yaari nlaponi mooteene yovathi. Jose aahothukula makhupi ni aahaatumihera atthu owiigiipitu. Etala yaahotepa elapo yowiigiipitu. ⁵⁷ Elapo tjooteene tjaarwaa wiigiipitu wiira yathume eyoolya yaJose, kontha etala yaari yintji elapo yooteene.