¹ Okathi Isaque wuluvanlyaawe ni mentho awe owootjia tja, wo manan'na yahakhuitiriaawe woona, yena homwiihana mwaamwanawe Esau, mwaamwanawe omuulupale, ni homwiirela: "Mwaamwanaka". Hiira yena: "Kiri vaa". ² Yena hiira: "Nkoona, kihuuluvala. Mi akintjuwela nihuku ninkhuaaka; ³ Phimaana okusse ekaputhi tjan'yo, nrupa wo mavaka ni ntheere naa, oruee ntakhuaani wakilupathele enama. ⁴ Opanke eyoolya yootjiva, wo manan'na okitjivela, wo wiira kilye ni kuureerihe kiinathi okhua". ⁵ Rebeca hin'wa okathi Isaque wuulumaawe ni Esau, mwaamwanawe. Esau horua ntakhuani olupatha ni awaane enama. ⁶ Rebeca huuluma ni Jaco, mwaamwanawe, ni hiira: "On'noona, kihowin'wa athumwanaa yuulumaka ni Esau, mulupalya, yiiraka: ⁷ "Okiwaanele enama ni okipankele eyoolya yootjiva, wo wiira kilye ni kuureerihe ohoolo wa Pwiya kinaathi okhua". ⁸ Phimaana vaa, mwaamwanaka, okiviriyane muulumoaaka wa yeele enkelaka owiirela. ⁹ Orwe mwintjitjini, okiwiihere epuri piili; kinawaapia eyoolya yootjiva waavahe athumwana, wo manan'na ontjivela. ¹⁰ Wee wakusse waavahe athumwana wo wiira yalye, wo manan'na wiira yuureerihe, ahinaaya okhua". ¹¹ Jaco howiirela anumwanawe Rebeca: "Mulupalyakooyo haana mapururu, vano mii akirina mapururu. ¹² Apaapaayo ankela okivaravara ni anaahala okitjuwelela wiira kinawoothi. kinkela wiiwaanela mananariho ohiya mareeriho". ¹³ Anumwaane ahomwiirela: "Mwaamwanaka, wa mananariho oteene yakimorele. Opanke muulumoaaka, orwe, okiwaanele. ¹⁴ Vano Jaco ahorwa, hokussa epuri piili tjophiyaaru haaruaanela anumwaane. Ayena ahopanka eyoolya yootjiva, wo manan'na athumwaane tjaatjivelaaya. ¹⁵ Rebeca horussa ekuwo tjooreera tja Esau, mwaana omuulupale, tjaarinaaya owan'nyaya, yahon'wariha Jaco, mwaamwanaya onkani uyo. ¹⁶ Yahomwapareryatja mapururu opuri mapuro yahaarivo mapururu yahaarinaawe nsikoni. ¹⁷ Ahonkussiya eyolya yootjiva ni ephau yoossalyaaya m'matatani wa Jaco mwaamwanaya. ¹⁸ Jaco ahorwa mpaka waathumwaane ni hiira: "Paapa". Ayena ahakhula: "Kiri vaa; opani wee, mwaamwanaka?" ¹⁹ Jaco hiira: "Ki Esau, mwaamwaninyu ompatjera; kihopanka ntoko tjikirenlen'nyu. Vano monkome nlye enama ewaanalyaaka wo wiira nkirerihe". ²⁰ Isaque homwiirela mwaamwanawe: "Ohakuva ophuanya enama, mwaamwanaka?" Yena haakhula: "Kontha Pwiya, mulukuin'nyu, nookiwiihera". ²¹ Isaque homwiirela Jaco: "Okattamenle vaa wo wiira kuuvaravare, mwaamwanaka, wiira koone wiira weekhueeli mwaamwanaka Esau walani khanakhala". ²² Jaco howaattamenla athumwane Isaque, ahonvaravara ni ahiira: "Ntju ninkhala ntoko naa Jaco, maassi moono n'yo tja Esau". ²³ Isaque khantjuwelenle, kontha moono tjawe tjaahana mapururu, ntoko tjamulupalyaawe Esau. Vano Isaque honreeriha. ²⁴ Yena honkoha: "Weekhueeli wee oo Esau mwaamwanaka?". Ni yena hiira: "Thimiivano". ²⁵ Isaque hiira: "Okiwiihere eyoolyeeyo, kilyeke , ni kuureeriheke". Jaco hawiihera eyoolyeeyo athumwaane. Isaque holya, ni Jaco haawanela evinyu, ayena ahovurya. ²⁶ Vano athumwaane ahiira: "Okattamenle vaa okivahe epeetjo, mwaamwanaka". ²⁷ Jaco howaattamenla ni haapetjari, ni yena hoona onukhela ekuwo tjawe ni honreeriha, iraka: "Nkoona, onukhela wo kuwo tja mwaamwanaka onukhela wo ntakhuani Pwiya yuureeriahalyaawe. ²⁸ Muluku oovahe okame wo wiirimu, ni mihakhu ntuniyani muu ni etiriku yintji ni evinyu yophiyaaru. ²⁹ Wo wiira apoovo yuuvarele nteko ni elapo tjukokhore oholo waa. Okhale mwinthutjihi assihimaa, ni assaana anumwana akokhore ohoolo waa. Wa yaale ankela wuunanariha akhale onanarihiya, ni oteene yaale ankela wuureeriha areerihiye". ³⁰ Isaque honreriha Jaco, ni yena hokhuma wariyari wawe, Esau muulupalyaawe howa wuulupathani. ³¹ Yena hopanka eyolya yotjiva ni hawaanela athumwane, iiraka: "Paapa, nvuweke, nlye ethu ewanale mwaamwaninyu wuulupathani, wo wiira nkireerihe". ³² Isaque hiira: "Opani wee?" Yena hiira: "Mi mwaamwaninyu, ompatjera, Esau". ³³ Isaque hokhala otikinihiya ni hiira: "Tipani akiwaanenle eyoolya? Mi kiholya wee ohinaaya owa, ni kihonreeriha. Weekhueli yena naahala oreerihiya". ³⁴ Okathi Esau win'walyaawe muulumo athumwaane, hunla veentji tjinene ni hiira: "Nkireerihe ni miivano, paapa". ³⁵ Isaque hiira: "N'himaa howa vaa nuulavilavi awe hokussa mareeriho aa". ³⁶ Esau hiira: "Khunakhala wo sariya yena ophuanela wiihaniya Jaco? Yena hokithepiaa ekuaha piili. Hokussa eyuulupalyaaka ni n'na vaa hokussa mareeriho aka". Vano honkoha: "Khankissunkenre mareeriho?" ³⁷ Isaque homwaakhula Esau: "Tjo, kihoohela n'hooleli, kihuvahatjera assihimaa wa anantekoaa. Ni kihonvaha yena etiriku yiintji ni evinyu yophiyaru. Kipankekeni tho, mwaamwanaka?" ³⁸ Esau howiirela athumwane: "Khanrina tho maareeriho, paapa? Nkireerihe ni miivano, paapa". Esau hunla tjinene akhuwelaka. ³⁹ Isaque haakhula iiraka: "Tjoo, mapuro ankela okhala ottayi wo thaya yowunttela, ottayi wa okame om'mora wiirimu. ⁴⁰ Wo katana phimakalelo aawa ni onkela onvarela nteko n'himaa. Massi, wataphuwa vale, onaahala otaphuwa won'wehaweha yena. ⁴¹ Esau ahokhala okassiriya nlatto wo mareeriho athumwaane anvahalyaaya. Esau ahiira wanrimani wawe: "Mahuku okhua athumwanaka ari wakhiviru; yaviravale, kinaamwinva Jaco". ⁴² Muulumo aa Esau, mwaana opatjeriya, ahohimeeriya Rebaca. Vano yena homwiihaniha Jaco, mwaamwanawe onkaaniuuyo, ni homwiirela: "Vaa, muulupalyaa Esau hiimaaliha noolakela owinva". ⁴³ Phimaana n'na vaa, mwaamwanaka, othiawele owan'nyawe Labao, nrokoraka, oo Hara. ⁴⁴ Wakhale okathi vakani, mpaka otjatja wa muulupalyaa ovukuwe, wo wiira yena aliyale wa yeele empankalyaa. ⁴⁵ Vano, kinaahala wuuwaaniha. Kontha kinkela waahaleela assaana oyeeli nihuku nimotja? ⁴⁶ Rebeca homwiirela Isaque: "Kiri okassiriya nlattu wa assaana athiyana oo heteu. Jaco akussa assaana oo heteu, assaana olapo yeela, okumiaaka onkoomalela vai?"