¹ Jaco ahohula mentho awe, ni homoona Esau awaaka, naalopuana eminya tjesse. Jaco ahakawaniha assaana okhuma Lia, Raquel ni ananteko awe oyeeli. ² Vano yena haholelha ananteko awe ni assana awe, Lia naassana awe ottuli, woomalela Raquel ni Jose. ³ Yena horwa ohoolo wawe, hokhoroma ekuaha saapa, mpaka wamwattamenlyaawe muulupalyaawe. ⁴ Vano Esau honthimakela, homwaabrassari ni hompetjari, yaahunlatja. ⁵ Okathi Esau wawoonalyaawe athiyana aale ni anamwane aale, honkoha: "Athu aala thaapani orinaala?" Jaco haakhula: "Assanaaka Muluku akivahalyaawe". ⁶ Vano ananteko aale yahophiyeera vaavale naanamwane aale ni yahokokhora. ⁷ Phaawaawe Lia naanamwane aale, phakokhoraaya. Woomalihera, Jose ni Raquel phaaphiyaawe vaavale ni phukokhoraka. ⁸ Vano Esau phaakohaawe: "Ompheelani nanaanteko aala yawaale okonan'na? Jaco phiiraka: "Wiira kiphuanye olevenliya wa menthoni wa pwiyaaka". ⁹ Esau phiiraawe: "Kihaana mihakhu tjintji, n'himaaka; osunke erinaa". ¹⁰ Jaco hiira: "Mena, sontte, kaphuanya mahala wa menthoni waa, vano waakhenle enuvahakeela, kontha we khueeli woona ekhoviaa ori woona ekhove ya Muluku, ni we ohokikupali. ¹¹ Sontte wakhenle yuuwanelalyaaka; kontha Muluku hokireeriha ventji ni, nlatto wa yeeyo, kihaana tjokiphiyera". Jaco honkanyenriha, mpaka Esau waakhenlaliaawe. ¹² Vano Esau hiira: "Nikhoole ekuahehu iyo, mi kuuthareke". ¹³ Jaco homwiirela: "Pwiya aka, n'naatjuwela wiira anamwane ala ankani, ni epwittipwithi n'ya ni emope n'ya tjinowaamwiha assaana aya; tjakhanyenrihiya weetta tjinene nihuku nimotja paassi, enama tjoteene tjinaakhuatja. ¹⁴ Sontte, pwiya aka, n'hoolele; Mi kinawuutharani vakani vakani, wo nayeeli mueettelo wo nama n'ya, ni mweettelo wa anamwane ala, mpaka n'nophiyen'nyu oo Seir". ¹⁵ Esau hiira: "Paassi kuuhiyere alopuana aka". Maassi Jaco hiira: "Mwimankeli tjom'mo? Pwiya aka n'hokhala oreera nrima ni mii". ¹⁶ Vano Esau hokhussa ephiro awe yo Seir, nihuku nen'no. ¹⁷ Jaco horwa oo Sucote, hoteka enupa awe ni hoteka ntjitji no nama tjawe. Phimaana nipuro n'ne ninihaniya aya oo Sucote. ¹⁸ Okathi Jaco wakhumalyaawe oo Pada-Ara, hophiya owopoeeneecitati yo Siquem, eri elapo yoo Cana, ni hokhala wakhiviru waya ecitati. ¹⁹ Vano hothuma ematta ya assaana oo Hamor, athumwaane Siquem, wo peessa eminya tjo prata, vaavale phaatekaawe enupa awe. ²⁰ Vano vaavale phaateka awe altaari ni howiihana aa Muluku, Muluku oo Israel.