¹ Adao aahorupa ni Eva, amwaarawe. Ayena yaahorupala ni yaahonýara Caim. Ayena yaahiira kaahaana mwaana n'motja nlopwana kaakhavihatjeriye niNluku. ² Vano, ayena yaahonýara mwaamun'nawe Abel. Abel aari n'hakheli onama, massi Caim aanaalima. ³ Onavirale owakathi mwintji, Caim aahowaana mihokorokho ni aahon'vaha Nluku. ⁴ Ni Abel aahowaana mihuwotawe tjowiittivala. Apwiya waahaatjivela Abel ovahawawe, ⁵ massi yena khantjivenle Caim niitthu yaavahalyaawe. Vano, Caim aahorussiya tjinene. ⁶ Apwiya yaahomwiirela Caim: Onrussiya tjon'mo essiyani? ⁷ Wapankaka tjiri mantjira, khun'hala otthuniya? Phimana, weehipankeke tjiri mantjira, etanpi enthurumela vankhora owootolenla. ⁸ Caim, aahomwiirela Abel, mwaamun'nawe: Nttwee omattani.Anaritji omattani, Caim aahoonrweela Abel, mwaamun'nawe, ni aahomwiiva. ⁹ Vano, Apwiya yaahonkoha Caim: Mwaamun'naa Abel rivai? Yena aahaakhula: Akintjuwela. Timi kinonkhalenla mwaamun'naka? ¹⁰ Apwiya yaahiira: Opankaleni? Vathi ethhaya, ntju nophome yamwaamun'naa enaakikhuwela. ¹¹ Nen'nava ohotakhalihiya niitthaya mwaha womalakwaa waakhenla ephome yamwaamun'naa eri nmatataniwaa. ¹² Wavaraka nteko woolima, khun'hala ophwanha etthu. On'hala okhala namatthawa ni namakossa watthayani. ¹³ Caim aahowiirela Apwiya: Nttarusswaakooyo muulupale ohinkhwitiryaaka ovilela. ¹⁴ Khweeli, olelo n'naakoomola vatthayaniva ni kin'hala okhala ottayi ninhu. Kin'hala okhala namatthawa ni namakossa vatthayani; ni n'hala okikuman'na, naahala okiiva. ¹⁵ Ni Apwiya yaahomwiirela: Wayoole n'hala omwiiva Caim kinaahala onttarussa emaara saapa. Vano, Apwiya yaahomweessenra nthoonhero Caim, wiira hiiviye nintthu n'hala onkuman'na. ¹⁶ Caim aahokhuma ohoolo waapwiya ni aahokhala elapo yo Node, ohitto wa Eden. ¹⁷ Caim ahaathela amwaarawe, yaahorupala ni yaahonýara Enoque. Caim aahoteka epooma ni aahiihana ntjina namwaamwanawe Enoque. ¹⁸ Enoque, aahon'yara Irade. Irade aahon'yara Meujael. Meujael aahon'yara Metusael. Metusael aahon'yara Lameque. ¹⁹ Lameque aahaathela athiyana eeli: Ada ni Zila. ²⁰ Ada aahon'yara Jabal. Yena aari athumwanaya yaale yaakhala n'heemani ahuwaka enama. ²¹ Mwaamun'nawe iihaniya Jubal. Yena aari athumwaane yaale yiipa etjipo. ²² Zila aahaana mwaana n'motja, Tubal-Caim, funti oopankatja tjitthu tjoporontje. Mwanrokorawe Tubal-Caim aari Naama. ²³ Lameque aahowiirela asaarawe: Ada ni Zila, mwiiwe en'himyaaka, mwiiwe moolumwaaka, kihomwiiva nlopwana mwaha wookirakaliha, nanttonpe mwaha wookinhakela. ²⁴ Wakhala wiira Caim nkoottarussiya emaara saapa, Lameque nkoottarussiya emaara sapiini nasaapa. ²⁵ Adao aahorupatho naamwaarawe naayena naahon'ratho mwaana nkhwaawe, nanvahalyaawe ntjina na Sete; ayena yaahiira: Nluku aahokivaha mwaana nipuro naAbel, Caim noomwiiva. ²⁶ Sete, aahon'yara mwaamwanawe ni aahonvaha ntjina naEnos. Waari owakathi yooyo attthu wantjeralyaaya okhuwela ntjina naapwiya.