¹ Vano, Jaco aahiiwa moolumo aassaanaawe Labao, yiiraka: Jaco hokussa tjooteene tjaari tjaathumwanihu, ni mihakhu tjooteene nphwanhaka mwaha waathumwanihu. Jaco aahomoona nmeethonimwawe Labao. ² Jaco aahoona wiira muupuwelelwaawe waari nkhwaawe. ³ Vano, Apwiya yaahomwiirela Jaco: Waakulele elapo yaathumwana naassimutjaa ni kin'hala okhala niwe. ⁴ Jaco aahomwiihaniha Raquel ni Lia nmwiini, niinamatjawe, ⁵ ni aahowiirelatja: Kinoona phanka muupuwelelo aathumwaninhu nkhwaawe, massi Nluku aathumwanaka nkhalaka nimiivano. ⁶ N'naatjuwelatja wiira, niikurutjaka tjooteene, kinaavarela nteko athumwaninhu. ⁷ Athumwaninhu anaakithepyaka noorukunussa enaakhelaaka emaara khuumi, massi Nluku khaantthunaka wiira yena nakipankale yootakhala. ⁸ Owakathi wiiraaya: Enama tjoorakala phiinamatja, vano, enama tjooteene tjaayariya tjaakhala tjoorakala. Ni, owakathi wiiraaya: Tjotiiran'nho phin'hala okhala tjawaa, vano, enama tjooteene tjaayariya niitiira. ⁹ Weenan'na yeeyo, Nluku naakumihaka n'huwo waathumwanaa okivaha. ¹⁰ Owakathi , womihuwo, kaahoona moolohani epuri tjoolopwana tjiwelaka. Tjaari tjomanenpa, etiira tjuulupale ni tjooyevatja. ¹¹ Nlaikha naaPwiya naahokiirela moolohani: Jaco. Phaakhulaaka: Kiriiva. ¹² Yaahiira: Ovusse meethwaa ni owehe epuri tjoolopwana tjiwelaka. Tjiri niitiira, ni manenpa, kontha kinawoonaka tjitthu tjooteene tjinoovarelaawe Labao. ¹³ KiNluku ooBetel waatthapenleenhu nipotto, waaluphenleenhu yoothanla. Vano, ohiye elepweela ohokoleele oyariyaa. ¹⁴ Raquel ni Lia yaahaakhulatja ni yaahiiratja: Ehaavo yoohiyeriya yaathumwanihu? ¹⁵ Khaninakhala hi ninkhaaniya phanka atthu oottayi? Kontha ayena anaatumihaka nookussa nssurukhweehu. ¹⁶ Mihakhu tjooteene Nluku tjinkumihakaawe waathumwanihu tjawihu naassaaneehu. Vano, en'halaa wiireliya ni Nluku ovare. ¹⁷ Vano, Jaco aahovuwa ni aahoweessa assaanaawe ncameloni naassaarawe. ¹⁸ Yena aahantja weethiha enamatjawe tjooteene, nimihakhutjawe tjooteene tjaaphwanhalyaawe, otakaniha nimihuwo tjaavahiyaawe, tjaaphwanhalyaawe oPada-Ara, yena aahokhuma wiira akhale ni Isaque, athumwanawe, elapo yooCanaa. ¹⁹ Owakathi Labao waathikilaawe mapuruuru enamatjawe, Raquel aahowin'nha an'luku aathumwaane. ²⁰ Jaco aahonthepya Labao, woohin'himeerya wiira aanakhuma. ²¹ Yena aahotthawa nitjitthu tjooteene tjaarinaaawe ni aaholapuwa wowaakuvyaatja muro, ni arwaale nphantte womwaako Gileade. ²² Nihuku noneeraru, Labao aahohimeeriya wiira Jaco aahotthawa. ²³ Vano, aahaakussa assimutjaawe ni aahomoomolaniha Jaco wookhalaka mahuku saapa. Yena aahonphwanha nphantte woomwaako Gileade. ²⁴ Nluku aahonkhumenla Labao, moolohani ni aahomwiirela: Wiitthonkomanihe, Jaco ohin'himeerye yootakhala wala yooreera. ²⁵ Labao aahonphwanha Jaco. Labao naassimutjaawe yaahomakatja nphantte woomwaako Gileade. ²⁶ Labao aahomwiirela Jaco: Opankaleni, okithepya ni waakussa assaanaka phanka anantthukiya nkhottoni? ²⁷ Otthawenleni niwinpithyaa, okithepyaka woohikihimeerya? Kaanawooleeha ninttottopelo niitjipo, niikoma nitjooruma. ²⁸ Khukitthunihale woovaha etjwaatjwa ni waaleeha assitjulaka naassaanaaka. Wuupuwelale tjitthunalyaa. ²⁹ Kihaana ekuru yowoopanka yootakhala, massi Nluku aathumwanaa hokiirela ntjana ohiyu wiira: Wiitthonkomanihe, Jaco ohin'himeerye yootakhala wala yooreera. ³⁰ Vano, waahokhuma, waapheelela essiyani ohokoleela ntthoko naathumwana. Essiyani waakussaka anlukwaaka? ³¹ Jaco aahomwaakhula Labao: Kontha kaanawoova ni kuupuwela wiira mwaanawaakussa assaaneenhu , phimaana kikhumaka niwiipithyaa. ³² Wayoole aakussale anlukweenhu khankahala nkumi. Ohoolo wassimutjeehu, munthoonhe ri awinhu ni munkusse. Kontha Jaco khaatjuwela wiira Raquel phaakussale. ³³ Labao aahokela n'heemani mwa Jaco, n'heemani mwa Lia, ni n'heemani mwaananteko ooyeeli, massi yena khaaphwanhale. Yena aahokhuma n'hemani mwa Lia ni aahokela n'heemani mwa Raquel. ³⁴ Raquel aahaakussa anluku vatthokoni, aahaattukela nkameloni, ni aahowookomela. Labao aahaapheelatja n'heemani kooteene massi khaaphwanhale. ³⁵ Ayena yaahowiirela athumwanaya: N'hirussiye, Pwiya kontha akinphwanela ovuwa ohoolowinhu, kontha kiri nimweeri. Vano, yena ahaatholathola anlukwaawe khaaphwanhale npaanimwawe. ³⁶ Jaco aahorussiya ni aahonkoha Labao. Ni aahowiirela: kivaraleni? Kivaraleni yotanpi wookoomolaniha noorussiya? ³⁷ Kontha n'nakukhuryatja tjithutjaka tjooteene. Ephwanhaleenhu essiyani womihakhu tjoowan'nhinhu? N'hiye ohoolo waassimutjiihu, wowiira nilamuliye ooyeeliwihu. ³⁸ Wokhalaka eyaakha siriini, kikhalaka ninhu. Mihuwotjinhu niinamatjinhu khatjinkhumaka, wala akinakhuura enamatjaa. ³⁹ Evariye niinama tjontakhwani akiwaanale. Ohiya vaa, kaahovilela. Ohokiliviha khula enama yaahaleela, yaarimeela otahana wala ohiyu. ⁴⁰ Kaari woowu: Othana kaanaarettheela, ni ohiyu okame waanaakiririya, akaarupa. ⁴¹ Eyaakha ssirini kinari owanuwa. Kihaavarela nteko assaanaa eeli eyaakha khuumi natjesse niiyaakha sita kikhalenlaka enamatjinhu. N'horukunussa emaaa khuumi etthuvwaaka. ⁴² Wakhala wiira Nluku aathunwaka, Nluku aAbraao, yooyo Isaque n'moovaawe, hikhale nimiivano, weekhweeli mwaanaakoomola woohiitthu. Nluku n'noonaka mahuvihwaaka ni tjinvaraaka nteko ni hootthukelani ntjana ohiyu. ⁴³ Labao aahaakhula ni aahomwiirela Jaco: Assaanaayo awaka, otjuulu wawaka niinaman'nho tjawaka. Tjooteene tjinoonaa tjawaka. Massi kaapankekeni olelo asaana wala assaanaaya ayarale? ⁴⁴ Vano nipanke etthu emotja, ni nihiye wiira ekhale namoona ooyeeliwihu. ⁴⁵ Vano, Jaco aahokussa nluku ni aahokhaliha nipotto. ⁴⁶ Jaco aahowiirela assimutjaawe: Nlokotthele maluku. Yaahokussatja maluku ni yaahotataanihatja. Ayenatja yaaholyatja vaavale. ⁴⁷ Labao aahovaha ntjina Jegar-Saduta, massi Jaco iihanale Gileade. ⁴⁸ Labao aahiira: Nipotton'na phinamooneehu. Phimaana wiihaniyaaya Galeede. ⁴⁹ Tootho waahiihaniya Mizpa, kntha Labao aahohimya: Wiia Apwiya aniwehawehe nahiyanatjavale. ⁵⁰ Waahuvihatja assaanaaka wala waathela athiyana akhwaawe woohikhala assaanaaka, hata ohikhalaka nintthu, Nluku namooneehu. ⁵¹ Labao aahomwiirela Jaco: Nkaweha nipotton'na, niphwanhatjaleehu. ⁵² Namooneehu, nipotton'no namoona wahin'halaaka ovira npaka waryaa, ni wahin'halaa ovira wanipottoni owaaka waryaaka, woopheela owaana mirikoriko. ⁵³ Nluku aAbraao, Nluku aNaor, Nluku an'nathumwanaya, anilamule. Jaco aahonluphela Nluku, yooyo athumwaane Isaque yaamoovaaya. ⁵⁴ Jaco aahovaha tjoovaha omwaako ni aahowiihana assimutjaawe wiira alye. Yaaholyatja ni yaahoviratja ohiyu wooteene omwaako. ⁵⁵ Owitjissuuru, Labao aahovuwa, aahaavaha etjwaatjwa assitjulawe naassaanaawe aahaareerihatja. Vano, Labao aahaahiya ni aahohokoleela owanuwawe.