¹ Muluku homwiirela Jaco: "Okhume vaa orwe, oo Betel wakhale won'wo. Watekele Muluku altari okhumenlale okathi wanthiawalya Esau, mulupalyaa". ² Vano Jaco howiirela amutjiaawe ni wa yaale yaari ni yena: "Mwaahiye amuluku elapo tjikina eriyari n'nyu, mwiireerihe ni n'ware ekuwo tjikina. ³ Nikhume nirwe oBetel. Kinkela waateka altari aMuluku won'wo yoole kaakhulale nihuku ossankatja ni hokhala ni mii mapuro yeettalyaaka". ⁴ Wahimalyaawe yeele, ayena ahonvahatja Jaco amuluku ohikhala oteene yaarri m'matatani waya, ni epirinku tjaari m'maaruni waya. Jaco hothipela vathi wa n'ri waari wakhiviru woo Siquem. ⁵ Yeettakan'no, woopiha wa Muluku wahonaniaa m'macitati tjaari wakhiviru n'ye, wo wiira apoovo ale ahiwoomolanihe assaana aa Jaco. ⁶ Vano Jaco hophiya oLuz, onkhala elapo yo Canaa; yena naathu oteene yaarinaawe. ⁷ Hateka altari vaavale ni hovaha ntjina naa El-Betel, kontha Muluku phan'himeryalyaawe vaava, okhathi wanthiawaawe muulupalyaawe. ⁸ Debora, ofentiya ni Raquel, hokhua. Yena hossikhiyaoo Betel, vathi wa nri, okhanle wiihaniyaka Alom-Bacute. ⁹ Okathi Jaco ohokolyalyaawe oo Pada-Ara, Muluku honkhumenla tho ni honreeriha. ¹⁰ Muluku homwiirela: "Ntjina naa Jaco, okhuma n'na vaa khuniihaniya tho. Okela wiihaniya Israel". Ni Muluku honvaha ntjina naa Israel. ¹¹ Muluku hiira: "Mi kiMuluku Owerya Tjooteene. Naavaha mihokorokho ni nawintjenriha. Elapo ni athu entji onlaponi anaahala owa oholowa ni anaakhumenla mamwene wa nikhoto naa. ¹² Elapo envahalyaaka Abraao ni Isaque, kinawuvaha ni wee ni nikhoto naa". ¹³ Ni Muluku ahowa mpaka eriyariaawe, nipuro namwiirenlyaawe. ¹⁴ Jaco hothatavenla maluku nipuro niireliayaaawe ni Muluku. Omwarissela yoovahiya yo viinyu vaavale, ni makhura. ¹⁵ Ni Jaco hovaha ntjina naa Betel wa nipuro Muluku nimwiirenlyaawe. ¹⁶ Ayena ahokhuma oo Betel. Anaryeene ni ttalivelo yoo Efrata, Raquel wahomphiyera okathi woopheela oyara. Wahonrikarikatja mayareloaawe. ¹⁷ Omwryakan'no nthukuanawe, namayariha homwiirela: "Ohoove, kontha onaahala omphuanya mwaana nkinaku". ¹⁸ Okhala wiira apheela okhua, mamumuleloaawe okhitjera honromola Benoni, vano athumwaane ahonvaha ntjina naa Benjamim. ¹⁹ Raquel hokhua ni hossikhiya mwinttalani woo Efrata. ²⁰ Jaco hothatavenla maluku wa mahiyeni vale. Piithoonyero wo mahiye mpaka mahuku olelo. ²¹ Israel horwa ni hotteka etendaawe wakhiviru wa etoore yoo Migdal-Eder. ²² Israel akhalakan'no elapo yeele, Ruben horupa ni Bila, amwettaya athumwaane, ni Israel hin'wa mwahooyo. Ni assaana aa Jaco yaari khuumi neeli: ²³ Ni Lia ahon'yarana Ruben, ompatjera, Simeao, Levi, Juda, Issacar ni Zebulom; ²⁴ ni Raquel ahon'yara Jose ni Benjamim; ²⁵ ni Bila, nanteko aa Raquel, hon'yara Da ni Naftali; ²⁶ Ni Zilpa, nanteko aa Lia, hon'yara Gade ni Aser. Otene ala assaana aa Jaco, ayarale oo Pada-Ara. ²⁷ Jaco horwa mpaka wa Isaque, athumwaane, oManre, Quiriate-Arba, mapuro yeettalyaawe Abraao ni Isaque. ²⁸ Isaque hokhala eyaakha eminya wo ciriini. ²⁹ Homumula ni hokua, ni ahokhupeliya mapuro aathu otepa wuuluvala ni okhalana mahuku mentji. Esau ni Jaco, assaanaawe, ahonssikha.